¹ Nimechoka kuishi; Nitanena wazi manung'uniko yangu; nitasema kwa uchungu wa roho yangu. ² Nitamwambia Mungu, 'Usinihukumie makosa; nionyeshe sababu za wewe kunilaumu mimi. Je ³ ni vizuri kwako wewe kunionea mimi, kudharau kazi ya mikono yako wakati unafurahia juu ya mipango ya waovu? ⁴ Je wewe una macho ya kimwili? Je wewe unaona kama mtu aonavyo? ⁵ Je siku zako ni kama siku za wanadamu au miaka yako ni kama miaka ya watu, ⁶ hata ukauliza habari za uovu wangu na kuitafuta dhambi yangu, ⁷ ingawa wewe wafahamu mimi sina kosa na hapana mwingine awezaye kuniokoa mimi na mkono wako? ⁸ Mikono yako imeniumba na kunifinyanga kwa wakati mmoja nawe kunizunguka, hata hivyo unaniangamiza. ⁹ Kumbuka, nakuomba, ulivyonifinyanga kama vile udongo; je utanirudisha mavumbini tena? ¹⁰ Je wewe hukunimimina kama maziwa na kunigandisha mfano wa jibini? ¹¹ Umenivika ngozi na nyama na kuniunganisha pamoja kwa mifupa na misuli. ¹² Wewe umenizawadia mimi uhai na ahadi ya upendeleo na usaidizi wako umeilinda roho yangu. ¹³ Hata hivyo mambo haya uliyaficha moyoni mwako - nafahamu kwamba hivi ndivyo ufikirivyo: ¹⁴ kuwa kama nimefanya dhambi, wewe utaizingatia; hutaniachilia na uovu wangu. ¹⁵ Kama mimi ni muovu, ole wangu; hata kama ni mwenye haki, sitaweza kuinua kichwa changu, kwa kuwa nimejaa aibu na kuyaangalia mateso yangu. ¹⁶ Kama kichwa changu kikijiinua chenyewe, waniwinda kama simba; tena wajionyesha mwenyewe kuwa ni mwenye nguvu kwangu. ¹⁷ Wewe unaleta mashahidi wapya dhidi yangu na kuzidisha hasira zako dhidi yangu; wanishambulia na majeshi mapya. ¹⁸ Kwa nini, basi, ulinitoa tumboni? Natamani ningekata roho na ili jicho lolote lisinione. ¹⁹ Ningelikuwa kama asiyekuwepo; ningelichukuliwa kutoka tumboni mpaka kaburini. ²⁰ Je si siku zangu pekee ni chache? Acha basi, usinisumbue, ili kwamba nipate kupumzika kidogo ²¹ kabla sijaenda huko ambako sitarudi, kwenye nchi ya giza na kivuli cha mauti, ²² ni nchi ya giza kama usiku wa manane, nchi ya kivuli cha mauti, isiyokuwa na mpangilio, ambayo nuru yake ni kama usiku wa manane.'"