¹ Naye omukuhani omukhongo nareba, "amakhuwa kano kali kario"? ² Stefano naboola, "abaherwa, banabefwe, abechesi nende baPapa, murecheresie, Nyasaye wobukhongo yamuloleshera Papa wefwe Aburahamu, olwa yali Mesopotamia, nashili okhumenya Harani. ³ Naye namuboolera, rula mubandubo, mushialo shio, witse mushialo eshiandala khumanyia'. ⁴ Naye narula mushialo shiaBakalidayo, namenya Harani, naye narulayo olwa samwana yafwa, niyetsa mushialo shino ewabulano khumenyanga. ⁵ Naye shiyamuheresia obulaame bwosi ta, kata habundu ahaara eshirenje ta, naye namulaka mbu alimuheresia shinga omukabokwe nende olwibulolwe, kata olwa yali nabula Omwana. ⁶ Naye Nyasaye naboola mubumanyirisibwe mbu, olwibulolwe lwakhabe olucheni mushialo shindi, nibakholwa abasumba, nibabasakania khumiika imia. ⁷ Nasi ndakhayasie lihanga elo, eliakhasakanie,nabola Nyasaye, nolunyuma balitsa okhunyinamira habundu hano. ⁸ Naye nabalaka indakano yeshishebo, kho Aburahamu niyebula Isaka, namusheba inyanga yomunane, naye Isaka niyebula Yakobo, naye Yakobo niyebula, tsinzu ekhumi nende tsibili. ⁹ " Nabo yabo ekhumi nende babili, nibalola imbalikha, nibakusia Yusufu Emisiri, naye Nyasaye yali ninaye. ¹⁰ Naye namuhonia okhurula muminyakhano chie, namuheresia eshibalikho, nobumanyirisi mumoni tsia Farao omuruchi waMisiri, namukhola omusinjiriri weMisiri nende inzuye yosi. ¹¹ Ne khwamala nikhuba khushialo shiaMisiri nende Kanani inzala ikhongo mbu abandu nibabula shiokhulia, ¹² naye olwa Yakobo yahulila mbu khuli nende shiokhulia Emisiri, yaruma baPapa befwe. ¹³ Ne olwakhabili, Yakobo yelolesia khubana babwe, ne olwibulo lwa Yakobo nilumanyikha khuFarao. ¹⁴ Naye YusufU narumasia Samwana,nende olwibulo lwabwe,abandu tsimia tsitaru nende ekhumi natsirano. ¹⁵ Kho Yakobo yatsia namenya Emisiri, naye nafwa halala nende basefwe. ¹⁶ Nabo nibachingwa okhula shekemu, nibayabirwa mung'ani, ya Aburahamu yakula khumang'ondoke khubana baEmori samwana Shekemu, ¹⁷ Ne olwe ebise bieindakano biola, ebiaNyasaye yetsuba khuAburahamu, abandu bametekha nibetsula eMisiri. ¹⁸ Naye nabukhayo Omuruchi undi, oulamanya Yusufu ta. ¹⁹ Naye nabasakania muno olwibulo yulo, nasakania baPapa bwefwe, mbu kata nibeera abanababwe mbu baleshe okhumenya. ²⁰ Naye Musa yebulwa mutsinyanga yitso, naba omwana omulayi muno, nakhusibwa munzu wasamwana emiesi chitaru, ²¹ naye olwa yasukunwa, omukhana waFarao yamutoola, namukhusia shinga omwanawe, ²² Naye nakhula mubumanyirisi bwabaMisiri, naba omukhongo mumani nende ebikhole. ²³ Ne olwa yali emiika amakhumi kane, lietsa mumwoyokwe mbu abachenderekhwo abana babwe abayahudi. ²⁴ Olwa yalola mulala nakhupungwa, yamukhonya, niyera omuMisiri. ²⁵ Naye napara mbu abanababwe balanyala okhumanya shinga olwa Nyasaye yakhamurumushire okhubanunula, nabo shibamanya ta. ²⁶ Inyanga yalondakhwo yabatsira olwabali nibakhupananga, naye nabakabukhasia, naboola, abamii, khuli abananda, mbushina nikhupana? ²⁷ naye owali naranjire owashie namuluuma, naboola, niwina owakhukhola omukhalachi hakari wefwe? ²⁸ wenya okhunzira shinga werire omuMisiri mukoloba? ²⁹ Naye Musa olwayahulira ario, niyerukha, namenya mushialo shiaMidiani,ewayebulira abanabe abasiani babili. ³⁰ Ne olunyuma lwemiika amakhumi kane, mushitsimi shieshikulu shia Sinai, malaika koMwami kamuloleshera mumuliro mushitsakha ³¹ Naye olwa Musa yalola, yahuchisibwa nende eshia yalola, nasita ahambi mbu alole, nakwo omwoyo kwoMwami nikumulanga. ³² Nikuboola, Nesie Nyasaye wabaPapabo, Nyasaye wa Aburahamu, Nyasaye wa Isaka khandi Nyasaye wa Yakobo, kho Musa narenga, nalanyala okhulenga ta. ³³ Naye Omwami namubira, rusia ebilaro mubirenje, okhuba habundu wosinjire nahatsienukhu. ³⁴ Endutsi, eminyakhano chiabandu banje bali Emisiri, ehulire okhulira khwabwe, nasi nditsire hasi okhubahonokosia, bulano yitsa, nditsa okhuruma eMisiri. ³⁵ Musa oyo owabaloba niba bola, mbu, niwina oukhukholire omuyaasi nende omwimirisi wefwe? niye owaNyasaye yaruma okhuba omwimirisi, nende omununuli wabwe khumukhono kwaMalaika kamuloleshera mushitsakha. ³⁶ Nabarusiayo, olunyuma lwokhukhola amangalimwa amanji mushialo shiaMisiri, nende munyanza ya shamu, nende mushitsimi khumiika amakhumi kane. ³⁷ uno niye Musa owaboolera abana baIsraeli mbu, Omwami alabaheresia omulakusi shinga isie okhurula mwinywe, nenyu mulamuhulira. ³⁸ Uno niye owali mushitsimi nende Malaika owabola ninaye mushikulu shia Sinai, khandi nende basefwe abanyola obuboli obulamu nibakhuheresia. ³⁹ Owabasefwa shibamuhulira ta,nabo nibamulonda okhurula khubo, ne mumioyo chiabwe, nibakalukha eMisiri. ⁴⁰ Nibamuboolera Aroni, khukasirie eminyasaye chikhwimirire, okhuba Musa owakhurusia eMisiri, shikhumanyire eshikholeshe ninaye ta. ⁴¹ Nabo nibakasia eshimosi,nibahana omusango khumunyasaye, nibekhoyera emirimo chiemikhono chiabwe. ⁴² Naye Nyasaye nashukhana, nabalekha okhwinamira ebindu biomwikulu,shinga olwa kahandikwa mubitabu bia balakusi,' enywe Israeli, murusiriiye omusango tsisola tsisinzirwe nende emisango khumiika amakhumi kane mushitsimi? ⁴³ Mulenganga khwihema lia Moleki, nende Ing'ining'ni ya nyasaye wenywe Relifa, ebilolero biamwakasia mbu mwinamirenje, nasi ndilabachinga, injerekha waBabiloni'. ⁴⁴ "BaPapa befwe bali nende lihema liobulolli mushitsimi, shinga olwa yali niyaula, nabolera Musa, mbu, khula alikasie okhurondokhana nende omufwano kwa yalolesibwa khushikulu. ⁴⁵ Ne khandi basefwe betsa olunyuma, barerwamwo nende Yesu, okhubalimasia nabamahanga, abaNyasaye yasukuna khubweni imbeli wa baPapa befwe okhula khutsinyanga tsia Daudi. ⁴⁶ Owanyola okwiyamwa imbeli waNyasaye, niyekomba okhuba nende lihema liaNyasaye wa Yakobo. ⁴⁷ Nebutswa Sulemani yamumbashila inzu. ⁴⁸ Nebutswa Nyasaye womwikulu shamenyanga minzu yombokhwa nende emikhono chiabandu ta, shinga lwakabolwa nomulakusi. ⁴⁹ Likulu neshifumbi shianje shioburuchi, nasho Eshialo, namasenero kebirenje bianje," neinzu shina eyolanyumbashira"? aboola Omwami; noho nihabundu shina ewandalahulushira? ⁵⁰ shikali amakhonokanje akakasia ebindu biosi? ⁵¹ Enywe abandu bamakosi amomu, abalashebwa mumioyo chienywe, bulinyanga mwikaliiranga Roho mulafu, shinga olwa basenywe bakhola, ⁵² nomulakusi shina owabasenywe balasakania? ne babeera balia abetsa imbeli womulunjishi, nenyu kario mubeere abakhobi khandi abeeri, ⁵³ abanyola amalako khumukhono kwabamalaika, nibabula okhukalinda. ⁵⁴ Olwabahulira amakhuwa kano, batsunwa mumioyo chiabwe, nibaluumasia ameno khulwaye. ⁵⁵ Naye niyetsulwemwo Roho Mulafu, nahenga shirunji mwikulu, nalola obukhongo bwaNyasaye, naye Yesu nasinjire khumukhono musatsa kwaNyasaye. ⁵⁶ Naboola, lole, endola likulu nilikuushe, ne omwana womundu nasinjrle khumukhono musatsa kwa Nyasaye. ⁵⁷ Nabo nibalira khumioyo chieikulu, nibekala amarwi kabwe, nibamwirushira mubulala, ⁵⁸ nibamusukuna erwanyi welitokho, nibamukhupa amachina, nabo abakobosheri nibara tsingubo tsie mumakulu komubukha welira mbu, Saulo. ⁵⁹ Nabo nibamukhupa Stefano namachina, nalanganga Nyasaye, naboola," Omwami Yesu, bukula obulamu bwanje". ⁶⁰ Naye nakhupa amasikamo hasi, nalira nomwoyo kweikulu, "Omwami, omwami, sholababalira imbi khulwa kano ta", ne olwayali niyakhabola kano,yakona.