¹ Kahivahiya nlaxi wira okhale ntoko ekopo yophimana. Kahihimeriya: ''Nvenye ni mphime empa ya Muluku, altari ni ale otene ankokhorela. ² Vano n'hiphime ota wa empa ya Muluku, vano owo ahivahiya amalapo. Awo ananyahakela epoma yowarya n'hina wa miyeri miloko mitjese ni mili. ³ Miyano kinamwavaha anamonaka enli owerya wira alaleye, awaren'ne isakho, n'hina wa mahiku ekonto emotja ni imiya pili ni mahiku miloko mathanu namotja''. ⁴ Anamona awo miri tja olivera minli ni ikhantiyero pili tjiri oholo wa Apwiya a vathi. ⁵ Akhala ntthu omphela onwanela tjotakhala, moro onakhuma mwano mwaya, akhuraka awanani awe. Khula m'motja omphela wawanela tjotakhala ohana okhwa tjitjam'mo. ⁶ Anamona awo akhalana owerya wootthukhwa wirimu, wira ehirupe epula mpakha okathi awo antthunaya ohimya. Awo ahana owerya woopittikuxa matji wira akhale ephome, ni tho ohonona elapo ni tjotakhala tjotene, wakhula ikhwaha tjintthunaya. ⁷ Okathi awo anrowaya om'maliha namona aya, nsene ninkhuma wepini ni munlittini tjinawana ni awo. Owo onarowa waxintta ni owinva. ⁸ Irutthu tjaya tjinakhala tjirupathalene mphironi mwa epoma yulupale ( yeyo enihaniya ni ethonyeryo Sodoma ni Egito), wenwo Pwiyaya akhomeliyawe. ⁹ N'hina wa mahiku mararu ni emeya, atthu a khla mphantti, maloko, mattava ni ilapo anaweha irutthu tjaya, ni anakhottiha wira tjivithiye. ¹⁰ Ale ankhala vathi anahakalala mwaha wa yawo, anatthapa ni-tho anaruhelana tjotthuvela tjaya akina ni akina, okhala wira maprofeta awo menli yananyakula atthu ankhala nlaponi. ¹¹ Numala mahiku mararu ni emeya, omumula wa ekumi owaka mphantti wa Muluku ohakela awo, ni awo yahanle oweemela.Woova wuntji wahawela otene-aya yaale yaweha eyo. ¹² Vano yahinwa ntju nookhuwela, niwaka wirimu, ni nahahimerya: ''Nwe va!'' Vano, awo yahowela wirimu n'hina wa nihutte, awanani aya yawehaka. ¹³ Okathi-ule, yahikhumelela etetere yulupale, ni mphantti m'motja wa epoma yahikwakwanyuliya. Atthu ophiyaka ikonto thanu napili yahikhwa vatetereni, ni ale yahalale yanoova ni yahinvuwiha Muluku a wirimu. ¹⁴ A enenli ahivira. Moone! A nattharu onwa nwo vowakuveya. ¹⁵ Nlaikha na nethanu napili nahirumiha mpetta aya ni matju mentji yanilavula wirimu, yiiraka: ''Omwene wa elapo ela wokhala Omwene wa Apwiya ni Kristu Aya. Owo onamwettiherya vohimala vohimala''. ¹⁶ Vano manciyawu ale miloko mili ni atjese akilatjale mwehitjeni mwaya, oholo wa Muluku, yahikokhorela vathi, ni owitho waya wowurama, ni yahinkokhorela Muluku, ¹⁷ yiiraka: ''Mahala Nin'noovahani, Apwiya Muluku, Owerya Tjotene, Ole Ari ni ori, okhala wira Mookuxa owerya Winyu ni mpatjerya weettiherya. ¹⁸ Atthu yahonanariya, vano ohowa onanariya Winyu. Okathi woophiya wira alipa okhwa alamuliye ni wira Nyuwano mwaatthuvele ananteko-Inyu, maprofeta, owaarya ni otene ale anoova ntjina Ne-nyu, okhuma akhini ni owerya. Okathi wophiya wira Nyuwano mwaakwakwanyule otene ale an'honona elapo ya vathi''. ¹⁹ Vano empa ya Muluku, eri wirimu, yahitthukuliya ni nivuku noowatana Nawe nahowehiya n'hina mwa empa. Tjahikhuma itari, onyakula, overunya, etetere ni epula yintji ya maluku.