¹ Khu kalia makhuwa kakhumalire khulomaloma, obumalirikhi bwako nibwo buno mbwe; Khuli nende omukukhaani mukhongo owekhala namukhono musacha kwesisala sioburuki mwikulu. ² Niye omukhalabani wo mubwaali, eyiri inyumba yadieri, eyomundu arombakha arali Omwami Nasaye mwene. ³ Khulwo khuba buli omukukhani mukhongo arebwangao khulwo khwaana ebianwa nende ebisakhiro. Khu kario uno yesi yali ayera akhole ario. ⁴ Aba mbwe ali khusialo, siyakhabere omukukhani khaba, khulwo khuba abo abalikho barusianga ebianwa mungira yelilako. ⁵ Bakhola emirimo muifwani nende esinikha siebindu bio mwikulu. Bili sa ngolwa Musa yali nabalirirwe nende Nasaye mubikha biayali niyombakha eliyema liemikhung'ano; Nasaye yamuboolera ari, ''Onakhola buli siindu okhulondana nende eyifwani yawekesibwa khulugulu.'' ⁶ Ne bulano yanyoola obukholi bukhirakho mubulayi, ngolwa ali omwambani welilakano lilayi, eliombakhwa khu masubisio malayi. ⁷ Elilakano lieimberi libuliremo obulemu, siliakhenyekhane eliokhubiri khaba. ⁸ Namalire okhunyoola obuleemu khunibo aboola mbwe, ''Lola, echindaalo chiicha aboola Omwami njia okhureresia elilakano liyakha nende inyumba ya Isiraili nende inyumba ya Yuda. ⁹ Lino siliakhabe nga elia ndakhola nende basaabwe olwa ndabarusia nomukhono kwange musialo sia Misiri. Okhuba sibachiririra mulilakano liange ebikhoyera, Khu kario ndamala bakhaye - abola Omwami. ¹⁰ Lino nilio elilakano lianjia okhukhola nende inyumba ya Isiraili olunyuma lwechindaalo echio, aboola Omwami, njia khura amalako kange mumaparo kabwe, khandi nende okhwandika mumioyo kiabwe. Ne ndaba Nasaye wabwe nabo babe abaandu bange. ¹¹ Ne anabulao onekesia omumenyerani waye, kose omuundu khwekesia omusiani wabwe mbwe, 'Mumanye Omwami.' Okhuba boosi bachia okhuumanya khurula khumudidi okhula khumukhoongo. ¹² Khulwo khuba ndaba owesisa khubumaanu bwabwe , khubionono biabwe nende obukhayi bwabwe, sindirichulisia khaba.'' ¹³ Ne khu lino nabola ari elilakano liyakha alikholere okhuba elikhulundu, ne silia esibola nisikhulunduyala sibechanga sirulao.