¹ Wichulisie abaandu khweyikhia asi khu bemirisi nende bala abali nende obunyala, nende khubaria, nende okhuba aberekekhe khu mirimo milayi; ² baranyeka omuundu yesi yeesi, baraba abakhusolana, babe abaandu balayi, nibekesia obwedemberefu bwoosi khu baandu boosi. ³ Khulwo khuba kata efwe bene fwesi khasi khwali nende amakesi khaba, khwali abakhayi, khwabachwa, nikhwaboywa nende obwekoombi nende chisangaalo chikabukhane, nikhwamenya mumabi nende bubacha, nikhusinyisibwa nende khusinyisia baandu bandi. ⁴ Arali obulayi bwa Nasaye omuonia wefwe, alala nende obukheeri bwaye khubaandu, ngolwa bwekulibwao, yanyoola okhuruonia; ⁵ khasi nikhubikhole bilayi ebia khwakhola khaba; arali khwaonisibwa khulwe sisa siaye, khubirira mukhwosibwa khwokhwibulwa khwa khabiri, nende khukalukhanisibwa khwa Roho Mulafu, ⁶ owa Nasaye yaruchukhakho mubwichufu khubirira khu Yeso Kirisito omuonia wefwe; ⁷ mbwe nikhumala okhubalirwa obulungifu khulwo bukoosia bwaye, khunyalirwe khunyoola obulaame bwaye obwobulamu bwechinyaanga chioosi, khulondana nende linaaya liefwe. ⁸ Likhuwa lino ni lio khwesika; ne esie ndakha ewe olomalome amakhuwa kano nojing'irisia, mbwe bala abasubira Nasaye bedinye khukhola emirimo milayi. Amakhuwa kano ni malayi, khandi kali nende ingaanga khu baandu boosi. ⁹ Arali orafukirira amareebo ko busiru, nende amakhuwa kechinjibulo, nende obusoolo, obuyingani bwamalako. khulwo khuba kabulamo ingaanga khandi kabula obukhoonyi. ¹⁰ Orafukirira omuundu wokhurera bukabukhani akari weng'we, niwakhamala khumukereka likhabi lia amberi nende elia khabiri; ¹¹ omanye mbwe omuundu kori oyo yakora, khandi ni mukholi wamabi, khulwo khuba yekhalakira esiina omwene. ¹² Ebikha bianjia okhurumira Aritema kose Tikiko, khola sinani wiche owa ndi ela Nikopoli; khulwo khuba ndakha khwikhala bwene eyo ebikha bie imboo. ¹³ Khola sinani orume Sena, owa malako ula, nende Apolo, ne barakhaya okhuba nende esiindu sia beenya. ¹⁴ Abaandu befwe boosi beeke okhwedinya mumirimo milayi, khulwa kala akenyekhana lwangu, mbwe baraba ababulamo ebiamo. ¹⁵ Abaandu boosi abali alala ninange bakhukhesia. Murukheserie bala abarukheera mubusuubiri. Obukoosia bube ninang'we mweesi.