¹ Djeso adasiya mbuto ineyo atchienda mutunhu waDjudeya, cunza kwa ludzi raDjorodani; futi mbumba idauya cuna Iye patswa. Iye akawa pfunzisa, ninga zvacudjaira. ² Wafansisi wada fedzera Wada mubvunzisa:" Zvida tenderwa cuna mamuna alambane na mucadzi watche?" ³ Iye adadaira:" Ntswanyi zvida cutumirani Mosisi. ⁴ "Iwo wadalanga:" Mosisi adatendera cuna mamuna anembe tsamba lacu lacumbana, napenepo, analamba mucadzi ." ⁵ Djeso, napenepo, ada wabvunza: " Nathangwe yacuoma moyo kwanu ndipo Mozisi adanemba mutemo uyu. ⁶ Apo, cubuda pacutoma kwaculonziwa, Mulungu adawaita mamuna namucadzi'. ⁷ "Nathangwe lineri mamuna anadzasiya bambo watche namai watche apo atchidzabatana namucadzi ⁸ futi wairiwo wanadzakala nyama yibodzi. Nadyali hawatchasi wairi, apo ndinyama yibodzi. ⁹ Napenepo, zvida bataniza Mulungu, munhu hazvimwazi". ¹⁰ Pawo iwo wakali cumui, wapfunzi wada Mubvunzazve nathange lazvinezvi. ¹¹ Iye adawabvunza: " Wense uyo analamba mucadzi watche atchilora unango, ninga alicuita umhombwe. ¹² Angati iye alambana namamuna watche atchiloriwa na mamuna unango, iye ananga aita umhombwe". ¹³ Wada Muisira wana wawo cuti awakuye, apo wapfunzi wakawaemesa. ¹⁴ Patche Djeso adaona izvi, adakala wacu nyangalirwa, adawabvunza: " Lecani wana wauiye cuna Ine musawalambize, nathangwe uculu waMulungu nkwawo udaiyambana nawo. ¹⁵ Tchaditchadi ndinacubvunzani: Wense uyo hatambiri uculu waMulungu ninga mwana, tchipo hadzahupindi" . ¹⁶ Napenepo, Iye adabata wana mumanza Iyatche adawacombolera atchitsanzica manza cuna iwo. ¹⁷ Patche Iye adaenderera nanjira Iyatche, mamuna mubodzi adauya atchithamanga, adagodama pamberi Patche adabvunza: "Mudziwisisi Wacudeca, ntchanyi tchangu ndiite cuti ndiwone nhaca yaculalama kwenda nakwenda?". ¹⁸ Djeso adamudaira: Thangweranyi ucundidaidza wacudeca? Hapana wacudeca, cunza kwaMulungu. ¹⁹ Iwe unadziwa mitemo: Ausadzaulai, ausadzaiti umhombwe, ausadzabi, ausadzapasi umboo wacuphwata, ausadzaiti umbava, kodza bambo waco namai waco." ²⁰ Adalanga mamuna: "Mudziwisisi, zvense zvinhu izvi ndida zviteerera cubuda nditchiri djaha". ²¹ Djeso adalingisa cuna iye adamuda, adalanga: "Tchibodzi tchiricucuchotera; ndoco, uyagulise zvense zvacounazvo upase walombo, nadyali unadzakala naupfumi cudzaulu. Napenepo, ouya Unditeere." ²² Apo mamuna, adanyangalirwa napfala lineri, adabuda adatsvoma thangwe akana zvinhu zvacuwanda. ²³ Djeso adalingisa mumakundu futi adalanga cuna wapfunzi Watche: "Ninga zvidachupa wacudala wapinde cuuculu waMulungu!". ²⁴ Wapfunzi wadakala wacudzuma namasoco Iyatche. Apo, Djeso adawabvunza atchiphindazve: "Wana, ninga zvidachupa cupinda mu uculu waMulungu! ²⁵ Zvidadonha maningi kamela ibodzi cupinda napabuli la nsingano, panacuti mamuna apinde mu uculu waMulungu". ²⁶ Iwo wadakala mutchidzumo wadabvunzana woka-woka: "Apo, mbani angadza ponesiwe?". ²⁷ Djeso adalinga cuna iwo adalanga: "Cuna munhu zvidachupa, apo cuna Mulungu hazvina. Thangwe zvense zvinhu zvinakwanisica cuna Mulungu." ²⁸ Petulu adatoma Cumubvundza: "Onani ifepano tidasiya zvense cumasure titchiCuteerani." ²⁹ Djeso adadaira: "Tchaditchadi ndicucubvundzani, hapana iye adasiya nyumba, wabale, wasancazi, mai, bambo,wana napansi nathangwe langu futi napfala Langu ³⁰ cuti hatambiri tchuru nazvinango zvacuwanda, tchintchino mudzico lino, nyumba, wabale, wasancazi, wamai, wana, maminda, nacuzondiwa; mudzico linadzauya, culalama kwenda-nakwenda. ³¹ Apo wazinji wacutoma watchadzakala wacunkomo, futi wacunkomo watchadzakala wacutoma." ³² Iwo wakali munjira, watchikwira cuDjerusalema, futi Djeso akaenda pamberi pawo.Awo wakaMuteera wakadakala wacudzuma. Djeso adadaidza kumi nawairi pakundo patswa, adatoma cuwabvunza zvitchaitica cuna Iye pangani idocodoco iricuteera: ³³ "Tetecani tiricukwira kwenda cuDjerusalema Mwana Wamunhu atchaperekiwa cunawaculu wawapfunzisi futi nacuna wanembi. Iwo watchadza Mutongera cufa watchadza Mupereca cuna mahedeni. ³⁴ Watchadza Musingirira, watchadza Mupfirira, watchadza Munera futi watchadza Mu ulaiya. Apo pacupinda nsicu zitatu, Iye atchadzamuca." ³⁵ Tiago naJuwau, wana waZebedeu, wadauya cuna Iye wadalanga: "Mudziwisisi, tiricuda cuti mutitendere zvathu tina Culombani." ³⁶ Iye ada wabvunza:"Mucuda cuti ntchanyi Ine dinga cuitireni?". ³⁷ Iwo wadadaira:" Titendereni cukala na Tchangamire mu cucudziwa Kwanu, mubodzi cumadyo Kwanu mubodzi cubvwere Kwanu." ³⁸ Napenepo Djeso adawadaira: "Hamuli cudziwa zvanu muculomba. Imwe munakwanisa cumwira ndico iyangundinamwira, na cupirira batizo langu ndina batiziwa nalo?". ³⁹ Iwo wadaMudaira: "Ife tina kwanisa". Adawabvunza Djeso: "Pa ndico Iyangu ndinadzamwira, imwe munadzamwirawo. Futi cubatiziwa Kwangu ndinadzabatiziwa naco, imwembo basi munadzabatiziwawo. ⁴⁰ Apo handikwanisi cusankula cuti mbani anadzakala cumadyo kwangu cana cubvwere kwangu, apo nswa awo wadadonzerwa zvenezvi". ⁴¹ Pawo wenango kumi wapfunzi wadabva izvi, wadakala wacu nyangalirwa cuna Tiago naJuwau. ⁴² Djeso adawadaidza cuna Iye atchilanga: "Imwe hamudziwi awo cuti wada tchilemera cuna watongi wamahedeni wali cuwacunda, wanansimba cuna iwo futi wanawatonga. ⁴³ Napenepo ngapaleke cuitica dyano pacati panu. Uyo anada cuzvicuza pacati panu, ngakale nyabasa wanu, ⁴⁴ uyo anada cukala pacutoma pacati panu ngakale bitchu lawense. ⁴⁵ Nathangwe Mwana Wamunhu hana cuya cuti asewenzerwe, apo cuti asewenzere futi na cupasa culalama Kwatche mucu bvunurira wazinji." ⁴⁶ Futi wada uya cuDjerico. Atchibuda Djeso muDjerico na wapfunzi Watche nambumba yikulu, mamuna mubodzi akadaidziwa Batulumeu, mwana wa Timeu, lombe akali phofu, akadakala mumherera mwa njira . ⁴⁷ Iye atchibva cuti akali Djeso, WamuuNazareta, cuti ali cuswica, adatoma cukuwa atchilanga: "Djeso, Mwana wa David, itirani nsisi cuna ine!" . ⁴⁸ Wazinji wadamutuca futi watchimubvunza cuti awatame. Napenepo iye akapindirira cukuwa: "Mwana wa David, itirani nsisi cuna ine!". ⁴⁹ DJeso adaema adawabvunza cuti wamudaidze. Napenepo wadadaidza phofu, watchilanga: "Chingirira! Muca! Iye alicucudaidza". ⁵⁰ Iye adathusa cunza tchikweche tchatche, adamuca nacuthatha adauya cuna Djeso. ⁵¹ Djeso, adamudaira, adalanga: "Tchanyi tchaco ulicuda cuti Ine ndicuitire?". Phofu lida Mudaira "Mudziwisisi, ndiricuda cuti ndikwanise cuona". ⁵² Djeso adalanga: "Ndoco, cunyinda kwaco kwacuomesa".Tchilipo-lipotcho, iye adatambira cuona kwatche futi Adamuteera munjira.