¹ Daudi alipokuwa amekwenda kitambo juu ya kilele cha kilima, Siba mtumishi wa Mefiboshethi akaja kumlaki akiwa na punda wawili waliokuwa wamebeba vipande mia mbili vya mikate, vishada mia moja vya mizeituni, vishada mia moja vya tini na mfuko wa ngozi uliojaa mvinyo. ² Mfalme akamuuliza Siba, "Kwa nini umeleta hivi vitu?" Siba akajibu, "Punda ni kwa ajili ya familia yako kupanda, mikate na matunda ni kwa ajili ya matumizi ya askari wako, na mvinyo ni kwa ajili ya kunywa kwa yeyote atakayezimia nyikani." ³ Mfalme akauliza, "Na mjukuu wa bwana wako yuko wapi?" Siba akamjibu mfalme, "Tazama, yeye amesalia Yerusalemu kwa maana alisema, 'Leo nyumba ya Israeli itanirudishia ufalme wa baba yangu." ⁴ Kisha mfalme akamwambia Siba, "Tazama, yote yaliyomilikiwa na Mefiboshethi sasa yatakuwa yako." Siba akajibu, "Nainama kwa unyenyekevu kwako bwana wangu mfalme. Na nipate kibali mbele zako." ⁵ Mfalme Daudi alipokaribia Bahurimu, akaja mtu kutoka katika ukoo wa Sauli, jina lake Shimei mwana wa Gera. Kadiri alivyokuwa akitembea alikuwa akilaani. ⁶ Akamrushia Daudi mawe na maofisa wa mfalme, bila kujali jeshi na walinzi wa mfalme waliokuwa kulia na kushoto mwa mfalme. ⁷ Shimei akalaani, "Nenda zako, toka hapa, mwovu wewe, mtu wa damu! ⁸ Yahwe amelipa yote kwa ajili ya damu ya familia ya Sauli, ambaye unatawala badala yake. Yahwe ameweka ufalme katika mkono wa Absalomu mwanao. Na sasa umeangamia kwa kuwa wewe ni mtu wa damu." ⁹ Ndipo Abishai mwana wa Seruya, akamwambia mfalme, "Kwa nini mbwa mfu anamlaani bwana wangu mfalme? Tafadhali niache niende nikamwondolee kichwa chake." ¹⁰ Lakini mfalme akasema, "Nifanye nini nanyi enyi wana wa Seruya? Pengine ananilaani kwa kuwa Yahwe amemwambia, 'Mlaani Daudi.' Nani sasa awezaye kumwambia, 'Kwa nini unamlaani mfalme." ¹¹ Hivyo Daudi akamwambia Abishai na watumishi wake wote, "Tazameni, mwanangu aliyezaliwa kutoka katika mwili wangu anatafuta uhai wangu. "Si zaidi sana mbenjamini huyu akatamani anguko langu? Mwacheni alaani, kwa maana Yahwe amemwamuru kufanya hivyo. ¹² Huenda Yahwe akaangalia taabu iliyonijia, na kunirudishia mema kwa jinsi nilivyolaaniwa leo." ¹³ Hivyo Daudi na watu wake wakaendelea njiani wakati Shimei kando yake ubavuni mwa mlima, aliendelea kulaani na kumrushia mavumbi na mawe huku akienda. ¹⁴ Kisha mfalme na watu wake wote wakachoka, na akapumzika wakati wa usiku walipopumzika wote. ¹⁵ Absalomu na watu wote wa Israeli waliokuwa pamoja naye wakaja Yerusalemu na Ahithofeli alikuwa pamoja naye. ¹⁶ Ikawa Hushai Mwarki, rafiki yake Daudi, akaja kwa Absalomu, naye akamwambia Absalomu, "Mfalme aishi daima! mfalme aishi daima." ¹⁷ Absalomu akamwambia Hushai, "Je huu ndio utiifu wako kwa rafiki yako? Kwa nini haukwenda pamoja naye?" ¹⁸ Hushai akamwambia Absalomu, "Hapana! badala yake, yule ambaye Yahwe, watu hawa na watu wote wa Israeli wamemchagua huyo ndiye nitakaye kuwa upande wake na ndiye nitakaye kaa naye. ¹⁹ Kwani ni nani ninayepaswa kumtumikia? Je sipaswi kutumika mbele za mwana wake? kama nilivyotumika mbele za baba yako ndivyo nitakavyofanya mbele zako" ²⁰ Kisha Absalomu akamwambia Ahithofeli, "Tupe shauri lako kuhusu tunachopaswa kufanya." ²¹ Ahithofeli akamwambia Absalomu, "Nenda kwa masuria wa baba yako aliowaacha kutunza kasri, na Waisraeli wote watasikia kwamba umekuwa chukizo kwa baba yako. Kisha mikono ya wote walio pamoja nawe itatiwa nguvu." ²² Hivyo wakasimamisha hema kwa ajili ya Absalomu juu ya kasiri na, Absalomu akalala na masuria wa baba yake mbele za Israeli wote. ²³ Nyakati hizo ushauri aliokuwa akitoa Ahithofeli ulikuwa ni kama mtu anavyosikia kutoka katika kinywa cha Mungu mwenyewe. Hivyo ndivyo jinsi ushauri wa Ahithofeli ulivyoonekana kwa Daudi na Absalomu.