¹ Elilako khulwo khuba nesinikha siamakhuwa malayi kalibao, arali nesifwanani siamakhuwa kene. Abo abamuchira Nasaye sibanyala okhulabisibwa mubwichufu khubirira khubisakhiro bia bareranga buli mwaka. ² Kata kario , ebisakhiro biene ebio sibiakhakame khurusibwa? Khulwobera abo balami bakhosibwenge lulala nibarula mumbera yokhwondondwa khweimbi. ³ Arali mubisakhiro ebio buli lwoosi khuli nende okhwichulisibwa obwonooni buli mwaka. ⁴ Okhuba amabanga kechisurusi nende chimbusi sikanyala okhurusiao echiimbi. ⁵ Kho kario Kirisito niyeecha musialo, aboola ari, ''Esisaakhiro nende esianwa siwajamisibwa ninabio , arali omubiri kwawangasiria; ⁶ Sisangaalira mubianwa biokhusambwa nende bisaakhiro bie bionono. ⁷ Nilwo olwa ndaboola mbwe, 'lola, njichire ndiwo ngolwa kaandikwa mubitabo okhukhola elienya liao Nasaye .'' ⁸ Akulu wako yaboola ari, ''ebisakhiro nende ebianwa biokhusambwa nende ebisakhiro biebionono sindajamisibwa nabio.'' Khandi sisangaliranga, khuba birusibwanga mungira yelilako. ⁹ Ne nabola ari, ''Lola njicha okhukhola elienya liao Nasaye. Mbwe arusiao lie imberi anyale okhwemekha elio khubiri. ¹⁰ Mulienya liene elio khulabisibwa lulala okhubirira musianwa siomubiri kwa Yeso Kiristo. ¹¹ Ne buli lwoosi omukukhani yemeraanga okhurusia ebisakhiro bilia ebiramalao ebionoono. ¹² Naye uno niyakhamala okhwerusia ngasimala musango lulala, yekhala omukhono musaacha kwa Nasaye. ¹³ Khurula ao alindiliranga abasuku baye boosi okhurebwa asi wamakulu kaye. ¹⁴ Khubirira musisakhiro silala yalabia abalobole boosi oburalondamo khandi. ¹⁵ Kata Roho Mulafu yesi nomuloli khu kano. Abola ari, ¹⁶ ''Lino nelilakano lia ndirikhola ninabo lunyuma lwechindaalo echio, aboola Omwami. Ndakhare amalako kange mumioyo kiabwe, ninyandika akene ako mumaparo kabwe.'' ¹⁷ Ameda khubola ari, ''Obwonono bwabwe nende obumaanu bwabwe sindakhechulisie khaba.'' ¹⁸ Bulano owobulekheri bwe bionoono buli, abulao khandi okhurusia esisaakhiro sie bionoono. ¹⁹ Kho, bakherwa, khulwo khuba khuli nende ichwoni eyokhwingira andakatifu, khubirira khumabanga ka Yeso. ²⁰ Khubirira mungira injakha eyobulamu eyayarukasiria khubirira mu ipasia, okuli mubiri kwaye. ²¹ Ne khulwo khuba khuli nende omukukhani omukhongo munyumba ya Nasaye, ²² Kario khuside ambi mumwoyo kwo bwadieri okuli nobukakasi bwelisubira, emioyo kiefwe kilabisibwe khurula mumaparo amabi, naye emibiri kiosibwe nende amaachi machwenufu. ²³ Khu kario fwesi khudiririre nende amaani elisubira liokhufukirira khwefu oburadofula, okhuba ula owalaka nomwesikwa. ²⁴ Ne kario fwesi khupare mubudinyirifu ngolwa khunyala khudinyisania mukhukhera nende ebikhole bilayi. ²⁵ Khandi khuralekha okhubukanananga ngolwa kuli omunalo kwabaandi, ne khudinyisanienge nga olwa khulindirira indaalo eyo niisida aambi. ²⁶ Ne nikhukhola obwonooni nikhumalire khunyoola bumanyirisi bwo bwadieri , khubulao khandi esisaakhiro sie bionoono. ²⁷ Abula khulindirira okhukhalakirwa khalala nende omuliro kurisia okulindiriranga okhumira abakhayi abali basuku ba Nasaye. ²⁸ Oyo owalekaanga lilako lia Musa, yerwangwa oburaba ne sisa khubuloli bwa babiri kose badaru. ²⁹ Opaara omuundu oyo osenakira Omwana wa Nasaye ayera sinyasio siaka sirie, ouradebere amabanga kelilakano kayalabisibwamo naba najarire Roho wobukosia? ³⁰ Khuba khumanyire owalaka ari ,'' okhurunga sikwori nokhwaye khumulekhere ; khandi Omwami yakhakhalakire abaandu baye.'' ³¹ Ne nelikhuwa lwokhurisia okhukwa mumikhono kya Nasaye mulamu. ³² Naye ichulisiakho chindalo cheimberi echia mwakhoserwa obulafu, nimwesimirisia obuyingani bukhongo nende amanyakhano makhongo. ³³ Mungira ndala mwasandisibwa nende khunyasibwa, ne mungira yindi mwabalirwa alala nende abo abakholerwe kene ako. ³⁴ Mwabonera esisa abo bali musiboye , kata khandi mwasangala ebindu bieng'we nibibukulibwa nga mumanyire mbwe muli nende esianwa silayi mwikulu esiranyasikha. ³⁵ Kario murasukuna obukakakhi bwa muli ninabwo okhuba omurungo kwabwo nomukhongo. ³⁶ Kata kario kenyekhana mwesimirisie, lunyuma lwo khukhola elienya lia Nasaye, khumunyole esisubisio siayalaka. ³⁷ ''Ne mubikha bimbikiri,oyo owichanga aneecha oburachelewa khaba.'' ³⁸ Naye omulungifu wange amenyanga mubusubiri, arali oyo okalukhanga inyuma, omwoyo kwange sikumusangaliranga khaba.'' ³⁹ Naye efwe sikhuli mwabo abakalukhiranga obumaanu, arali khuli mu balia abasubiriranga khula khuonia emioyo kiefwe.