¹ Nkera ainei kutiti, aigeroki ntae peyie miasas ng'ok. Kake teneas ltung'ani ng'oki nikiata lomitu iyiook te Papa na Yesu Kristo loo sipat. ² Ninye olkipoket loo ng'ok ang, neme nkunaang' kake ene nkop pooki. ³ Naa tena kintisip aajo ikiyiolo ninye, nikimbung' nkitanapat enyena. ⁴ Kore olojo, kayiolo nanu ninye kake nemeibung' nkitanapat enyena, naa olmonkoi ilo nemetii sipata atua ninye. ⁵ Kake kore pooki ng'ae oibung' rorei lenye naa ti atua ninye eitabayioki enyorrata e Nkai. Te inia kintisip inchere kitii yiook atua ninye. ⁶ Kore olojo keton tiatua ninye neishiaakino peyie elo anaa apa neikunari ninye. ⁷ Lanyorr lainen, mme enkitanapa ng'ejuk aigeroki ntae, kake enkitanapata musana niatata apake niatata te nkiterunoto. Kore ina kitanapata musana naa ilo rorei lindipa aatoning'. ⁸ Aigeroki ntae nkitanapata ng'ejuk rorei le sipata tiatua ninye o tiatua ntae, amu etogiroiyie e naimin nelotu ewong'an nasipa. ⁹ Tenejo ltung'ani ketii atua ewong'an kake neiba olalashe naa ketii ninye atua enaimin o taata. ¹⁰ Naa kore olonyorr olalashe lenye neton ewong'an tiatua ninye. Kore tiatua ewong'an nemeetae entoki narruesh ninye. ¹¹ Kore oloiba olalashe lenye netii atua enamin, nelo te nkoitoi e naimin; kake meyiolo enkalo naloito te nkaraki eikeno enaimin nkonyek enyena. ¹² Kaigeroki ntae nkera ainen kutiti te nkaraki etapalakaki ntae ng'ok inchi te nkarrna enye. ¹³ Kaigeroki sii ntae lpayiani te nkaraki niyiololo ilo apake otii te nkiterunoto. Naigeroki ntae lbarrnot te nkaraki itimirishote amirr oloirirua. Kaigeroki ntae nkera amu iyiololo Papa. ¹⁴ Kaigeroki ntae lpayiani te nkaraki niyiololo olotii apake te nkiterunoto, Naigeroki sii ntae lbarrnot amu iatata engolon e Nkai, neton rorei le Nkai tiatua ntae. ¹⁵ Eminyorru ake enkop o ntikitin enyena. Teneyorr ltung'ani enkop naa metii enyorrata e Papa atua ninye. ¹⁶ Kore pooki toki natii enkop, naa no sesen: eng'uarra enkiborra e nkong'u, o lwuasa le nkishui. Kore kuna pookin na meing'uaa netii Nkai kake enkop eng'uaa. ¹⁷ Keish enkop o lng'uarra lenye, kake losuj yieunoto e Nkai naa kebik ntarasi. ¹⁸ Nakera kutiti, inkatitin e nkiting'oto kuna amu elotuta loiba-Kristo e nkop, neetuo doi kumok oiba Kristo enkop taata, naa keitodolu ina ajo kitii e nkata e nkiting'oto. ¹⁹ Amu eshomo apa ninche aing'uaa yiook te nkaraki mme lkulalang' apake ninche. amu tanaa apake le sirit ang' ninche, anata eitu epuo. Naa eibalunye naa ina ajo mme lkulalang' ninche. ²⁰ Kake eidipaki aela ntae ilo Oara Sinyati, niyiololo sii ntae pookin ina. ²¹ Ne me eitu kingeroki ntae amu miyiololo sipata kake te nkaraki iyiololo. Niyiololo sii ajo meetae lejare naing'uaa sipat. ²² Ng'ae lalejani te ne me ninye oany ajo Yesu ninye Kristo? Naa ltung'ani oiba Papa neiba e Nkerai enye. V 23 Kore ilo oany Nkerai nemeeta Papa, naa kore loiruk Nkerai, neeta sii Papa. ²⁴ Naa kore ina nitoning'o te nkiterunoto, nitonini tiatua Nkerai o tiatua Papa. ²⁵ Naa ninye oisiligie yiook neishio yiook enkishui e ntarasi. ²⁶ Kaigeroki naa ntae ena amu kajo peyie melejari ntae aiminie. ²⁷ Kake entibik tiatua ina kielata nitang'amutua te ninye nimiatayieyie tipat ina kiteng'ena e likae tung'ani. Kore te nkeraki ina ilata niatata, entotoni teinia sipata nimisujsuj elejare, nitonini tiatua ninye. ²⁸ Kore taata, Nakera kutiti, entotoni ti atua ninye peiye elioi nikintieu aing'ura ninye ni mikikurru te lotunoto enye kenya. ²⁹ Kake tinikiyiolo ilo aajo loo sipat, nikiyiolou sii ajo kore ilo oas supati naa keeino te Nkai.