¹ Paulo, omurume waYesu Kristo mulienya lia Nyasaye, nende Timotheyo omusiani wefwe, ² khu abatakatifu baNyasaye nende abaheerwa muKristo abali ebuKolosai. Nyasaye ouli sefwe, amuheresie obukosia nende omulembe. ³ Buli lwosi olwa khumusayilanga, khuupilanga orio Nyasaye ouli samwana Omwami Yesu Kristo. ⁴ Okhurula nikhuhulila khu akobusubili bwenywe muKristo Yesu, nende akobuheeri bwenywe obwamulininabwo khu abatakatiifu boosi. ⁵ khulwa obunayi bumwabishilwa mwikulu, obwa mwahulila mwikhuwa liobwatoto, ili injili, ⁶ eyamalile okhubeetsera. Munjila yeeneyino yaama ebiamo shingana mwinywe okhurula olwamwachihulila nimumanya obukosia bwa Nyasaye mubwatoto. ⁷ Shingana mweeka okhurula khu Epafuro, omusumba washiefwe omuheerwa, oulikhunywe omurumishi omwisikwa muKristo. ⁸ Niye owakhuboolele khu akobubeeri bwenywe muRoho. ⁹ Khulwa eshifune shino, okhurula nikhuhulila amakhuwa kano, shikhukoneranga okhumusaayira tawe, nobwikoombi mbu mube abetsulamwo obumanyi obwelienyalie, mubuchesi bwoosi, nende oburecherefu nende obuhulili bweshiroho. ¹⁰ Mana munyalilwe okhuba neijenda eikhoyere muMwami niichamisinjia mukosi, nimwamanga ebiamo mubuli emilimo emilayi chiomukhola nimumetekha mukhumumanyilisia Nyasaye. ¹¹ Mutinyisibwe na amaani kosi akalondekhaane mubunyali bwooluyalilwe, mubwisumilisi bwoosi nende obwifwiili nende obusaangafu ¹² mumukhupila Seefwe orio, owakhuhelesia obunyali okhuba nomukabwa mubulaame bwa abatakatifu mubulafu. ¹³ Yakhuhonia efwe okhurula mubunyali bweshilima, nakhukalukhasia wefwe khwiinjile mubwami obwoMwanwe omuheerwa; ¹⁴ Owa muye khuli nende obununuli okhubilila mumatsaayike, kata okhubeerwa khwetsimbi tsiefwe; ¹⁵ Ouli likondo lilolekhanga elia Nyasaye oulalolekhanga ta. Omwibulwa wambeli mubilonje biosi; ¹⁶ Okhuba muye nimwo ebindu biosi bialejelwa, bilia ebiomwikulu, bilia biosi ebiomushialo, ebilolekha nende ebindu ebilalolekha. Bibe ebifumbi bioobwami, yibo abaruchi, abaamani, biosi bialongwa okhubilira muye khulwa ye. ¹⁷ Yaliho ebindu biosi nibishili okhubaho, Ne ni muye omwa bulishindu shiosi bitiiyilanga halala. ¹⁸ Niye omurwe okwomubili, okuli likanisa. Naye obuchaachilo, omwibulwa waambeli okhurula mubafu, mbu mubulishindu abe mubwiyaangu bwaambeli. ¹⁹ Kamuchamisia Nyasaye mbu muye, omwitsulu kukwe kwoosi kube; ²⁰ Namalile okhukasia omulembe okhubilila momatsayi qkokhumusalaba, muye nasasaninjia ebindu biosi muye mwene, khulwa ye mwene, bibe ebindu biahasi hano nohomba ebiomwikulu. ²¹ Ne nenyu, abali nibaukhana ninaye nimuli abasuku mumapaaro kenywe khulwa ebikhole ebimayanu, bulaano yamusasaniiye ²² mumubilikwe okhubilila mwifwa, amuhaane abatakatifu khandi ababula eshikha Kata eshichila okondoshilwe mutsimonitsie; ²³ Nimuba nimutsililila mubusubili nimuyila emisi nimuralira, nimulareesibwa okhurula mubunaayi obweinjili, obwa mwahulila, nabwo bwakaambilwa buli ebilonje hasi welikulu; ewasie Paulo endi omurumushi; ²⁴ Ne bulaano esie ndikhoyela okhunyakhana khwanje khulwa enywe, nasi nditsusinjia mumubili kwanje akaleema mubusaandi bwaKristo, khulwa omubilikwe, okuli likanisa. ²⁵ Nasi ndakholwa omukhalabani welikanisa, okhulondokhana nende obusinjilili bwa Nyasaye obundahesibwa khulwa enywe; okhuusia likhuwa liaNyasaye; ²⁶ nalio nilio libiso eliali niliabiswa khale nende okhurula khubisoni ebinji, habutswa bulaano, libakaalwe habulafu khulwa abatakatifube: ²⁷ balia abaNyasaye yeenya bamanye akobuyiinda bwoluyali lwelibiso lino luli mubamahanga, elili Kristo munywe, niye obunayi bwoluyali. ²⁸ Khulandia ye, nikhuchetsiyia bulimundu khandi nikhwechesia bulimundu nobuchesi bwoosi, mbu khubahane abandu abalamba muKristo Yesu: ²⁹ Kata siesi ekhalabana nenyakhanila mumilimo echia atiiyanga musie nobunyali obukhongo.