¹ Olunyuma lwetsinyanga tsirano, Ananias omukuhani omukhongo yekha nende abakhulundu nende amubooli omulayi oulangwa mbu, Tetula, owaboolera omuruchi amakhuwa kaPaulo. ² Na olwa yalangwa imbeli, Tetula yachaka okhumuyaasia naboola, okhubera khulwa yiwe, obwihotseresi obukhongo bubere mwihanga lino, khulwebikhole bio ebikhongo. ³ Khwiyamanga buli habundu, noluyali olukhongo ewe omuukosi Feliki. ⁴ Kho ndalenya okhubola amanji khwiwe ta, ekhusaba mbu, ohulire amenya kefwe mumakhuwa amatiti. ⁵ Okhuba khunyolire obumayanu bwomundu uno, oureranga obukhayi khubaYahudi bosi mushialo, naye niye owimiriranga aBanazari boosi. ⁶ onyekanga kata ihekalu, owakhwakhabukule mana nikhumukhalachira shinga olwa amalako kabola ⁷ Mana omukhongo wabalindi Lusia yetsire, namani amanji namurusia mumakhono kefwe. ⁸ Nalachirisia mbu balia abamusitaka betse khwiwe, ne ninenjeresia omwene mbu anyale okhumanyirisia amakhuwa kano akakhumusitaka khuko. ⁹ Nabo abaYahudi nibakalusia nibeyama mbu amakhuwa kano nakatoto. ¹⁰ Ne lunyuma lwoMuruchi okhumuha obwiyango bwokhubola, yakalusia, "okhuba emanyire mbu waakhaba omuyasi khumiika eminji khwihanga lino, eyanzisibwa muno okhuboola imberiwo. ¹¹ Okhuba omanyile mbu netsinyanga ekhumi natsibiri okhurula nenzia Yerusalemu okhwinamira omwami. ¹² Nabo shiba aanyoola muhekalu nesolananga nende omundu yesi, noho nekholanga liosi lifwana lirio musinagogi nohomba mwitokho. ¹³ Khandi kata shibanyala okhusubisia amakhuwa kababolanga khwisie. ¹⁴ Ne lino nilio elia ndiyama imbeliwo mbu liria elia balanganga mbu tsingano, ndinamiranga sie Nyasaye wabapapa banje, nesubira kosi kahandikwa mumalako nende abalakusi. ¹⁵ Nasi endi nende obunaayi khuNyasaye, likhuwa lia bosi beyamanga, mbu khuliba nende obulamushi bwabafu, khubobosi abaluunjishi nende abononi. ¹⁶ Nasi omwene mumwoyo kwanje omulayi, endemanga okhwikalira obubi bwosi hakari wanje nende bosi, Nyasaye nende abandu. ¹⁷ Ne olunyuma lwemiika eminji,ndetsa okhurera ebihanwa nende obukhonyi khubandu banje. ¹⁸ Ne abaYahudi bandi nibanyoola muhekalu ndiyosiye, nendali nomukanda nohomba obuyoka bwosi ta. ¹⁹ Abakhoyere okhuba hano mana baboole kakhaba mbu bali nende liosi khusie. ²⁰ Kalali kario, lekha bano baboole kakhaba khuli nende liosi libi eliabanyoolire ninalio imbeli weshina, ²¹ lilali likhuwa lino elala elia ndaboola mubo, khubulamushi bwabafu, nelichira ndiemere imbeli wenywe lero. ²² Naye Felika olwa yaulira amakhuwa kano, shinga omundu wali nobumanyirisi obulayi bwoburume yibo, yasinjisia eshina, naboola, olwa Lusia omusinjiriri wabalindi yetsa, nditsa okhumanya obulamba bwamakhuwa kano. ²³ Naye nalaka abalindi okhumubikha Paulo, mana mbu abekhwo nobulakhuule butiti, ne mbu shalekalirwa abandube okhumukhalabanira noho okhumulola ta. ²⁴ Ne olunyuma lwetsinyanga tsinyinji olwa Feliki yetsa nende omukhasiwe Drusilla, owali omuYahudi, yabusia mbu Paulo arerwe, namuhulira khumakhuwa kobusubiri muKristo. ²⁵ Naye olwa yaboola khu, bulunjishi, obwifwiri, nende obuyasibwi obwitsa, Felika yarenga, nakalusia, rula hano khulwa bulano, nekhulanje nendi nende ebise ebilayi. ²⁶ Naye yapara mbu alahebwa amang'ondo mbu anyale okhumulekhula, kho yamulanga khase naboola ninaye. ²⁷ Ne olunyuma lwe miika chibiri,omuruchi Festo yamuchendera Feliki, naye Felika niyekombanga okhuchamisia abaYahudi, yalekha Paulo mumboye.