¹ Yuda omurumushi wa Yesu Kristo nende omusiani wabo Yakobo, khubalia abalangwa nende Nyasaye Papa nende okhulindwa muKristo Yesu. ² Tsimbabasi tsibe ninenyu nende omulembe nende obuheeri bumeteshe. ³ Abaherwa, olwa ndali neshinani khukhuhandika khubuhonia obuliho bwakhabeere obulayi esie ebahandichire nende okhubaheresia omwoyo mbu, mwiyamane nende obusuubiri obwaheresibwa abatakatifu. ⁴ Shichira khuli nende abandu bandi abenjira mufwe mabiswi abamala okhwemekhwa okhufwirwa eshiina abandu balamumanyire Nyasaye wefwe obwilaasi, nibamuloba omwami Nyasaye, yenyene nende Yesu Kristo Omwami wefwe. ⁵ Bulano nditsa okhubetsusia kata kakhaba mumanyire shinga lwa omwami yahonia abandu okhurula Emisiri olunyuma yamalirana abalaali nibasubire. ⁶ Ne malaika balalinda obwiyango bwabwe bwambeli, halali balekha obumenyi bwabo, Nyasaye akabohere nende eminyololo echieyinziayo okhuula inyanga ingali eyobukhalachi. ⁷ Kata shinga olwa Sodomu nende Gomora nende amatookho akalimwo nibehaana khubwilasi bwomubili barebwa imbero wefwe mbu babe eshilolero eshia obukuumu obwe yinziayo. ⁸ Ne butswa bano bosi bario khulwa amalooro kabwe boononinjia omubiri nibaleka oburuchi nibanyeka abaluyali. ⁹ Ne butswa Mikaeli Malaika Omukhulundu oyo, yali nasolananga nende Setani khulwa omulambo kwa Musa ne shiyatsalikha okhumukhalachira eshiina shiobunyechi ta, habula okhuboola mbu, Omwami akhukondoshere. ¹⁰ Ne bano baboola amabii akabakorwa ebisina biako; ne akene yako akabamanyire shinga tsisolo nasolo mukene yako nimwo omwabatibirawo. ¹¹ Woowe khubo! khulwa bachendere munjira ya Kaini ni belukhe mwikosa lia Balaamu, ne bakorere munduli shinga na Kora. ¹² Bano nibo abali ebironyeresi mumasabo kenywe, olwa baliitsanga ninenyu, nibalia halala halali oburi ta, amalesi shikaali nende emisaala echia ebiamo biako binialanga, halali ebiamo ni biba bifwire ne biiywa nende emisii chiene. ¹³ Ne imbumbuyeka ingali eyomunyanza eyarusinjia ebifimbwa murwe shinga lifiro, netsing'ining'ini etsitimatimaanga ne eshiatsiabishirwa yinziayo neshirima eshimali ti. ¹⁴ Enoka owa saba okhurula khu Adamu yalakula khu kano naboola mbu, omwami witsire nemikanda chiabatakatifu ebikhumira nebikhumira. ¹⁵ Okhuyaasia nokhubakhalachira ebiina boosi abalamuria Nyasaye ta khulwa ebikhole biabwe ebibula oburii, ebia bakhola khandi khulwa amakhuwa amatinyu koosi akabonoona ne balamuria Nyasaye ta. ¹⁶ Ababuululi khandi abalilikani, beyiira mu bwikombi eminwa chiabwe chiboola akeisunga okhwinyolera ebindu. ¹⁷ Halali abaherwa banje mwitsulire akaboolwa khale nende abarume bOmwami wefwe Yesu Kristo. ¹⁸ Bamubolera mbu, mubumalirishi balibaho abakokonyi abalichenda mubwikombi bwabwe. ¹⁹ Bano nibo abaleeranga tsinzahukho ababula roho. ²⁰ Nebutswa, abaheerwa mwiyumbashe khubusubiri bwenywe obutakatifu nimusaaya muRoho. ²¹ Mwilindenje mubuheeri bwa Nyasaye nimulindirira tsimbabasi tsia Yesu Kristo okhurula khu bulamu bwobumeli. ²² Babeere tsimbabasi yabo abakanakaninjia. ²³ Abandi mubayuule mumuliro nimubahonia; abandi nimubalolesia tsimbabasi noburii, nimukiiya kata eshiifwalo eshilikhwo eshifwabwi shieshinamubiri. ²⁴ Kho bulano oluyali, nobukhulundu, nobunyali nende oburuchi bibe khu oyo ounyala okhumulinda muleshe okhwisichirala, nokhwisinjisia imbeli woluyalilwe ahalali eshikha shiosi ta, mukhwikhoya okhukhongo bibe khu Nyasaye, ²⁵ Ouli mulala yenyene, omuhonia weefwe, khulwa Yesu Kristo Omwami weefwe, okhurula olwa ebise bosi biali nibirashiabaho ta, nende bulano kata yinziayo. Amina.