¹ Kisha Ayubu akajibu na kusema, ² "Sikilizeni hotuba yangu kwa makini, hii na iwe faraja yenu. ³ Nimeteswa, lakini pia nitasema; nikisha kusema, endeleeni kudhihaki. ⁴ Lakini kwangu mimi, malalamikio yangu ni kwa mtu? Kwa nini nisiwe mwenye subira? ⁵ Nitazameni na mshangae, nanyi wekeni mkono wenu midomoni mwenu. ⁶ Ninapoyafikiria mateso yangu, ninaumizwa, mwili wangu unaogopa. ⁷ Kwa nini waovu wanaendelea kuishi, wanazeeka, na kuwa na uwezo katika madaraka? ⁸ Wazao wao wanathibitishwa mbele zao, na uzao wao unaimarika machoni pao. ⁹ Nyumba zao ziko salama mbali na hofu; wala fimbo ya Mungu haiko juu yao. ¹⁰ Dume lao la ng'ombe linazalisha; halishindwi kufanya hivyo; ng'ombe wao anazaa na hafishi ndama wake akiwa mchanga. ¹¹ Wanawapeleka wadogo wao kama kundi la kondoo, na watoto wao hucheza. ¹² Wanaimba kwa tari na vinubi na hufurahi kwa muziki na zomari. ¹³ Wanatumia siku zao katika mafanikio, na wanashuka kuzimu kwa utulivu. ¹⁴ Wanamwambia Mungu, 'Ondoka kwetu kwani hatutaki ufahamu wowote juu ya njia zako. ¹⁵ Mwenye enzi ni nani, hata tumwabudu? Tutafaidika na nini tukimwabudu? Tutapata faida gani ikiwa tutamwomba? ¹⁶ Tazama, je mafanikio yao hayamo katika mikono yao wenyewe? Sina cha kufanya na ushauri wa waovu. ¹⁷ Mara ngapi taa za waovu huzimwa, au kwamba majanga huja juu yao? Mara ngapi inatokea kwamba Mungu husambaza huzuni kwao kwa hasira? ¹⁸ Ni mara ngapi inatokea kwamba wanakuwa kama mabua mbele ya upepo au kama makapi yanayopeperushwa na dhoruba? ¹⁹ Mnasema, 'Mungu huweka hatia ya mtu kwa watoto wake kuilipa.' Na alipe yeye mwenyewe, ili kwamba aweze kujua hatia yake mwenyewe. ²⁰ Acha macho yake yaone uangamivu wake mwenyewe, na acha anywe gadhabu ya Mwenyezi. ²¹ Kwani anaangaliaje familia yake mbele yake idadi ya miezi yake inapokwisha. ²² Je kuna mtu anaweza kumfundisha Mungu maarifa kwa kuwa yeye huwaukumu hata walio juu? ²³ Mtu mmoja ufa katika nguvu zake kamili, akiwa na utulivu kabisa na kwa amani. ²⁴ Mwili wake hauna uhitaji, na kiini cha mifupa yake ina unyevu na afya njema. ²⁵ Mtu mwingine ufa kwa uchungu wa nafsi, bila kujifurahisha kwa jambo lolote jema. ²⁶ Wanazikwa kaburini wote kwa pamoja, funza wanawafunika wote. ²⁷ Tazama, nayajua mawazo yenu, na jinsi mnavyotaka kunikosesha. ²⁸ Kwa kuwa mwasema, 'Iko wapi sasa nyumba ya mwana wa mfalme? Liko wapi kao alipokaa mwovu?' ²⁹ Je hamjawauliza wasafiri? Hamfahamu wanavyoweza kusema, ³⁰ kwamba mwovu anaepushwa na siku ya shida, na kwamba anawekwa mbali na siku ya gadhabu? ³¹ Ni nani atakaye ituhumu siku ya mwovu mbele yake? Ni nani atakayemwadhibu kwa alichokifanya? ³² Hata hivyo atapelekwa kaburini; watu wataliona kaburi lake. ³³ Udongo wa bondeni utakuwa mtamu kwake; watu wote watamfuata, hata kuwe na watu wengi mbele yake. ³⁴ Ni jinsi gani basi mtanifariji bila kufikiri, kwa kuwa majibu yenu hayana lolote ila uongo?"