¹ Mana Agripa namubolela Paulo mbu, wimirwe okhhuboola aka oli ninako, mana Paulo nachingula omukhono nabola kokhwitetea. mbu, ² endola nendi weikhabi Omwami Agripa shinga okhwitetea imbeli wo inyanga yino khumakhuwa yako kosi aka Abayaudi. ³ Okhushira muno okhuba ewe wamanyira elala ebima nende amakhuwa kosi akabayaudi, khulwako ekhusaya umbulirisie nende obwisimirisi. ⁴ Abayaudi bosi bamanyire obuayi okhwichenderesia khwanje, shinga olwa khwalinji okhurula khubwana bwanje, nimbetsanga mubelihanga liefwe, khandi Yerusalemi okhurula mukhuchaka. ⁵ Bayamanya okhurula mukhuchaka, ne nibaba nibakhachama banyala okhubola kobuloli bwanje shinga olwa ndechenderesia nende abafarisayo nenondanga amakhuwa amatinyu mudini yefu. ⁶ Ne bulano esinjire okhuyasibwa khulwa obunayi bwobusubili bwaNyasaye yasubisia bakuka befwe. ⁷ Nibwo obwa tsimbia tsiefwe ekhumi natsibiri tsikombanga okhula nitsilumilira okhumukholera Nyasaye eshitere nende eshiro, ne khubunayi buno nibwo obuchira ninzirwa naba Yaudi Omwami. ⁸ Ne nishina eshichira mwinywe nimupara mbu shikanyalikha ta mbu Nyasaye yakhalamusia abafu? ⁹ Toto isie ndaparanga mumwoyo kwanje mbu ekhoyere okhukhola amakhuwa amanji akakana elira lia Yesu wa Nazareti. ¹⁰ Khandi ndakholanga endio Yerusalemi, nimboha abanji abobusubiri, olwa ndahebwa obunyali nende abakhulundu baba kuhani, ¹¹ Ne ndatema okhubanichirisia okhunyeka Nyasaye, nebekaliranga khandi akhanji musinagogi tsiabwe tsiosi. Ne olwa ndali noburuma shinga oulalushe, ndabasandia kata okhula khumatokho kabamahanga. ¹² Olwa ndali khunjila okhutsia Dameski, nemalile okhuhebwa obunyali nende amalako nabakhulundu babakuhani, ¹³ mana Omwami khusa yeshitere, ndalola khunjila obulafu oburula Mwikulu obuyomba okhwakha khweliuba, nibwashire khwisie nende abandali ninabo. ¹⁴ Ne olwa khwali nikhukwire hasi fwesi, ndaulira omwoyo nikuboola muluyaudi, Saulo, Saulo, mbushina niusandinjia? nobutinyu khwiwe okhuwitsa khubo. ¹⁵ Nasi nireba mbu, niwe wina Omwami? Omwami nakalusia, nisie Yesu owosandinjia, ¹⁶ Ne bukha sinjira khubilenje, okhuba kano nika achira nekhuloleshera mbu, ekhwaule obe omukhalabani khandi omurumbusi wobuloli khukenako aka olutsi khwisie nende khukenako akandikhulolesheramwo. ¹⁷ Ndalakhunininjia mubandu nende mubamahanga. ¹⁸ Okhutimbusia tsimoni tsiabwe, mbu bashukhane barule mushirima, bachome mubulafu, nokhurula khubunyali bweshishieno nibachoma khuNysaye. Mbu banyole okhulesherwa ebionono nende obulaame mubenabo abaulwa khulwa okhusubilira isie. ¹⁹ Niko akachira Omwami Agrippa shindakhaya kelibiso elirula mwikulu ta. ²⁰ Ne ndaranjilira okhurumbulira ebe Dameski mberio, mana Yerusalemi nende mushialo shiosi shiebuyaudi, khandi nende mumahanga shinga olwa bakhoyere okhwikalukhasia, nibashukhanira Nyasaye, nibakhola ebikhole ebifwana nende obulunjishi. ²¹ Niko akachira Abayaudi nibandira Muhekalu, nibenya okhunzira. ²² Kho nimumalire okhunyola obuhabini oburula khuNyasaye, esinjiranga kata okhula olwa lelo, nirumbulira bosi abakhongo nende abatiti akobuloli nindabola likhuwa liosi ta, habula akabalakusi nende Musa baboola mbu, kaletsa. ²³ Shinga Kristo Oyo olwa okhoyere okhusalira khandi shinga olwa yakhabe owambeli okhulakhamukha okhurula mubafu, naboola ario akobulafu khubandu beene khandi nende khubamahanga. ²⁴ Ne olwa yaboola okokhwitetea ario, Festo yaboola nende omwoyo omukhkngo mbu, Paulo, olalushe? okhusomakhwo okhunji khukhukwisiye omulalu. ²⁵ Naye Paulo naboola mbu, shindalalushe tawe owoluyali Festo, nambola amakhuwa kobwatoto muburecherefu. ²⁶ okhuba Omundu yamanyira elala amakhuwa kano kosi, nasi enyala okhubola kobulamba imberiwe, okhuba emanyile obulayi mbu, libulaholikhuwa liosi mukano eliamubiswa ta, shichira kano shikekholekhanga mumebiswi ta. ²⁷ Omwami Agrippa,osubiriranga khubalakusi? emanyile shinga olwa osubiranga, ²⁸ Agrippa namubolera, Paulo mbu, mushise eshititi wenyanga okhukhola OmuKristo? ²⁹ Naye Paulo nakalusia, ndakhekombere imberi waNyasaye mbu kata nibuli mubwimbichiti noho muburambi iwe halala nende bosi abambuliranga inyanga ino mwakhabere shinga isie, okhurusiakhwo eminyololo chino ³⁰ Mana Omuruchi nabukha nende Kafuna yesi,nende Berenike,nende abali nibekhale ninabo. ³¹ Ne olwa bali nibarulire, babolana mbu, Omundu uno shakholire likhuwa liosi elikwanire okhufwa kata okhuboywa ta. ³² Mana Agrippa namubolera Festo mbu Omundu uno yakhebalwe, alaba nalasabile okhutsia ewa Kaisari ta.