¹ Numalaitthu in'ya, kahiweha nlaikha nikinaku, nikhuruwaka wirimu, naarina owerya wulupale, ni elapo ya vathi yahomwaleliya ni ovuwa waya. ² Nlo nahikhuwela ni ntju nulupale, niiraka: ''Oomora, oomora Babiloniya mulupale! Owo opakeya empa ya axotwani, evithelo ya minepa tjotene tjoonanara ni ixinuni oothanyeya. ³ Okhala wira ilapo tjotene tjin'niwurya evinyu ya ohiloka waya. Mamwene a nlaponi araruwana. Anamatumiha a nlaponi athaatjiri ni owerya wa ohiloka waya''. ⁴ Kahinwa ntju nikinaku wirimu, nahimya: ''Mwinkhume, nkiwele miyano, wira n'hirele mphantti wa itampi tjawe, ni wira n'hiphare mwa tjotakhala tjawe; ⁵ okhala wira itampi tjawe tjotakanihana mpakha wirimu, ni Muluku ohupuwela miteko tjaya tjotakhala. ⁶ Atthuveliye ntoko owo atthuvenlyawe akinaku, ni aliviye otthariyaka miteko tjawe; nkophoni owo otakanihalyawe, ntakanihe ikwaha pili munvahe owo. ⁷ Ntoko owo invuwihalyawe mwanene ni akhanle moothatjirini, munvahe nthinto woolikana ohaxiya ni ohawa. Vano owo on'himya varohoni vawe: 'Kikilathale ntoko pwiyamwene, khahiyo kanamukhweli ni nkinkhalakhala kihawaka.' ⁸ Vano, nihuku nimotja, ohawa waya onawa: okhwa, ohawa ni etala. Awo anopahiya ni moro, vano Apwiya Muluku toowerya ni Owo namalamula aya''. ⁹ Mamwene a elapo ya vathi opakale ni owo itthu tjohiloka ni opakale owo tjatthunawe ni owo animunla ni onamwikhupanyerya ni owo okathi onrowa owa mwixi wopahiya wawe. ¹⁰ Awo anarowa okhala ottaiwene, yovaka ohaxiya waya, yiiraka: ''Ayi! Ayi! Epoma yulupale Babiloniya, yowerya! Okathi vakhani pahi ohaxiya waya wophiya''. ¹¹ Anamatumiha a elapo ya vathi an'ninla ni an'nikhupanyerya waha wa owo, okhala wira khuvo onthuma-tho tjotumiha tjaya: ¹² tjotumiha tja ewero, eparatha, maluku owarya, iperola, ikuwo tjoorika, epurpura, eskaralata, ni miri tjotene tjowarya, itthu tjotene tjimpakiya ni manyaka a axinama, ni madera owarya, tja ebronze, tja eyuma ni marmore, ¹³ ekanela, pimenta, emirra ni makhura owunkhela, evinyu, makhura, ephepa yorera, inyompe ni ipwittipwitthi, ikhavalo ni icharete, ipottha ni iroho tja atthu. ¹⁴ Muhokorokho waroromele-nyu ni owrya winyu wotene ohotthyawane. Warya winyu wotene womwareya; khainiphwanyiya-tho. ¹⁵ Anamatumiha a itthu in'ya, apakeyale athatjiri mwaha wa tjen'yo, anarowa okhala ottaiwene mwaha wowova ohaxiya waya, yunlaka ni yikhupanyeryaka ventji. ¹⁶ Awo anahimya: ''Ayi! Ayi! Epoma yulupale yawarihiye elinyu yorika, epurpura ni eskarlata, ni orerihiya ewero, maluku owarya ni eperola!'' ¹⁷ ''Okhala wira, ewora emotja pahi, othatjiri waya wokwakwanyuliya''. Aneettiha ntteke, aneettiha ekalawa, ni ale otene aneetta m'matjini, ari ottaiwene. ¹⁸ Awo an'nikhuwela numala oweha mwixi a opahiya waya. Aniira: ''Epoma xeni enlikana ni epoma ela yulupale''? ¹⁹ Awo ahihela ntthupi m'muru mwaya ni anakhuwela, yunlaka ni yikhupanyeryaka: ''Ayi! Ayi epoma yulupale, wenwo otene ale yarina ikalawa tjaya m'matjini, apakeyale mathatjiri mwaha wa yeyo, vano, ewora emotja pahi, eyo yokwakwanyuliya''. ²⁰ ''Ntthapeke mwaha wa eyo, erimu, nyuwano owarya, arum'mwa ni maprofeta, vano Muluku ophuka nlattu enyu eriyari ya eyo''! ²¹ Nlaikha nowarya nahikuxa nluku nalikana ni nluku nulupale na nxilo ni khuttikhela m'matjini, n'nira: ''Tjitjam'mo, Babiloniya, epoma yulupale, enakwakwanyuliya ni ekhotto ni khentthikela-to owehiya. ²² Ntju na mpetta, anawiipe, anrumiha iflauta, ni ale anruma malope khantthikela-tho winwiya ni nyuwano. Khuvo namapaka itthu ontthuna owehiya-tho ni nyuwano. Khuvo ntju na nxilo ninkela otthikela winwiya-tho ni nyuwano. ²³ Warya wa ntthuku khontthikela-tho warya wa nyuwano. Ntju na namathela ni namatheliya khanintthikela-tho winwiya ni nyuwano, vano anamatumihanyu yaari mwamwene a nlaponi ni ilapo tjotene tjowokiya ni olowa wenyu. ²⁴ Wa yeyo yophwanyiya ephome ya maprofeta ni owarya ni otene akhwale elapo ya vathi''.