¹ Nokudharo zwiitei atedzeri aMwari, hingana ana ake adhiwa, ² uye hambai murudho, se zvaakatidha Kirisitu uye Iyena patchake wakadzipereka ngo pamusana pedhu, hingana tchipo ne shipiriso tchino nuwhira kuna Mwari. ³ Ngapasaonekwe pakati penyu kureketa zvo useki kana kuti kuswipiswa, kana kuti kusirira, kuita ingana zviro zwinodhikwana kuwatswene. ⁴ Musarekete zvitswerudzi, mabuyo eupenzi kana kuti kutswinyirana zvakashata, kunze kwazvo ngapaonekwe mabhasa enyacha. ⁵ Garai makazviziya kuti akuna munhu unoita useki, wakaswipiswa, unosirira, unonamata zwifananidzo, unogara no nhaka muUmambo wa Kirisitu ne waMwari. ⁶ Musatende kutchengedzerwa no masoko asina zviro. Nekudha kozwiro izwi, ushungu waMwari uno uya pamusoro pe ana anomusikadzwa. ⁷ zvakadharoko musatende kupindirana nawo. ⁸ Asi kareko manga muri tchidhima, asi zwino muri tchiedza muna Ishe. Hino hambai kuita ana etchiedza, ⁹ (ngekuti tchibhereko tchetchiedza tchinorambira mu unaki, kuita zviri pamutemo ne tchokwadhi), ¹⁰ meitswaga nguwa yese kuziya ngazvipi zwinodhakadza Ishe. ¹¹ Musaite mabhasa erima asina zwibhereko, asi arambei, ¹² asi zwiro zvaanoita mutchifisefise zvinotswerudza kuzvitsanangura. ¹³ Zwiro zwese, zwikakandwa patchiedza, zwinowonekwa. ¹⁴ Tchese tchinooneka i tchiedza. Nekudharo zwinozwi: Muka, iwe urikuwata, purumuka , pakati pewakafa, uye Kirisitu utchaetikira mauri. ¹⁵ Nekudharoko itai mhore no mahambiro enyu, musaite se asina kungwara muushaishi, asi se anoruziyo, ¹⁶ metchitora mukana we kuita zvamunodha, ngekuti mazuwa achata. ¹⁷ Musawe mapendzi, asi izwisisai kuti ngakupi kudha kwaIshe. ¹⁸ Uye musararadze ne vinyu, ngekuti izwi zwinotsakatisa. Kundze kwazvo, garai makadzara neMwiya Mutswene, ¹⁹ metsireketa umwe kuno umweni ne mapisarema, ngoma ne nziyo dzemweya; metchiemba nokurumbidza nemoyo wenyu wese kuna Ishe. ²⁰ Nguwa dzese metchipa nyasha pazviro zvese kuna Mwari wedhu na Babha, muzina ra Ishe wedhu Djesu Kirisitu; ²¹ metchizvi dhodhosa pasi umwe kuno umweni nokuthya Kirisitu. ²² Akadzi, zvi dhodhosei pasi pe amuna enyu se zvamunoita kuna Ishe. ²³ Ngokuti mwamuna ndiwo musoro wemukadzi, se kudharowo Kirisitu ndiwo musoro weThemberi, ari iyena muponesi wemwiri. ²⁴ Ndizvonao neThemberi iri pasi paKirisitu, hino akadzi anofanira kuti azvi dhodhose pasi pe amuna enyu pa zvese. ²⁵ Amuna, idhai akadzi enyu sa Kirisitu wakadha Themberi uye Iyena patchake wakazviperekera kwairi. ²⁶ Iyena wakazviita kuti iwe itswene, waKaitchenesa ngekudha kwekusukwa ngemvura ngekudha kwe soko, ²⁷ kuitira kuti apangidzire kwaAri Themberi imwe yakakudzwa, isina kukhata kana makhuzi kana zwiro zvakatodzana naizvi, asi itswene uye isikazotongwi. ²⁸ Nge mushobho umweo, amuna anodhikana kuti adhe akadzi awo se mwiri dzawo. Wiya unodha mukadzi wake unodzidha patchake. ²⁹ Nokuti tchipo, akuna wakambozonda mwiri wake. Kundza koizvi unosapota nokutchengeta se Kirisitu unotchengetawo Themberi, ³⁰ ngekuti tiri mitezo yemwiri Wake. ³¹ Nokudha koizvi, mwanarume utchasiya bhabha ake na mai ake uye utchabhatana nomukadzi wake, ari airi atchaita nyama imwe bhasi. ³² Uyu ndimunana mukuru, asi inini ndirikureketa nekudha kwaKirisitu neThemberi. ³³ Zwakadharo umwe naumwe wenyu unodhikanawo kudha mukadzi wake sa iyena patchake, no mukadzi unodhikana kuremekedza mwamuna wake.