¹ Ne olwa khwali nikhumalire okhuhokokha, khwamanya mbu, eshikhalachinga esho shilangwa mbu Malita, ² Abene eshialo esho nibakhulolera eshisa okhushira, okhuba babwana omuliro, nibakhwinjisia fwesi, khulwa ifula yaliho khandi omunyiri omunji. ³ Ne olwa Paulo yali natoberesinjia obukakati bwetsikhwi, Inzokha yarulamwo khulwa omuliro, niibohasia khumukhonokwe. ⁴ Ne olwa abandu ba Malita balola inzokha khumukhono kwa Paulo, babola mbu omundu uno shachweya okhuba omubii ta, shichira kata nahonokoshe munyanza obwatoto bwa Nyasaye shibumufuchirira okhumenya ta. ⁵ Naye naresia omukhono mumuliro inzokha niikwamwo nalasalirakhwo ta. ⁶ Nabo bali nibamanyire mbu alafimba kata okhukwa hasi nokhufwa, ne olwa bahenga nibalalola liosi libii nilikhola ta, bamala balukhasie mbu omundu uno nomunyasaye. ⁷ Mushialo esho chialimwo emikanda chiomundu omukhulundu owomushikhalachinga eshio owalangwa mbu, Pablio, naye yakhwinjisia nakhulinda tsinyanga tsitaru nakhukosia muno. ⁸ Naye samwana Pablio yali nakonire nalwala omurengo nokhunyalala amatsai. kho Paulo yenjira ewa yali nasaya namurakhwo emukhono namuhonia. ⁹ Olwa abandu beshikhalachinga balola eshiali nishikholeshe, barera abandu bosi abali abalwale. nabo nibahonibwa. ¹⁰ Nibakhuheresia oluyali muno, mana olwa khwarula yo, bakhumanusia biosi ebiakhwali nikhubula ¹¹ Lunyuma lwemiesi chitaru,khwarulayo muliaro lindi lia Alekisandaria, eliali mushikhalachinga eshio emiesi chiomunyiri halali liali nelira mishialo shalio mbu,abasiani bamakhwana. ¹² Mana nikhula eSiriku khwikhalayo tsinyanga tsitaru. ¹³ Nikhurula yo nikhwambukha Regio, mana olunyuma lweinyanga ndala, omuyeka kwachaka okhuutsa okhurula eSauthi, mana khunyanga yakhabili nikhuula Eperula. ¹⁴ Ebweneyo khwanyola yo abanabefwe bandi,nibakhusaya mbu khwikhaleyo ninabo tsinyanga musafu, nikhula Eroma khurio. ¹⁵ Ne abana befwe olwa baulira akefwe, barula ebweneyo nibetsa okhwakanira okhula khushiiro shia Apia nende ha Mikahawa Chitaru. ne olwa Paulo yabalola, yakhupira Nyasaye orio, nalema omwoyo. ¹⁶ Ne olwa khwenjira Roma, Paulo yafuchilirwa okhumenya yenyene nende omulindi. ¹⁷ Mana olunyuma lwetsinyanga tsitaru, yalanga abakhulundu babaYaudi mbu bakhung'ane, yachaka nababolera mbu isie, bana befwe shindakhola likhuwa liosi liokhufukula abandu nende kata ebima biabakuka befwe ta, ndahanwa mumakhono kabaRoma, nendi omuboye okhurula Yerusalemi. ¹⁸ nabo lunyuma lwokhunoona, benya mbu bandeshe, shichira shibanyola eshifune mwisie eshichira banzire ta. ¹⁹ Ne olwa abaYaudi bakhaya, ndalola mbu nobulayi okhuhabira Kaisari. Nebutswa shindalikhwo nende elia enzira ninalio mwihanga liefwe ta. ²⁰ Niko akachilire nemulanga mbu embolekhwo ninenywe. okhuba eshia Israeli inayanga, nishio eshichira nemboywa eminyololo chino. ²¹ Nabo nibabola mbu shikhwanyolirekhwo okhurula Yerusalemi khumakhuwa yako ta, kata abulao owomubana befwe wetsire yino okhurera amakhuwa kata okhubola libii liosi khwiwe ta. ²² Ne khwenya okhuulira mumunwa kukuo omwene aka oparanga, okhuba khumakhuwa komwaukho kano kakhumanyishire ifwe shinga olwa kufukulungwa buli habundu. ²³ Ne olwa balinibamulachire inyanga, bamwitsira ewa yamenyanga, abandu abanji muno. naye nabebaliira, narumbula akobuloli khubwami bwaNyasaye, nabechesia khumakhuwa ka Yesu, mumalako ka Musa, khandi mubalakusi, okhurula mutsuli okhula olwa bwera. ²⁴ Abandi nibenya okhusubira yako akabolwa, abandi nibakhaya. ²⁵ Ne olwa bakhaya okhufuchirisania abene khubene, bachaka okhwinyokha, olwa Paulo yali namalile okhubola likhuwa elala mbu, Roho mulafu yabolela abakuuka benywe mumunwa kwa Isaya mbu, ²⁶ otsie khubandu bano obole mbu,okhuulila muulila ne nimulamanyirisia ta, okhuhenga muhenga ne, shimulola ta. ²⁷ Shichira emioyo chiabandu belihanga lino, chiasiruala, amarwi kabwe nako kekala,khandi tsimoni tsiabwe tsiatimbile baleshe okhulola netsimoni tsiabwe, nibaulira namarwi kabwe, nokhumanya eshisina nemioyo chiabwe nokhushukhana nibahonibwa. ²⁸ Kho kamanyishe mbu obuhonia bwaNyasaye buno buyalirwe abamahanga, nabo bosi baulile. ²⁹ Ne olwa yali nabolile amakhuwa yako, nibenyokha nibayingana muno abene khubene ³⁰ Yamenya yo emiyika emilamba chibiri munzu eya yarunjiranga omurungo, niyenjisinjia bosi abatsitsanga ewa yali. ³¹ Niyerwatsanga obwami bwa Nyasaye, niyenjisinjia akali khuMwami Yesu Kristo katong'ane, omundu yesi nalamukaya ta.