¹ Biebola mbu huyirana hunyorehana akari weng'we hubi, ne handi huyirana huno humaho hubandu abaramanya Kristo, hubera eng'we muyirananga hula hubamako yeng'u. ² Ne handi mwesunga, handi muuma hwerarihira, mbu omundu omarire ohola ako anyala hwirusibwa yarula akari yeng'we? ³ Hwesie musaba ngolwa mumao mumubiri, ne nduwo mu mwoyo, marire ohenga sina, kamaoruwo nimumao, olundohano nende uria ohola bindu ngabino, ⁴ Murira rio mwami wefwe Yeso Kristo, nimwahebusia alala, nende mwoyo kwange, nende mumani ko mwami wefwe Yeso ,Kristo. ⁵ Muyera omundu uno omuberesania husihieno anyasibwe mubiri, ne mwoyo kwaye kuwonisibwe inyanga yohwicha hwo mwami Yeso. ⁶ Ohwekingula hweng'u sohulayi, mumanyireho mbu simera sididi sifwimbiangia busie bwosi bubahirwe? ⁷ Mupukule rwanyi simera sihare, mbu mwekaluhanie busie buyiaha, ne muranyasibwa hubera Kristo uria rikondi riomusango kwa pasaka amarire oba musango. ⁸ Hulwako huhianie risabo, nihuraremo simera sihare, katasa simera siobubeyi, nende obukara, ne huhole mikati kiumamo simera nende mwoyo kwobwadieri. ⁹ Ndamwandikira mahuwa kano mulweyimberi mbu murakendaho alala nende bayirani? ¹⁰ Sinasa alala nende bayirani bumusialo sino, katasa bekombi, abang'usi, abalama Nyasaye wobubeyi, ne hane bimuyika hwadiha hurula musialo. ¹¹ Haro mwandikire mbu murakenda alala nabo, ne nibiri wasieng'u muherwa aba muyirani, ama mubeyi, olama binyasaye, orurire hungira, kata mumesi, kata mung'usi, omundu ofwana ario katasa huria muraria ninaye. ¹² Haro esie ndahola sina ohengera sina abari rwanyi? Simuhengerangasa abari akari weng'we? ¹³ Ne baria abauma Nyasaye baba mubahorera sina, hulwako mufube rwanyi hueng'we onyala ohola mabi oyo.