¹ Ngolwa biari inyanga yamberi yeyiwiki, ichuri muno, becha hung'ani, nibarera bindu biunya sing'ari biabari bahwanisie, nende bindi nebindi nibari ninabio. ² Banyola rikina niriubirwe rwanyi hurula hurina. ³ Handi bengira mukari, handi nibaranyala onyola mibiri kwa Yeso Kristo. ⁴ Husiha sididi.ngolwa bari nibarengerehasa, bichuhira bandu babiri nibemere ambi nabo muchingubo chilenya. ⁵ Handi ngabari noburi, handi nibenamia bweni bwabu huloba, bababorera, husina nimukonya mulamu mubafwa? ⁶ Auma ano lakini asingire; mwichurisie ngayalomaloma nangu ngolwa yari nasiri Galilaya. ⁷ Nabola mbu omwana womundu biyika aberesanisibwe mumahono kabandu bamabi, handi arebwe humusalaba, ne handi inyanga yohudaru yasingire. ⁸ Handi bapara mahuwa kaye kano. ⁹ Handi bafuna kurula mung'ani, handi bababorera kano koosi hubari rihumi nende mulala, nende bandi bosi badong'ere. ¹⁰ Bari Maria Magdala nende Yoana, nende Maria owari ng'ina Yakobo nende bahasi bandi abari ninabo, niabarira mahuwa kano koosi hubarumwa baye. ¹¹ Ne muhuwa kabu kano kabalolohera ngemibayo kiobubeyi, mani bahaya okasubiriraho. ¹² Pita yasingira akulu handi yeruha nachia hung'ani; handi niyema asi, yalola ingobo yaye nikonere yong'one handi yabwawo, yauka muno akamwehoreheho. ¹³ Handi baruwo babiri hubera baye inyanga yene eyo bari nibakendo ochia hulukongo lulangwa Emausi, olwari hurula Yerusalemu okenda masa kadaru. ¹⁴ Handi bari nibalolomanga alala humahuwa kan kari kehorehe. ¹⁵ Nibari basilomaloma bari bene hubene endio,Yeso mwene yasuda ambi ninabo, handi yachia alala ninabo. ¹⁶ Ne chimoni chiabwe chiari chifunihe sibanya omumanya. ¹⁷ Handi naye yababorera, namahuwa sina kamuloma lomanga alala nende huparaho mundu hu mundu, nimukenda handi nimunyorere. ¹⁸ Ne mulala hunibo, werira riaye Cleopasi, yamukalusia handi yamuborera, ewe ori mukeni mu Yerusalemu muno. Handi okorirwe bindu biehorehe chindalo chino?. ¹⁹ Handi yababorera, ne bindu sina? handi nabo bamuborera olondohana nende Yeso wanazarethi, owari nabi owari wemiluha milayi nende ihi mbosi emberi wa Nyasaye nende bandu boosi. ²⁰ Handi ngolwa bemeresi beyibini nende abaruki bamudira bamusandie hula ofwa handi bmuhome humusalaba. ²¹ Ne hwari nerisobirira mbu mwene oyo nowahanisie Israeli; ohira kano koosi, rero ninyanga yohudaru hurula bindu bino nibiehoreha. ²² Ewe nende muhasi wundi mulala hwefwe mukera nihwebwora, ababeri ichuri muno hung'ani. ²³ Handi ngabaranyorere mubiri kwaye, bafunya nibabola, mbu baluchi sifwanani sia Malaika, owababorere mbu nomulamu. ²⁴ Handi undi yosi owari nafu yachia hung'ani handi yosi yabola ario ngomuhasi yabola; naye sibamulola. ²⁵ Naye haro yababorera, eng'we basiru, handi abaurira kala mimimioyo akabanabi ababola. ²⁶ Sibiari mbu kristo asande mubindu bino, handi hunino yengire muluyari? ²⁷ Muhuchaka hurula hu Musa nende banabi boosi yababorera karia kosi akari kandikwa olondohana ninaye. ²⁸ Handi bola ambi nende olukongo, lwabari nibachiamo; ne yalolohana ngowenya osida imberi. ²⁹ Nabo bamusaba, nibabola, mbu dong'asa nafu ano; huba siurire sichiambo, ne inyanga ibwere. Handi yafukirira yachia nabo. ³⁰ Handi biha ngabiabira, yehala asi oria ninabo, yabukula mukati, handi yakuba chihabi, yakufunaka, handi yababa. ³¹ Hula awo chimoni chiabu chiafunguha, handi huniho bamumanya; ne yakora mumoni chiabe. ³² Handi balomaloma mulala humulala, mbu mioyo kiefwe husina nikirayiaha mukari, siha siabere nalomaloma nafu hungira handi katasa siha siarufunururenge mandiko? ³³ Handi basingira bosi siha silala, handi bafunya Yerusalemu, mani banyola abarumwa rihumi nende mulala nibebusisie alala, nende abandi abari ninabo. ³⁴ Nibabola, mbu omwami nobwadieri asingire, handi omulolohire Simiyoni. ³⁵ Handi babola mahuwa kehoreha hungira, handi ngolwa bamumanyasa niyaamala ofunaka mukati. ³⁶ Handi ngolwa bari nibaloma lomanga, ne Yeso mwene yari niyemere akari wabwe, mani yababorera, mbu mube nobuuluhi. ³⁷ Bari noburi handi nohwebwoga, nabapara mbu baluchi mwoyo mulafu. ³⁸ Handi yaababorera, husina nimwesandia? husina maparo mangi kasingire mumioyo kieng'we? ³⁹ Muringale mahono kange nende makulu kange, haro nesie mwene; mundireho handi mulole; hulwobera mwoyo mulafu kuuma mubiri na akumba, ngolwa mundola nindi nakwo. ⁴⁰ Handi niyamala olomaloma, yabekesia maahono kaye nende maakulu kaye. ⁴¹ Ne hulwobera sibari nibasubirira olondohana nende busangafu handi nibeparira, yababorera, muriho ne biahuria ano? ⁴² Ne bamuberesia ing'eni indehe, nende olwiha lwobuhi. ⁴³ Yabukula, handi yaria mumoni chibwe. ⁴⁴ Handi naye yababorera, chino niyechimbosi chiandamubireranga, chindalo chiandari ninang'u, mbu mahuwa kosi paka kahorerere, akandikwa mumalako kamusa, nende banabi, nende muzaburi, holondohana ninasi. ⁴⁵ Yekula oburira hwabwe, mbu bamanye mandiko. ⁴⁶ Handi yababorera, kandi kwa nandi mbu Kristo yahasandisibwe, handi yasingire orula mubafu inyanga yohudaru;. ⁴⁷ Handi mbu hwekaluhania nende sirehero sia mabi siyera huyalwe murira riaye musialo siosi, nabachakira Yerusalem. ⁴⁸ Nangu mwabe baloli mumahuwa kano. ⁴⁹ Handi mulola, nduma rilakaniro ria lara hweng'we; ne mwihale mutauni ya Yerusalemu, hula murumbisibwe namani hurula akulu. ⁵⁰ Yabemerera hurula rwanyi hula Bethania, handi yakingola mahono kaye, handi yababa chihabi. ⁵¹ Biha nibiabira niyamala obaba chihabi, yabahamaho handi yakingwa hochia mwikulu. ⁵² Handi nabo bamulama, mani bafunya Yerusalemu nobusangafu bungi; ⁵³ Bachirira nibari mukanisa, nibamukingula handi nibaba Nyasaye chihabi. Amina.