¹ Kainyoo naijao olarrabali nyoo nayau larrabali atua ntae? Aa mera ng’uarat inyi naara tiatu ntae? ² Ing’uarnguara kake mitumutumu toki, iriara metua to lom, kake midimidimi atum. Ntaaii alarrabal niarara, kake miatata toki amu miomonunu. ³ Enaa iomonunu, kake mitumutumu amu iomonunu te nkoitoi torrono, pee iaasiesie noo ng’uarat inyi. ⁴ Intae loololoito, miyiololo ajo tiniaku olchore le nkop, naa irra olmang’atinta le Enkai? Kake oloiyiu neauku onchore le nkop, nietaa kewan olmang’atinta le Enkai. ⁵ Enaa ijojo keiroro irking’erot enemesipa ootejo, kore ina kiang’et natipika Enkai atua yiook keeta olom too ng’uarat o sesen? ⁶ Kake keisho empiris sapuk, amu kejo sirat eany Enkai loo wuasa neisho empiris loobor. ⁷ Entoming naa Enkai, erisha oloirirua naa kekuet ninye ailany ntae. ⁸ Tinyikaki Enkai pee kinyikaki sii ninyi, entukuo nkak inyi ntae laing’okok, entisinya itanja linyi ntaee loo ing’ashng’ash. ⁹ Esinanuoto, ninchirichir, nibuakuku, aishirr, Enchoo enkuenia inyi metaa enkishirata niaku eng’ida inyi enkimuntut. ¹⁰ Entadou ate te kue olaitoriani pee eilepie ninyi ntae. ¹¹ Emisukenya maate lalashera laanei amu kore ilo osukeny olalashe lenye enaa enguanare olalashe lenye, nkitanapat esukeny, aa ninche enguanare, amu tininguanare nkitanapat neaku mirra oloibungita nkitanapat kake itaa olaing’uanare. ¹² Obo ake olaishooroni loo nkitanapat o ladung’ani le nkinguana naa ninye oidimm aitajeu enaa ainyela. Keng’ai ira iyie oing’uanary olalashe lino? ¹³ Shomo taata, kake ijojo ntae kore taata enaa taisere kipo ajing enkanasa naje o naje, nikitoni teinie olari, nikimirisho kunyangisho omatum dupoto. ¹⁴ Kake miyiololo ntae enaasii taisere, kainyoo enkishui inyi? Amu kore ntae naa labur ake ailioi tendorp niminimini. ¹⁵ Apal nijojo kore enyorr enaa ejo Enkai nikias ena oene. ¹⁶ kake aing’idada to lwuasa linyi naa kore ina ng’ida pooki naa torrono. ¹⁷ Naa kore oloiyiolo ataasa supati nemeas eng’oki ina te niye.