¹ Masi okathi yole, muene Herote ahatthuka anankerejani akina wira ahukhumu, ² niahimuinva Tiyaku, n'himawe Yohani nimuaalo. ³ Pata yowona wira eyo yahazivela mayuta, ahinlupattha wira antthuke Peturu. Eyo yiraneiale okathi wamikatthe zohikhalana miropo. ⁴ Pata yonvara Peturu, ahin'hela n'khattheia ni khuahela atoropa ajexe wira anlipeleleke, aphelaka onwana watthuni avira pasicowa. ⁵ Vano Peturu ahiheliya n'khattheia, masi ekereja yaninvekelela yena vinjene waN'luku. ⁶ Ohiyule, Herote waphelawe athonhihere atthu, Peturu ira arupaka eriyari yatoropa enli, onatthukiye nunholo minli, ni, oholo wankhora yahavo anamawehaweha okhattheianwe. ⁷ Vano n'layikha nimoza naPwiya nan'nanoru nahinkhumelela, ni muenke m'moza wahimualela n'khattheia. N'layikha nahinkapattha m'phanttheiawe Peturu, khunvenhiha ni khumuirela: Ovenhenan'nano''. Vano onholo wahimora m'matataniwawe. ⁸ N'layikha nahimuirela: ''Oware ekuwozao ni esantalhazao''. Peturu ahira zizo. N'layikha nahimuirela yena: ''Oware ekazakoao ni okitthare''. ⁹ Peturu ahitthara n'layikha ni ahikhuma. Yena khazuwela wira n'layikhanne yiraya yari ekhueli. Yena upuwela wira analoha. ¹⁰ Vano vonaliawe avikanaka anamalipelela opajera ni anenli, yahiphiyaza onkhora mulupale wayumma wakhumela opma, oyo watthukuwelale vekhaya. nuukhuma, yahikhuruwela m'phironi, ni nl'ayikha nan'nanoru nahin'hiya. ¹¹ Vano Peturu ahimora vekkhawe, khuira: ''khelikheli, vano kozuwela wira aPwiya anuruma n'layikhanaya wira nikopole m'matatani mua Herote ni wazotene zupuwelaya atthu mayuta''. ¹² Nuzuwela eyo, ahiroa owan'nhawe Maria, mamawe Yohani, atthuviye n'zina naMaruku, wonwo makiristto injene wathukumanaliaya ni alompaka. ¹³ Numana n'khora, namarumela m'moza azimiya Rode ahikhuma wira anjipu. ¹⁴ Vazuwelaliawe wira yari esoti yaPeturu, yahintthela eroho m'pakha oliyala otthukula n'khora. Ohiyatho voo, ahitthimakela vasala, khuhimia wira Peturu anumuemela, vankhora. ¹⁵ Vano ahireliya: ''We onupaphareia''. Masi yena anikhanherera. Ayenaze yahira: ''N'no n'layikhanawe''. ¹⁶ Masi Peturu ninlelo anokottha ni, vatthukuliyaya n'khora, yahinphuanha ni khukhala otikinihiya. ¹⁷ Ahitaphula matatawe ahimeriaka wira amaale, khuahimeriaza enamuna xeni aPwiya yankumihaliaya n'khattheia. Yena ahira: ''Ahimeriaziye inya etthunya Tiyaku naaxin'na akina'' Vano ahikhuma ni khuroa nipuro nikina. ¹⁸ Vakhukumualiaya nihukunne, atoropa yahixenkereia vinjene muaha waiele yankhumelelale Peturu. ¹⁹ Herote pata yonphelaza yena , ahimphuanhaka, ahakoha anamasunkera ni khuhimia wira ahitakaziye. Vano Herote ahikhuma oyuteya aroaka oCesareia ni khuviriha okathi onari wenwe. ²⁰ Herote ahinanariya naatthu yakhala oTiru ni oSiton, ayo yaroale khumphuanha yena ni khunthuperia Blastyo, n'khaliheri amuene, wira akhalihere. Vano khuvekela n'retthele, okhala wira elapoaya yanakhelela eyoja yaamuene. ²¹ Wanihukun'no, Herote ahiwara ikuwo zeemuene, khonkoma vahijeni ni khuahimeria ayenaze. ²² Atthu yakhuwela: ''Esiti yaN'luku ni yohikhala yantthu!'' ²³ Nan'nanoro n'layikha naPwiya nahinrakaliha, okhala wira khantthotthopelale N'luku, ni, ahilumakaziya nimuinku, khukhua. ²⁴ Wazotene molumo aN'luku yaninnuwa niwunjerereia. ²⁵ Barnabe ni Saulo yahihokolela o Jerusalem pata yomalihera n'tekoaya, yahinkuxa Yohani ole avahiye n'zina no Maruku.