¹ Endio Omuruki Dario yagola erilako, mani nibakonya munyumba yohubiha ebindu, a bindu bari biabihwa, eria Babeli. ² Mutauni eyalindwa eya Ekibatana musialo sia Media esitabo sianyolwa; ne buno nibwandike bwayio: ³ Humwaka kwamberi okwe Omuruki Koresi, Koresi yaiinia erilako hulondana nende einyumba ya Nyasaye eiri Yerusalemu: 'Leha einyumba imbahwe handi ngori abundu yohuinia omusango,leha omuse kwayio kwaalwe, leha obulei bwayio bube mita amahumi kabiri nende saba, ne burakalafu bwayio bube mita amahumi kabiri nende saba, ⁴ nende echinyari chidaru chia amakina amahongo nende olunyari lwe emisala emiyaha, leha omurungo oko kurungwe nende einyumba yomuruki. ⁵ Harano mufunyie ebindu bie idahabu nende ifedha ebialichingi munyumba ya Nyasaye, ebia Nebukadresa yaira babeli hurula muhekalu ya Yerusalemu mani mubifunyie muhekalu iri mu Yerusalemu. Engwe mubiire munyumba ya Nyasaye.' ⁶ Harano Tatenai, omwemeresi we sialo siri ingereha wo Luchi, Sethari-Bosenai, nende abecha beng'we abali Musialo siri Ingereha wo Luchi, mubweyo! ⁷ Mulehane nende emirimo kie inyumba ya Nyasaye kibe. Omwemeresi nende abahulundu aba ba Yahudi banembaha einyumba ya Nyasaye abundu ao. ⁸ Esie ndi huiiniangia erilako mbu muholere kano abahulundu ba ba Yahudi abo abembaha einyumba ya Nyasaye: Amatongolo hurula musibihiro sio omuruki esiri ingereha wo Luchi kanehonyerwa ohurunga abasacha abo emirimo eko kira ema. ⁹ Siosisiosi esinenyihana_echingombe chiguruhi chindaga, amakondi maguruhi, amakondi maraga hulwe ebianua ebio husambwa hu Nyasaye womwikulu, eimere, omunyu, idivai, kata amafura hulondohana nende elilagiro ria amakuhani kari Yerusalemu_mubaberesia ebindu bino buri inyanga auma hukosa. ¹⁰ Muhole endio babukane olera emisango ekisangasia Nyasaye womwikulu handi balamire obulamu obwo muruki nende abasiani baye ¹¹ Esie nyiinisie erilako mbu nikali omundu yosiyosi anahaya olonda erilako ero, omusala kuna hwesua hurula hunyumba yaye handi bana mubambaho. Einyumba yaye ina kaluhanisibwa esifumi sie itakataka hulwa kano. ¹² Leha Nyasaye oholere elira riaye ohwihala omo akalule buri omuruki kata abandu abana kingula omuhono ohaya olonda erilako rino, kata ohunyasia inyumba ino eya Nyasaye eria Yerusalemu. Esie, Dario, harano nyiinia erilako rino. Leha riholwe nende amani koosi!" ¹³ Esialondaho hulwe erilako eriarumwa nende Dario omuruki, Tatenai, omwemeresi we Sialo siri Ingereha wo Luchi, Sethari-Bosenai, nende abecha babwe, bahola buri sindu esia Omuruki Dario ya lagira. ¹⁴ Endio abahulundu aba ba Yahudi bachirira asi yobufumbuli obwa Hagai omunabi nende Sekaria omuichuhulu wa Ido. Bamalirisia ebiumbahe hulondohana nende erilako ria Nyasaye wa Israeli nende hubirira erilako ria Koresi, Dario, nende Artasasta omuruki wa Uajemi. ¹⁵ Einyumba yabwa inyanga yohudaru omwosi kwa Adari, humwaka kwohusasaba okwo oburuki bwo Omuruki Dario. ¹⁶ Abandu ba Israeli, amakuhani, aba Lawi, nende ababoye abadong'a basangalira ohuikulwa ohwe inyumba ya Nyasaye nobusangafu. ¹⁷ Baiinia eching'ombe chiguruhi eimia ndala, amakondi maguruhi eimia ndala, amakondi amaraga chimia chine echio hwikula einyumba ya Nyasaye. Echimbusi chiguruhi lihumi nende chibiri chiosi chia inisibwa ngori esianua sio bwononi hu aba Israeli boosi, imbusi ndala huburi oluyia lwa Israeli. ¹⁸ Abo bosi baberesia amakuhani nende aba Lawi ohuhola nende emikanda hulwe oburumihi bwa Nyasaye oli Yerusalemu, ngolwa kandikwa musitabo sia Musa. ¹⁹ Endio abari mubialo bindi basangalira ei Pasaka einyanga ye elihumi nende chine omwosi kwa mberi. ²⁰ Amakuhani nende aba Lawi belafuiyia; boosi bari abalafu. Esialondaho babaaka emisango ekia Pasaka hulwa abo boosi abari mubialo bindi, nende abene bosi. ²¹ Abandu ba Israeli abaliaho einyama yei Pasaka bari balia abari bafunyire hurula mubialo bindi handi bari bekabule nende obumali bwe bialo bindi handi bari nibakonyanga Yahwe, Nyasaye wa Israeli. ²² Abo mubusangafu basangalira Omwimo okwo omugati kuumamo esimera huchinga saba, Huba Yahwe yali abalerere obusangafu handi yari akalule omuoyo okwo omuruki wa Asuri ohujing'ia emihono kiabu humirimo ekie inyumba, eiyumba ya Nyasaye wa Israeli.