¹ Vaholo waya, ahukhwa mwene Amoni: Ni khurantteliya ni mwanawe ihaniya Hanuni. ² Ni Davidi khwira: Miyo kintthuna ompankela tjorera Hanuni mwana a Nahaxi, ntoko tjkirelalyaya atithi awe. Ni Davidi aharuma arumeyi awe orwaa ommaliha w'okhweliya n'atithi awe. Nto arumeyi awo waphiyalyaya elapo y'atthu Amoni, ³ Makhulupale a elapo yeyo yahun'himerya Hanuni pwiy'aya: Davidi voveleliheryaweni arumeyi awe mupuwela wira ontthuna woomaliha vakhweliyanyu wala wattittimiha atithinyu? Davdi kharumale arumeyi awe wira ehottele elapo etjuwele orattene numala awe ontuphela? ⁴ Nave Hanuni ahavara arumeyi awe Davidi, ni ahumettha ereru aya ephantti emotja, ahukhera tjowara tjaya eriyari mpakha muyununi, numala ahahokoloxerya ottuli. ⁵ Davidi watjuwelalyawe etthu ela, aharuma atthu orwaa watthamakela, okhala wira arumeyi awe awo yahuliya muru; ni mwene khuruma wahimerya: Mwakhale oYeriko mpakha omelela ireru tjinyu, numala n'hokoloweke. ⁶ Atthu Amoni watjuwelalyaya wira Davidi anaviruwela ventji, yahalattula anakhotto oliviya khuwaa atthu Arami, ikonto miloko minli, ekhumaka oBethi-Rehobi, ni oZoba: ni mwene oMaka ahaveleliha anakhotto ekonto emotja, atthu oTobo yahaveleliha atthu ikonto muloko ni pinli. ⁷ Davidi watjuwelalyawe etthu ela, ahunruma Yowabi n'anakhotto awe othanliya orwaa wavirikanya. ⁸ Atthu Amoni yahukhuma mwinttettheni, khwilikanyiherya ekhotto oholo wa muttetthe aya: nto Arami oSoba, ni oRehobi, ni oTobi, ni oMaaka, yahuthatana mmathalani. ⁹ Yowabi ahona wira ahana owana oholo ni ottuli wawe, ahatanla anakhotto awe ororomeleyexaa w'Israyeli khwathata yavirikanyeke atthu Arami. ¹⁰ Ahunruma Abixayi munnawe wahola anakhotto akina, avikanyihaka atthu Amini. ¹¹ Ni ahun'himerya wira: Atthu Arami yatthunaka okiwerya, nyuwo nwe nkikhaliherye; ni atthu Amoni yuweryakani nyuwo, miyo kinawa wukhaliheryani. ¹² Mwilipihe, niwaneke n'uwali niwopole atthu'ihu, ni mittetthe tja Muluku'ihu: Ni APWIYA enipankele tjintthunaya. ¹³ Yowabi, n'anakhotto awe, yahatuphela atthu Arami; nto awo khutthyawa oholo wawe. ¹⁴ Atthu Amoni, vawonalyaya atthu Arami etthyawaka, yawo-tho yahutthyawa oholo w'Abixayi, khukela-tho mwinttettheni. Ni Yowabi n'atthu Amoniahuhiya ekhotto khuhokolela oYerusalemu. ¹⁵ Nto atthu Arami yonaka wira yahuweriya n'atthu a Israyeli, yahathukumanya anakhotto. ¹⁶ Hadadezeri, aharuma anamutthaka orwaa wathukumanyiha atthu Arami yakhala ekhopela ya muro Eufrate, atthu awo yahuthukumana oHelami, aholiyaka ni Xobaki nkhulupale anakhotto a Hadadezeri. ¹⁷ Davidi watjuwelalyawe etthu ela, ahathukumanya atthu otene a Israyeli, alapuwaka muro Yordani khuphiya oHelami: atthu Arami yahuthatana oholo wa Davidi, ni khuntuphela Davidi owo. ¹⁸ Nto yahuwotjela atthu a Israyeli: ni Davidi n'atthu awe ahinva ikhavalo tj'Arami, miloko miloko mithanu na minli tjapurula ikaro, ni anakhavalo ikonto miloko mitjese: yahumwinva-tho Xobaki nkhulupale anakhotto owo khukhwela vavo. ¹⁹ Mamwene otene yanrumela Hadadezeri, vonalyaya wira yahuweriya, natthu a Israyeli, yahuvarana miyono ni eyano khupanka murettele n'atthu a Israyeli, enarumela yawo; ni okhuma vavale yahuwova atthu Arami yahotjela wakhaliherya-tho atthu Amoni.