¹ Abakheerwa, murasubira buli iroho, arali muteeme echiroho echio, nibili mbwe chirulana nende Nasaye; khulwo khubeera abanabii bobubacha abangi barulireo musialo. ² Khulino mwamumanya Roho wa Nasaye, buli roho afukirira mbwe Yeso Kirisito yeecha mumubiri arulana nende Nasaye. Naye buli roho arafukirira Yeso khasi arulana nende Nasaye. ³ Ne uno niye roho owomukhayi wa Kirisito owamwabulira mbwe yeecha; Ne bulano amalire okhuba musialo. ⁴ Eng'we, abaana badiidi, murulana khu Nasaye, nang'we mwamukhira, khulwo khubeera oyo oli mukari mweng'we nomukhoongo okhukhira oyo oli musialo. ⁵ Abo nibesialo; khulwesio balomaloma akesialo, ne esialo sibabulira. ⁶ Efwe khurulana nende Nasaye. Oyo omumanyire Nasaye arubulira; Oyo orarulana nende Nasaye khasi arubulira. Mulino khumanyire Roho wobwadieri nende roho wobukori. ⁷ Abakheerwa, khukherane abene khu bene, khulwo khuba Nasaye nobukheeri, ne buli mulala okheera nomwibulwe wa Nasaye, ne amumanyire Nasaye. khulwa khubeera obukheeri burula khu Nasaye, ne buli okheera yebulwa nende Nasaye. ⁸ Oyo orakheera khasi amanyire Nasaye, khulwo khubeera Nasaye nobukheeri. ⁹ Mubukheeri bwa Nasaye buno obwabonekhana khwefwe, mbwe Nasaye yamuruma Omwana waye mudeerwa musialo mbwe khunyoole okhumenya muniye . ¹⁰ Buno nibwo obukheeri, khasi bili mbwe efwe khwakheera Nasaye, arali mbwe yie yarukheera efwe, namuruma Omwana waye okhuba omwambaani wechimbi chiefwe. ¹¹ Abakheerwa nibili mbwe Nasaye yarukheera, efwe fwesi khukhoyere khukherane abene khu bene. ¹² Abulao omuundu owabona Nasaye ebikha bioosi. Nikhukheerana, Nasaye yekhala mukari mwefwe, ne obukheeri bwaye bulirira mukari mwefwe. ¹³ Mulino khumanyirisie mbwe khumenyere mukari mwaye, naye mukari mwefwe khulwo khubeera yaruberesia Roho waye. ¹⁴ Ne efwe khubwene khande khurusia obuloli mbwe Sefwe yamuruma Omwana okhuba omuonia wesialo. ¹⁵ Buli ofukirira mbwe Yeso nomwana wa Nasaye, Nasaye amenya mukari mwaye, naye mukari mwa Nasaye. ¹⁶ Nafwe khumanyirisia obukheeri bwa Nasaye ali ninabwo khwefwe, nende okhubusubira. Nasaye nobukheeri, naye omenya mubukheeri, amenya mukari mwa Nasaye naye Nasaye amenya mukari mwaye. ¹⁷ Khulwesio mubukheeri buno bwoserisibwa khwefwe, mbwe khube nende ichuoni muinyaanga yobukhalaki; khulwo khuba, ngaolwa yie ali, nilwo olwa efwe fwesi khuli musialo muno. ¹⁸ Mubukheeri oburi bubulamo; khulwa khuba obukheri obwolerefu burusianga erwanyi oburi, khulwo khubeera oburi buli nende ebiima bilayi; naye oli nende oburi siyoleresibwa mubukheeri. ¹⁹ Efwe khwamukheera khulwo khubeera yie yarangira orukheera efwe. ²⁰ Omuundu naboola mbwe ndamukheera Nasaye, ne yamusiula omusiani wabwe, nomubaacha; khulwo khubeera oramukheera omusiani wabwe owa yie alola, khasi anyala omukheera Nasaye owaralola. ²¹ Ne esilagiro sino khwaberesibwa ninaye, mbwe oyo omukheera Nasaye, amukheere nende omusiani wabwe.