¹ Olunyuma olwa amakhuwa ako Paulo yarula eAtsene niyoola eKorinzo. ² Ne nanyoola omuYahudi undi owelira mbu Akula,omwibulwa wa ePondo, owali narulire eItalia, nende omukhasiwe Prisila; (shichira Klaudio yali nalachire abaYahudi bosi barule ebuRoma:) mana niyetsa khubo. ³ Ne okhubera yali omukholi wemirimo milala ninabo, yalimaana ninabo, nibakholera emirimo halala; sichira bali abanabi bamaheema. ⁴ Bulano yaboleranga musinagogi buli ISabato natema khubakhwesa abaYahudi nende abaYuhani. ⁵ Ne olwa Sila nende Timotseo betsa okhurula eMakedonia, Paulo yafinyiikha mumwoyo, nababolera abaYahudi mbu Yesu yali Kristo. ⁶ Ne olwa baingana ninaye, nibamunyeka, yabungulula inguboye, nababolera mbu amatsayi kenywe Kabe khumirwe chienywe; esie endi omulafu: okhurula olwa lero ndilatsitsanga khuBamahanga. ⁷ Mana narulayo, niyenjira munzu yomundu undi, oulangwa mbu Yusito, mulala ulia owinamiranga Nyasaye, noweinzuye yarondokhana nende Isinagogi. ⁸ Khandi Krisipo, omwimirisi weisinagogi, yasubirira Omwami halala nende inzuye yosi; ne abaKorinzo abanji abahulira basubirira nibabatisibwa. ⁹ Bulano Omwami namuboolera Paulo mumaloro eshiro, olaba omuri tawe, bulano boola, nolaholera tawe, ¹⁰ Okhuba endi halala ninawe, abulaho ulakhutirakhwo okhukholera obubi tawe: okhubeera endi nabandu abanji mwitokho lino. ¹¹ Natsirira okhumenyayo omwika nemiesi chisasaba, niyechesinjia mubo likhuwa lia Nyasaye. ¹² Ne olwa Galio yali omulondi wa Akhaaya, abaYahudi basinjirira Paulo nomwoyo mulala, nibamurera imberi weshisala shiobuyaasi, ¹³ Nibaboola mbu, omundu uno akhwesanga abandu khumwinamira Nyasaye akalali mutsinjira tsiamalako ta. ¹⁴ Ne olwa Paulo yali okhuchingula omunwake, Galio yabolera abaYahudi mbu, lilaba liakhabere likhuwa liobwononi nohomba eshifwabi eshibi, kakhakhoyere efuchirisanie ninenyu: ¹⁵ Ni kaba Kali amarebo kamakhuwa nende amera, khandi amalako keenywe, lole khwo abene,shenyala okhuba omuyaasi owakenako tawe. ¹⁶ Mana nabalonda hashifumbi shiobuyaasi. ¹⁷ Mana bosi nibamukwakho nibamutira Sositsene, omwimirisi weisinagogi, nibamukhupira imberi weshifumbi shiobuyaasi. Naye Galio shiyateba likhuwa khuyako kosi tawe. ¹⁸ Okhurula khukene ako Paulo natsirira okhwikhalayo tsinyanga tsinyinji, nasebulana nabana bwabwe narulayo muliaro natsia eSiria, nali nende Prisila nende Akula; ne yali nabecheere omurwe eKenekerea; shichira yali neshitsubo. ¹⁹ Niboola eEfeso naye nabalekhayo: ne omwene niyenjira musinagogi, nakhupa imbaka nabaYahudi. ²⁰ Ne olwa bekomba mbu yekhale ninabo khuluhono, shiyayeyama tawe; ²¹ Alali yasebulana ninabo, nababolera mbu kakhoyere munjira yosi mbu enzie mwisabo elitsanga muYerusalemu: naboola mbu nengalushe olundi Nyasaye naba nachama. Mana narula eEfeso muliaro. ²² Ne olwa yali niyakhekha eKaisaria,khandi yatikulukha ikulu, nashesia Ikanisa, nakholomokha natsia eAntiokia. ²³ Ne namalire okhwikhalayo khulwe tsinyanga, yarulayo, natsia mushibala shia Galatia nende Firigia, shinga olwa tsialondana natinyirisia abeechi bosi. ²⁴ Khandi omuYahundi owalangwa mbu Apolo, owebulwa eAlekisanderia, omundu owamasomo, omuchesi muno mumakhuwa kamahandiko yoola eEfeso. ²⁵ Omundu uno yali niyeechesibwa akeinjira yo Omwami; khandi Roho kwe kwali kwakhaanga, naboola nende okhwechesia habwene amakhuwa ako Omwami, namanyire obubatisi bwa Yohana bwonyene. ²⁶ Mana nachaka okhuboola akatong'ane musinagogi: ewa Prisila nende Akula bamuhulira bamuyira ewabo, nibameta okhumwechesia injira ya Nyasaye obulayi. ²⁷ Ne olwa yenya okhwambukha okhutsia eAkhaaya. Abana befwe bamutinyirisia, nbahandichira abeechi mbu bamwinjisie: ne olwa yali niyolereyo, yabakhonya muno abali nibasubire khulwa obukosia: ²⁸ Okhuba yashirira elala abaYahudi habulafu, namanyia mumahandiko shinga Yesu ali Kristo.