¹ Naye Paula nashifutsanga obufisi, niyeera abechibe boMwami, yatsia khumukuhani omukhongo, ² nasaba ibarua mbu atsie ninayo musinagogi eDameski, mbu nanyoola yesi omukhasi nomusatsa, abarere nibaboyirwe Yerusalemi. ³ Olwayali nachendanga ahambi eDameski, obulafu obukhongo okhurula mwikulu bwamwashila, ⁴ naye nakwa mafumama, nahulira omwoyo nikuboola, Saulo Saulo, mbushina usakaninjia? ⁵ Naye nareba, niwe winah Omwami? naye Omwami nakalusia, nisie Yesu wosakaninjia, ⁶ naye narenganga nende okhuhuka naboola, Omwami wenya mbu ekhole shina? naye Omwami naboola, sinjira otsie mwitokho, nawe olabolerwa eshia okhoyere okhukhola. ⁷ Nabo abandu bali ninaye nibasinjire nibabula eshiababola, bahulira omwoyo neshibalola owabola ta ⁸ Naye Saulo nabukha hasi, ne olwa yatimbula tsimonitsie shiyanyala okhulola omundu ta, natirwa omukhono niyenjisibwa eDamesko. ⁹ Khutsinyanga tsitaru shiyalola noho okhulia shiosi ta. ¹⁰ Khwali nende omwechi mulala eDamesko welira mbu Anania, naye Omwami mumalolero ,yamuboolera "Anania", naye naboola, endi hano Omwami. ¹¹ Omwami namuboolela, sinjira, otsia khumuhanda kulangwa mbu, omukololofu, khaba inzu ya Yuda, omundu ulangwa mbu Saulo wa Taso, ne lola asayaanga. ¹² ne alutsi amalolero, omundu ulangwa mbu, Anania namwitsila namurakhwo amakhono mbu anyole okhulola. ¹³ Naye Anania nakaalusia Omwami, ndakahulira ako omundu uno shinga olwa asakaninjia abasubili Yerusalemi. ¹⁴ Ne arumirwe nende obunyali okhutira bosi abarumbulanga eliralio. ¹⁵ Naye Omwami namubolera, tsia okhuba neshikholelo eshiahulwe ninasi, okhuyira elira lianje khubamahanga, nende abaruchi nende khubana baIsraeli ¹⁶ okhuba ndalamanyia shinga olwa alabirira khumakhuwa amatinyu khulwa eliira lianje. ¹⁷ Naye Anania narula natsia, niyenjila munzu, nara amakhonoke khuye naboola, omwana wefwe Saulo, Omwami, wefwe Yesu, owakhuloleshere khunjila olwa wabere niwitsanga, yarumile mbu onyale okhulola khandi, mana onyole Roho Omulafu. ¹⁸ Ne mulwangu nibirula mumonimwe ebindu shinga amakhwatari keinyeni, naye nanyoola okhulola, nasinjira nabatisibwa. ¹⁹ Naye olwa yanyoola shiokhulia, yanyoola amani, naye nabayo tsinyanga nende abechi eDamesko. ²⁰ Naye nayaala Yesu musinagogi,mbu niye omwana waNyasaye. ²¹ Nabo bosi abamuhulira nibahuka, nibaboola, shali niuno owasakaninjia balia abalanganga khulira liomwami Yerusalemi khandi yetsile hano mbu anyale okhubatiira nokhubayira khubakuhani abakhongo. ²² Naye Saulo natsirira mubunyali, nababolera abaYahudi baYerusalemi, mbu niye Kristo. ²³ Ne olunyuma lwetsinyanga tsinyinji, abaYahudi nibenya mbu bamwire. ²⁴ Ne amaparo kabwe nikamanyikha khu Saulo, nibalinda omuliango eshiro neshitere mbu bamwire. ²⁵ Nabo ebechi nibamubukula mushiro, nibamwishiria mushikapo eshiro. ²⁶ Ne olwa Saulo yoola Yerusalemi,yenya okhwiyunga nabechi, nebutswa bosi bamuria, nibalasubira mbu nomwechi ta. ²⁷ Naye Barinaba namubukula namuyira khubarume, nababila shinga olwa yalutsi Omwami khunjira naboola ninaye, nende shinga olwa yali nayalire neitswoni Damesko khulira liaYesu. ²⁸ Naye yali ninaye okhwitsa nende okhurula Yerusalemi. ²⁹ Naboola neitswoni mulira liaNyasaye, nayingana nende abageresi, nabo nibekomba okhumwira. ³⁰ Okhuba olwa abaherwa bahulira, bamurera Kaiseria, nabamuruma Taso. ³¹ Ne amakanisa kosi nikaba nobuhulushi, Yudea, Galilaya nende Samaria, nikatinyibwa, nikachenda muburi bwaNyasaye, nibatinyibwa nende Roho Omulafu, nikametekha. ³² Naye olwa Saulo yabura tsingongo tsiosi tsine, yolera abaherwa bamenya Lida. ³³ Nanyolayo omundu walangwa mbu Ainea,owali yekhala khushitanda emiaka munane niyafwokoya. ³⁴ Naye Petero namuboolera Ainea, Yesu Kristo akhukhola ochende, sinjila okasie eshitanda shio, naye nasinjira lwangu, ³⁵ nabo bosi abamenya Lida nende Sironi nibamulola nibamukalushira Omwami. ³⁶ Nayo Joppa khwaliyo nende omwechi undi owalangwa mbu Tabitha, naye niye Dorika mukhukalukhasia, owali nende ebikhole ebilayi biobukhonyi. ³⁷ Naye yalwala mutsinyanga tsienetso nafwa, olwabali nibamwosiye nibamura mushikoro shiekulu. ³⁸ Okhuba Lida yali ahambi nende Jopa,nabo abechi nibahulira mbu Petero yaliyo, bamurumira abandu babiri, nibamusaaya mbu yetse lwangu. ³⁹ Naye Petero narulanatsia ninabo, nibamuyira mushikoro shieyikulu, mana abalekhwa bosi nibasinjira, nibamanyisia tsingubo etsia yabanabiranga olwa yali omulamu. ⁴⁰ Naye Petero nabara bosi imbeli, nasikama hasi nasaaya, nashukhanira omubiri, naboola Tabitha, buukha, naye natimbula tsimoni, naye olwa yaloola Petero, yekhala hasi. ⁴¹ Naye namutira omukhono, namuchingula ikulu, nabalanga abasubiri nende abalekhwa, namuhana khubo. ⁴² nikamanyikha mushialo shiosi Joppa, abanji nibasubira Omwami, ⁴³ naye namenya tsinyanga tsinyinji Joppa nende Simioni wamasero.