¹ Ne olwa obuyoka bwaholera, Paulo yalaanga ebechi, nabahotseresia, narula natsia Makedonia. ² Ne olwa yatsia mubitonye ebo, nabatinyisia, yetsa ebuYunani, ³ namenyayo emiesi chitaru, nabo olwa abaYahudi bali niberecheshe okhumwira olwa yalihambi okhwambukha Siria, yekomba okhukalukha okhubirira Mackedonia. ⁴ naye Sopata wa Berea nende Thesolonike, Aristika, nende Sekundo nende Gayo, wa Debe, nende Timotheyo wa Ashia, Tikiko nende Trufimo. ⁵ nibatsia nineye, nibakhulinda Trao. ⁶ Nefu nikhwambukha Filipi, tsinyanga tsiomukate kubulamwo limera, nikhula Trao olunyuma lwetsinyanga tsirano. Nikhumenyayo tsinyanga musafu. ⁷ Ne khunyanga yambeli yelijuma,olwa abechi betsa alala okhulia omukate, Paulo yabayalira, niyechesinjia okhurula mukamba, naye nabola okhula mushiro hakari. ⁸ Ne khwali nobulafu obunji munzu yeikulu, ewabali nibakhung'anire. ⁹ Naye omubukha welira mbu Eutiko, yali niyekhale khwidirisha, nakona tsindolo olwa Paulo yali nayalaanga, yatilwa netsindoolo, nakwa hasi, natolwa nafwire. ¹⁰ Naye Paulo natsia hasi namukonakhwo, naboola, mulanyakhana ta, obulamubwe bushilimwo. ¹¹ Olwa yatikulukha, nasonyola omukate, nalia, naboola khubise ebirambi,khuula mumabwibwi, narula. ¹² Nabamukalusia omubukha nali omulamu, nabo nibehotselesia. ¹³ Naye natsia imbeli muliaro, niyambukha, Assos, niyekomba okhumubukula Paulo, okhuba nilwo olwa yali naparire, nalekomba mbu atsie khubilenje ta. ¹⁴ Ne olwa yatsia ninefu Assos, khwamwinjisia mukari, nikhwitsa Mitile. ¹⁵ Nikhwambukhoyo, inyanga yalondakhwo eshikhalachinga shia Kiosi, ne inyanga yakhabiri nikhuula Samosi, nikhwikhala Trokwim, ne inyanga yalondakhwo nikhula Malita. ¹⁶ Naye Paulo yali niyekombere okhula Efeso, okhuba shiyali yeenya okhumenya Ashia ta, niyekomba nikakhanyalikha abe Yerusalemu khunyanga yaPentakosti. ¹⁷ Okhurula Malita, yarumasia Efeso,nalanga abakhulundu beikanisa. ¹⁸ Ne olwa bali nibamalire okhwitsa, yababolira, mwamanya okhurula khunyanga yamberi olwandetsa Ashia, shinga olwa ndamenyere ninenyu mubise biosi. ¹⁹ Nekhalabaniranga Omwami mubwitutuyi bwomwoyo kwosi, namasika, amatemo kangwira, ningiyungwa nende abaYahudi. ²⁰ Shinga lwa ndalafisa shiosi shiobukhala khwinywe, nebarumushira nebakhalabanira habulafu okhurula munzu okhula munzu, ²¹ nehananga obuloli khubaYahudi nende abaYunani, akobwikalukhasi khunyasaye nende obusubiri khumwami Yesu Kristo. ²² Ne bulano lole enzia muambe mubuhambe mumwoyo Yerusalemu, nendamanya aketsa okhunyola ta. ²³ Elia emanyire ni mbu, Omwami ahananga obuloli. Buli mwitokho mbu, ebiboye neminyakhano binindanga. ²⁴ Ne libulao elindechesia mukano ta, kata shendola obulamu bwanje nibuli eshindu khwisie ta, mbu emale oluchendo lwanje mubuyanzi, nende obukhalabani, bwandahebwa noMwami, okhubolo okoburume obulayi bwobukosia bwanyasaye. ²⁵ Ne bulano lole,emanyire mbu enywe mwesi abemburiremwo neyala, Obwami bwaNyasaye, shimulandola khandi mumoni na moni ta, ²⁶ khumumanyirisie okhurula lero mbu, embula eshikha namatsayi komundu yesi ta. ²⁷ oKhuba shindachweyakhwo okhubabolera obumanyirisi bwaNyasaye bwosi ta. ²⁸ Mwihenjeresie abene, nende omukanda okwa Roho Omulafu yamukhola abasinjiriri, okhulisia, Ikanisa yaNyasaye, eyakulwa namabangake. ²⁹ okhuba emanyire lino mbu, olunyuma lwokhutsia khwanje, tsisolo tsimbalaba tsilenjira mwinywe, nitsilahendera amakondi ta. ³⁰ Khandi mwinywe abene balarulamwo abandu nibaboola amakhuwa kobukori, okhwikhabira abandu. ³¹ Kho lenjeresie nimwitsulira mbu khumiika chitaru shindalekha okhubetsusia buli mulala eshiro neshitere nendira amasika. ³² Ne bulano abaherwa, ebara khuNyasaye nende lilkhuwa liobukosia bwe, elinyala okhubombakha, nokubaheresia omukabo mubosi abatakaswa. ³³ Shindiekombakhwo ifetha yomundu yesi, noho ithahabu, noho eshifwalo ta. ³⁴ Enywe abene muli abaloli mbu emikhono chino chikholire emilimo khulwokhunyola ebindu bianje nende abandali ninabo. ³⁵ Ebamanyie ebindu biosi,shinga olwa mukhola emilimo okhukhonya abateshele, nimwitsulila amakhuwa koMwami Yesu, shinga olwa yaboola mbu, neikhabi okhuhana okhushila okhuhebwa.. ³⁶ Ne olwa yali namalire okhubola, yasikama hasi nasaya ninabo bosi. ³⁷ Nabo nibalira, nibakwa mwikosi liaPaulo, nibamutsunzuna. ³⁸ Nibaberera khumakhuwa kayali nabolire, mbu, shibalilola obwenibwe khandi ta, nibamulondakhwo okhula muliaro.