¹ Ne olwa bali nibahonokoshe, bamala nibamanya mbu eshikhalachinga yisho shilangwa mbu Malita. ² Nabo abandu bali nibamenya khwo bahaananga obulayi: kata nibakhubwanira omuliro, nibakhwinjisia fwesi, shichira ifula yali niyikwitsanga, khandi khulwobushindu. ³ Ne olwa Paulo yali niyakhareenya olukhanya lwebisala, nabiretsanga mumuliro, inzokha yarula mumuliro, niyiboha khumukhono kukwe. ⁴ Ne olwa abandu bamenya yo balola isolo yobofisi niyererere khumukhono kukwe, nibaboolerana abeene mbu, Kanyalikhana mbu omundu wuno okhuula abe nali omwiiri, kata nikaba mbu yahonokoshe okhurula munyanza, obuyiimi shibumhesia obwiyangu okhumenya tawe. ⁵ Mana naye nasungusa isolo yiyo nikwa mumuliro, nalaba ousalira tawe. ⁶ Nabo bali nibalindiriranga mbu abe oufimba omubiri, nohomba akwe hasi man afwe mangalakala: habutswa nibalinda khwo oluhono, nibalalola libi liosi liosi nilimwikholeshera ta, bamala nibakalukhasia amapaaro, nibaboola mbu ye nomunyasaye. ⁷ Ne ahambi yaho khwalio nende omukunda okwali okwa omusinjiriri weshikhalachiinga, oweliira mbu Publlius; owakhwinjisia mana nakhulinda obulayi khulwa tsinyanga tsitaru. ⁸ Nikaba mbu samwana Publius yali nakonere nali nende omurengo nende olwomunda: Olwa Paulo yenjira mukari, namusayira, namurakhwo emikhono, mana namuhonia. ⁹ Kho olwa kano kekholekha, abandi abali nibali abalwale mushikhalachiinga, beetsa boosi, mana nibahonibwa: ¹⁰ Nibamala nibakhulolesia oluyali olunji mubindu ebinji; mana nikhurulayo, nibakhusebula nende ebindu ebinji ebiali nibikhukhoyere. ¹¹ Olunyuma olwa emiesi chitaru khwarulayo muliaro eliali nilitsitsanga Alexandaria, eliali niliikame omunyiri khushikhalachiinga, elialikhwo eshilolero shia Castro nende Pollux. ¹² Nikhuula eSyracuse, nikhuhulukhayo tsinyanga tsitaru. ¹³ Okhurula yaho muliaro, khwoola mwitookho lia Rhegium: mana olunyuma olwe nyanga ndala obushindu obwesautsi bwahuutsa, ne inyanga yalondakhwo nikhuula Puteoli: ¹⁴ Habwene yaho khwanyoola yo abaheerwa, nibakhwinjisia nikhumwnya yinabo tsinyanga saba: nikhumala nikhuchooma ebuRoma. ¹⁵ Ne olwa khwarulayo, abaheerwa bakhuhulira, betsa okukhwakanira okhurula khushiiro shia Apio, nende aheMikawa Chitaru:olwa Paulo yabalola, yakhupira Nyasaye orio, niyehesia omwoyo. ¹⁶ Ne olwa khwenjira ebuRoma, omuseessia yahana ababoye boosi khubalindi: habutswa Paulo yebalwa mbu amenye yenyene nende omusikari owamulindanga. ¹⁷ Nikaba mbu, olunyuma olwetsinyanga tsitaru Paulo yalanga abakhulundu ba Abayaudi halala: ne olwa beetsa halala, yababoolera, Abasats nende abaheerwa, Kata nikali shindakhola eshindu eshibi khubandu ta, nohomba okhufukula akabakuuka, ndahanwa shingana omubohe okhurula eYerusalemu mumikhono chia abaRoma. ¹⁸ Balia, olinyuma lwokhureberesia, bakhandakhulire enzie, shichira shibanyoola eshifune shiokhunzira tawe. ¹⁹ Habutswa olwa Abayhudi bayiingana yinabo, kayunjia mbu esabe okhwirushira Kaisari, shikaali mbu endi neshifune shiokhusitaka eshialo shianje tawe. ²⁰ Khulwa eshifune shino, neshichira nemulanjire, mbu emulole, khandi emboole yinenyu, shichira ni khulwa obunayi bwa Israeli nobuchira endi khuminyololo chino. ²¹ Nabo nibamukalusia mbu, Fwesi shikhwayoolere khwo ibarwa yosi yosi okhurula ebuYahudi khulwa yuwe tawe, kata abulaho omuheerwa mulala owetsa okhukhuboolera, nohomba okhuboola obubi bubwo tawe. ²² Habutswa khwikomba okhubiire khwo eshia opaara: okhulondana nende omwaukho kuno, okwa khumanyire mbu kuyingasibwa buli habundu. ²³ Ne olwa bali nibamulachire inyanga; abandu abanji betsa ewa yamenyanga; yabo nabakambira nabaheresia obuloli khu akobwami bwa Nyasaye, nabahunzula okhulonda yesu, okhurula mumalako ka Musa nende abanabii, okhuchaaka khumukamba okhuula khubwiire. ²⁴ Mana abandi nibasubira ebindu biali nibiboolirwe, nabo abandi nibalasubira ta. ²⁵ Olwa shibaali nibalanyala okhuhulirisania ta, balekhana olwa Paulo yali niyakhaboola likhuwa elala lino, Roho Omutakatifu okhubirira mu munabii Isaya, yabaoolera ba Papa befu, ²⁶ Naye naboola, Tsia khu bandu bano, okhuhulira mulahulira, ne shimulamanyirisia ta; mulayenga ne shimulalola nimumanya ta: ²⁷ Okhuba emioyo chia abandu bano chiamala emiumu, amarwi kaabo namasiro kokhuhulira, natsio tsimoni tsiabo tsiatiimba; kalanyalikhana mbu balole ne tsimoni tsiabo, nibahulira namarwi kababo, nibamanyirisia mumioyo chiaabo, khandi babe abashuukhana, mana nasi ndalabahonia. ²⁸ Kho nikali kario, enywe mukhoyere okhumanya mbu obuhonia bwa Nyasaye buno bwamala okhurumwa khu Abamahanga, mana nabo balabuhulira. ²⁹ Ne olwa yali namalire okhuboola amakhuwa kano, Abayahudi basalana, nibaba bali nobuyingani obukhongo abeene khubene. ³⁰ Mana Paulo namenya emiyika chibiri emilamba munzu yiiye yokhurunga, naye niyenjisia balia boosi abamwitsiranga, ³¹ Nakambanga obwami bwa Nyasaye, khandi niyechesinjia amakhuwa khuMwami Yesu Kristo nende itswoni yoosi nabulaho owamwikalira tawe.