¹ Bano ni abemeresi abe chinyumba chia bakuka babwe handi noluibulo lwa baria aba rula Babeli nasi echinyanga chio buruki bwa Omuruki Artasasta. ² Abo luibulo lwa Finehasi, Gerisomu.Abo luibulo lwa Ithamari, Danieli, Abo luibulo lwa Daudi, Hatusi. ³ Abo luibulo lwa Sekania, owa rula muluibulo lwa Parosi, Sekaria, nende alala naye baruo abasacha 150 ababalwa muluibulo lwaye. ⁴ Abo luibulo lwa Pahathi-Moabu, Eliehoenai omusiani wa Serahia handi abari naye abasacha mia chibiri. ⁵ Abo luibulo lwa Satu, Beni Yahasieli handi abari naye bali abasacha mia chidaru. ⁶ Abo luibulo lwa Adini, Ebedi omusiani wa Yonathani handi abali naye abasacha mahumi karano. ⁷ Abo luibulo lwa Elamu, Yesaia omusiani wa Athalia handi abali naye bali abasacha amahumi saba ⁸ Abo luibulo lwa Sefatia, Sebadia omusiani wa Mikaeli handi abali naye bari abasacha amahumi munane. ⁹ Abo luibulo lwa Yoabu, Obadia omusiani wa Yehieli handi abali naye bari abasacha 218. ¹⁰ Abo luibulo lwa Bani, Selomithi omusiani wa Yosifia handi abali naye bali abasacha 160. ¹¹ Abo luibulo lwa Bebai, Sekaria omusiani wa Bebai handi abali naye bali abasacha mahumi kabiri nende munane. ¹² Abo luibolo lwa Asigadi, Yohanan omusiani wa Hakitani handi abali naye bali abasacha 110. ¹³ Baria abo luibulo lwa Adonikamu becha inyuma. Kano nikari amera kaabu: Elifeleti, Yeueli, nende Semaia handi alala nabo becha abasacha amahumi kasasaba. ¹⁴ Abo luibulo lwa Bigivai, Uthai nende Sakuri handi abari naye bali abasacha amahumi saba. ¹⁵ Ndubuusia alala aba Yahudi boosi humwalo okuchia Ahava, handi hwehala ao echinyaga chidaru, ndalingalamo abandu nende amakuhani, katakario sindanyolamo oluibulo lwa Lawi ao. ¹⁶ Endio Esie ndalanga Elieseri, Nathani, Semaia, Elnathan, Yaribu, nende Elnathani nende Nathani, Sekaria, nende Mesulamu_abari abemeresi_nende hu Yoiaribu nende Elnathani_abari abaalimu. ¹⁷ Esilondaho ndabaruma hu Ido, omwemeresi eria Kasifia. Ndababolera esia bahoye babolere Ido nende abeho baye, abasumba abomuhekalu abamenya Kasifia, ako ni, ohururumira abasumba abe inyumba ya Nyasaye. ¹⁸ Endio barurumira humuhono mulayi okwa Nyasaye omusacha olwangwa Serebia, omundu omukesi. Nie yari omuibulwa wa Mahili omusiani wa Lawi wa Israeli. Yecha nende abasiani elihumi nende munane nende abasiani babu. ¹⁹ Alala naye yecha Hasabia. Barua bosi Yesaia, mulala hu omuibulwa wa Merari, nende abasiani babu nende abasiani babwe, abasacha mahumi kabiri boosi. ²⁰ Abo ababebwa ohurumiha mu hekalu, aba Daudi nende abahongo baye yabechana ohurumihira aba Lawi: 220, buri mulala hunibo ngolwa yabebwa nelira ²¹ Esialondaho esie ndalandisiria abandu ohu haya olia eria humualo kwa Ahava ohweduduyia efwe bene imberi wa Nyasaye, ohukonya eingira ikololohe hurula huniye hulwefwe, abaraga befu, nende ebindu biefu biosi. ²² Echisoni chianyamba ohusaba omuruki abeliye kata abe chifarasi ohurulinda hubasuku befu hwingira, huba hwali huboolere omuruki, 'Omuhono okwa Nyasaye wefu kuli akulu wa balia boosi abamukonya humalai katakario obunyala nende elirima biri akulu wa balia abamwibirira.' ²³ Endio hwahaya olia handi nihukonya Nyasaye hu kano, handi yaulira amalamo kefu. ²⁴ Esialondaho esie ndalobola abasacha lihumi nende babiri hurula abahongo abamakuhani: Serebia, Hasabia, nende abasiani babu lihumi. ²⁵ Esie ndabapimira ifedha, idahabu nende ebindu nende ebianua ebie einyumba ya Nyasaye ebia omuruki, abakeraki baye nende abahongo bali bagolere ebihaya. ²⁶ Endio ndabapimira mumahono kabu echitalanta 650 echie ifedha, nende echitalanta imia chie bindu bie Ifedha, echitalanta imia yei idahabu, ²⁷ Chibakuli mahumi kabiri chie idahabu alala chiari nobukusi obwe chidariki elifu ndala, nende echindoo chibiri echiali chihurirwe bilai handi chiali nobukusi nga idahabu. ²⁸ Esialondaho ndababolera, " Engwe mwalobolwa ohuba aba Yahwe, nende ebindu bino bwoosi, nende Ifedha nende idahabu buli ebianua ebiohweinia hu Yahwe, Nyasaye waba kukaefu. ²⁹ Mubilingale handi mubilinde hula mubipime imberi wa abahongo abamakuhani, aba Lawi, nende abemeresi abe chimbia chia bakuka ba Israeli mu Yerusalemu mubigoro ebie inyumba ya Nyasaye." ³⁰ Amakuhani nende aba Lawi babukula ifedha, idahabu, nende ebindu bakoobe Yerusalemu, munyumba ya Nyasaye wefu. ³¹ Hwarula humwalo kwa Ahava inyanga ye lihumi nende chibiri yomwosi okwa mberi okwohuchia Yerusalemu. Omuhono kwa Nyasaye wefu kwali nafu; yarulinda hurula mumuhono okwomusuku nende baria abekomba orubwoga hwiingira. ³² Endio efwe hwengira Yerusalemu handi hwehala eyo echinyanga chidaru. ³³ Esialondaho huinyanga yohune ifedha, idahabu, nende ebindu biapimwa munyumba wa Nyasaye wefu, mumuhono kwa Meremothi omusiani wa Uria omukuhani. Alala naye baruo Eleaseri omusiani wa Finehasi, Yosabadi omusiani wa Yesua, nende Noadia omusiani wa Binnui Omulawi. ³⁴ Obubali nende obusiro bwaburi sindu bwamanyiha. Obusiro bwoosi bwa andikwa asi ebiha ebo. ³⁵ Balala abafunya hurula mumboye, abandu abali beikame mubialo bindi, baiinia ebianwa ebiohusambwa hu Nyasaye wa Israeli: ching'ombe chiguruhi elihumi nende chibiri huba Israeli boosi, amakondi amaguruhi mahumi tisa nende kasasaba, amakondi amaraga mahumi saba nende saba, nende echimbusi echiguruhi lihumi nende chibiri oba nga esianua sio bwonono. Bwoosi biari ebianua ebiohusambwa hu Yahwe. ³⁶ Esialondaho baberesia amalako ako mwami hu abahongo abakulu abo mwami nende abemeresi mu Sialo siri Ingereha wo Luchi, handi bahonya abandu nende einyumba ya Nyasaye.