¹ Yuda omuherwa wa Yesu Kristo, omusiani wabo Yakobo,khubenabo abalangwa, mbu,abachamwa nende Nyasaye ouli Papa, nibabikhwa khulwaYesu Kristo. ² Mana tsimbabasi nende omulembe nobuheri bimeteshe munywe. ³ Abaherwa, lwandali nendemanga mumaani okhubahandichira amakhuwa kobuhonia obuli obwefwe fwesi, kanichirisia okhu bahandichira mbu, muinganire obusubiri bwamwabasiribwa lulala abatsienukhu bo Mwami. ⁴ Khulwa okhuba khuli nende Abandu abenjira mebiswi, balia abakhalachirwa eshilaamo . Nabo abalali be eshinyasaye ta, abakalukhasinjia obukosia bwa Nyasaye khu bubi nibamuloba omwechesia khandi Omwami wefwe Yesu Kisto. ⁵ Khulwa yako ebetsusia kata olwa mumanyire kano mbu, Omwami, namalire okhubaonokosia abandu okhurula mushialo shia Misiri, olunyumakhwo, yabatibia ababula okhusubira ⁶ Abamalaika balekha obwikhalo bwabwe bwobunyali, nenibachaka obwabwe abeene, Omwami yababishira eshiboho mushirima eshikhongo shieinziayo, khu bukhalachi bwe inyanga ikhongo. ⁷ Shinga olwa Sodoma nende Gomora nende amatokho akali hakari waabo behaana munjira yobwilasi, baliho shinga eshilolero shiomuliro kweinziayo. ⁸ Nendio bano bomaloro kabwe bafwabia emibiri chiabwe ni bekana oburuchi nende okhulekha obwimirisi. ⁹ Naye Mikaeli omumalaika omukhongo nalwananga nende eshishieno khumubiri kwa Musa, shiyatsalikha omukhachira eshina shiobunyechi, habula okhuboola mbu, Omwami akhukondoshere. ¹⁰ Khandi abandu bano baboola amabii amakhuwa kabalamanyire ta, shinga tsisolo tsimbalaba , mukenako beyonoona abene. ¹¹ Woowe ! khubenabo! abachendanga khunjira ya Kaini nende okhulonda amabi ka Balaamu. ¹² Abandu bano bali shinga olwanda, hasi wamatsi tsimeli tsituyangakhwo. Shino nishio eshipala mumwikhoyo kwenywe kwobuheri nibekhoya ninenyu balisinjia halali oburi,amalesi, akabula Ifula, kachingwa eyi nende eyi nomuyeka, Emisala chie biamo biniala ne. ¹³ Biafwa khandi khabiri, chiasulwa nende emisi. Shibelinda abene ta. bali shinga lirunda lia inyanza ne lisasia abandi nebisoni. ¹⁴ Naye Enonoka, omundu wa musaafu khuAdamu yainia amakhuwa kobulakusi, Lole Omwami aletsa okhubukula abatsienukhu bebe ebikhumira ekhumi biabarume' nende malaika aberereshe. ¹⁵ Mbu akhole obuyasi khu bandu boosi nende okhuhana eshinyasio khu boosi abala mwinamiranga Nyasaye khu mirimo chiabo chiosi chiobukori echiabakholanga nibalateba Omwami Nyasaye khu makhuwa kabwe amatinyu kosi , akabakholibetsimbi, baboola khuye. ¹⁶ Abandu bano ni bamabuluulo khandi bameiniakano abechenderesinjia khu menya kabwe abeene, eminwa chiabo chiboola amakhuwa amakhongo muno, nibaheranga injeresio okhurula mubo . ¹⁷ Nenyu abaherwa itsulire abakhuwa akabolwa khale mubarume boOmwami wefwe Yesu Kristo. ¹⁸ Mbu, bamubolera tsinyanga tsiobumalirishi balibao abandu beinzesheresi, ni balonderera ameenya kabo abeene kokhufwola Nyasaye. ¹⁹ Abandu yabo nibo abareranga emikabukhano mushialo you muno butswa shibali nende roho omutsienukhu ta. ²⁰ Nebutswa enywe, abaherwa , nimwiyumbakha mu mubusubiri bwenywe obuli obutstsienukhu muno, mana musaye muroho omutsienukhu ²¹ mwilinde mubuheri bwa bwoMwami Nyasaye, lindirira ikhabi yoMwami wefwe Yesu Kristo, mbu munyale okhunyola obulamu bweinziayo. ²² Be abalayi khu boosi abali mubutinyu ²³ Mubaonokosie abandi mukhutsia mushinyasio nende omuliro kweinziayo. Mube abandu abaherereshe okhurula mutsimbi. ²⁴ Khu oyo ounyala okhubalinda mulanyola libi ta, mana abeemie imberi wobunyali bwe mubula eshikha ta. ²⁵ Oyo ouli Nyasaye omununuli wefwe muYesu Kristo, Omwami Wefwe wobunyanyali buli muye, nobukhongo, noburuchi namani okhurula inziayo okhula bulano Amina.