¹ Vano kahoona, ntata noolopwana na Ole akilathale vehitjeni, elivuro yolepiya n'hina ni ota. Eyo yatthukiye ni mikhoyi thanu napili. ² Kahona n'laikha noowerya nikhuwelaka ventji: ''Tipani onrerela otaphula elivuru ni okwakwanyula mikhoyi tjaya?'' ³ Khuvo wirimu, n'nakhala vathi, n'nakhala vathi va etthaya, arerela otthukula hata otjoma elivuru. ⁴ Miyano kanunla ventji okhala wira khuvo aphwanyiye arerela otthukula hata otjama elivuru-ile. ⁵ Vano wa m'motja a manciyawu ahikihimerya: ''N'hunle. Kharamu a nloko na Oyuda, Ntathari wa Davidi, oxintta wira atthukule elivuru ni okwakwanyula mikhoyi tjaya thanu napili''. ⁶ Kahinwela mwaxana a mwapwittipwitthi emenlene, eriyari ya ehitje ni itthuye ikumi tjese ni manciyawu. Mwaxana ole a mwapwittipwitthi akhala ntoko onuukhwa. ⁷ Owo arina manyaka thanu napili ni mentho mathanu napili. In'yo Minepa tja Muluku tjirumiye elapo yotene. Owo ahiwa ni okuxa elivuru m'matatani mwawe mono wolopwana wa Ole akilathale vehitjeni. ⁸ Okathi Mwapwittipwitthi akunxawe elivuru, itthu in'ye ikumi tjese ni manciyawu miloko mili ni tjese yahikokhora oholo Wawe. Wakhula wa yawo ahikhalana mpetta ni ekopho ya ewero yotjareya wunkhela, ari mavekelo a atthu owarya. ⁹ Awo yaanipa etjipo ya nanan: ''Nyuwano mun'nirerela okuxa elivuru ni otthukula mikhoya tjaya, okhala wira n;hokhwa ni, ni ephome-Nyu, n'hathumela atthu Muluku a maloko otene, mattava, atthu ni ilapo. ¹⁰ Nyuwano n'hapaka mamwene ni anankuttho wira anrumeleke Muluku ehu, ni awo animwettiherya elapo ya vathi''. ¹¹ Vano kahiweha ni kahinwa matju a maikha mentji, arukureryaka ehitje, a itthu in'ye ikumi ni a manciyawu, numuru notene otakaha naari a ikonto ikonto tjene. ¹² Awo yalavula ni okhuwela: ''Onrerela mwapwittipwitthi okhwale wakhela owerya, n'hakhu, otjuwela, ikuru, nttittimiho, ovuwa ni ovuwaxa.'' ¹³ Kahinwa yoopattuxiya yotene yari wirimu, vathi, vathi va etthaya ni m'matjini - tjotene tjiri mem'mo tjiraka: ''Ole okilathale vehitjene ni Mwapwittipwitthi attittimihe, nttittimiho, ovuwa ni owerya wira ettiherye vohimala''. ¹⁴ In'ye tjese ikumi yahira: ''Amem!'' Ni manciyawu yahikokhora ni Yahinkokhorela.