¹ Olwa bali nibabolaanga nabandu,abakuhani nende abasinjilili beihekalu nende abasadukayo, nibabetsera, ² nibasinyishe mbu bechesinjia abandu, nibayala muYesu obulamushi bwabafu. ³ Nibabatira nibabara mumboye okhula khunyanga yalondakhwo okhuba yali hamukoloba. ⁴ Kata kario abahulira likhuwa, basubirira, nabo bali abandu shinga ebikhumira birano. ⁵ Ne olwa kwoola mukamba, abaruchi nende, abakhulundu nende abahandichi, nende abakofu bakhung'ana halala muYerusalami ⁶ Annasi omukuhani omukhongo, nende Kefa, nende Yohana, nende Alekisanda, nende abanji beinzu yabakuhani, ⁷ bekhung'asia Yerusalemi ne olwa bali nibakhabekhasia hakari, babareeba mbu," nimumanishina, nende mulirashina, eliamukholeremwo kano?" ⁸ Naye Petero niyetsuulwe nende Roho mulafu, nababoolera, "enywe abaruchi babandu baIsiraeli, nende abakhulundu baisraeli, ⁹ nikhuba lero nikhuhengungwa khulwa likhuwa lilayi khumundu owafwokoya, mbu anyolere arie okhuhona, ¹⁰ Kamanyishe khwinywe abaruchi baisraeli mbu, nikhuliira lia Yesu Kristo wa Nazareti, owamwabamba, owaNyasaye yalamusia okhurula mukhufwa, khulwaye, omundu uno asinjire hano omulamu. ¹¹ Lino nilio lichina liabombashi baloba, nalo limalire okhuba lichina likhulundu. ¹² Neshikhuli nende obuhonia mumundu yesi ta, okhuba libulaho elira lindi hasi weliuba eliahebwa abandu eliakhunyala okhuhonibwa". ¹³ Ne olwa balola itswoni yaPetero nende Yohana, nabo nibamanya mbu shibaali nibasoma ta, bahuchisibwa, nibaboola mbu, babere nende Yesu. ¹⁴ Ne olwa balola omundu wali nahonire nasinjire ninabo, shibali nende shiababoola ta. ¹⁵ Ne olwa bali nibakhabalaka okhutsia elubeka nende eshina, barebana abene, ¹⁶ " khukholeshi khubandu bano?" okhuba toto mwene omakhuwa kokhuchenya kekholeshe khumikhono chiabwe imbeli waboosi bamenyaanga Yerusalemi, nefu shikhunyala okhukana ta, ¹⁷ nekhulwa mbu shibalasalasia likhuwa lino mubandu ta, lekha khubakaye mbu shibalabolakhwo khandi mulira lino ta", ¹⁸ mana nibabalanga nibabalaka mbu shibalabolakhwo nohomba okhwechesia mulira liaYesu ta. ¹⁹ Naye Petero nende Yohana nibakalusia, nibababoola, "nikaba nikakasira mumoni mwaNyasaye okhuhulira inywe okhushira Nyasaye, abene mukhalache. ²⁰ Okhuba shikhunyala okhulekha okhubola ebindu biakhwalutsi khandi nikhulola ta". ²¹ Olwabali nibakhabasomera Petero nende Yohana,babalekhula, nibalanyola liosi eliabanyala okhubarakhwo eshinyasio ta, shichira abandu bosi betsomia Omwami khukali nikekholeshe, ²² okhuba omundu oyo owali nahonire yali emiika amakhumi kane, ²³ Ne olwabalekhulwa, batsia khubashiabo, nibabola kosi abakuhani abakhongo nende abakhulundu bali nibababerere. ²⁴ olwabahulira yako, bachingula emioyochiabwe khuNyasaye, mubulala, nibaboola," Omwami, niwe Nyasaye, owakhola Likulu nende Eshialo, Neinyanza nende biosi ebirimwo. ²⁵ Mumunwa kwomusumbawo Daudi waboola, mbushina amahanga nikakhung'ana, nabo abandu nibapara ebindu ebikhaya?' ²⁶ 'Abaruchi beshialo, basinjira, nende abemirisi bakhung'ana halala okhumusira Omwami nende Kristowuwe.' ²⁷ Okhuba toto bosi, Herode nende Omuruchi Pilato, nende bamahanga nabandu baisraeli bekhung'asia halala khulwa okhumusinyisia omwana omutsienukhu, Yesu, owawabakha amafura ²⁸ okukhola komwoyokwo nende obuchesibwo bawamanya kalashiekholekha ta, ²⁹ Lola bulano Omwami shinga olwa bakhusinyisia, heresia abasumbabo, neitswoni baboole likhuwa lio. ³⁰ Nyiira omukhonokwo ohonie, khandi amangalimwa nende kokhuchenyia kekholeshe mulira liomwanawo omutsienukhu Yesu. ³¹ Ne olwa bali nibakhasaya, habundu wabali nibasinjire nibakhung'anire halala, harenga, nibetsusibwa nende Roho omulafu, nibaboola likuwa liaNyasaye mumani. ³² Nakwo omukanda kwosi okwabalia bali nibahulire,bali nende basubiri nende nomwoyo mulala, abulaho owaboola mbu eshindu shiosi neshishie ta, habula ebindu biali ebiabo bosi, ³³ ne mumani amanji abarume barusia obuloli khubulamushi bwoMwami Yesu, ne obukosia obunji bwali khubo. ³⁴ Kata shikhwalikhwo nende omundu yesi owalema eshindu ta, kata bosi abali nende emikunda bakusia, nibarera amakusi kabio biosi. ³⁵ Nibara hasi mumakulu kabarume, nibakabila buli mulala shinga olwa yali nakhoyere. ³⁶ Naye Yusufu, owalangwa nende abarume mbu,Barabasi likalulwa mbu ( omwana wobuhotseresi) omulawi, owokhurula Sipria. ³⁷ Yali nomukunda yakusia narera amakusi mumakulu kabarume.