¹ Malaika wa kharano yamala niyoba oluika lwaye ndabona ing'ining'ini okhurula mwikulu eyali nikwire khu sialo. Ing'ining'ini yaberesibwa lufunguo olwa elina liali nilichira khu lina elirali nende esiakamo. ² Yafungula elina lirali nende esiakamo ne omwosi nikuniina akulu khurula mukari mwe lina kori omwosi khurula mutanuru ikhoongo. ³ Mukari mwo mwosi echisike chiarula khwicha akulu we sialo, echio chaberesibwa amaani kori kalia aka chingoberenyanja akulu we sialo. ⁴ Chialagirwa mbwe chiranyasia amasafu musialo kose esiraake siosi siosi esia masafu kose omusaala, arali abaandu sa abarali nende esibalikho sia Nasaye imberi wa obweni bwabwe. ⁵ Khasi chaiberesebwa obunyala obwo okhwira abaandu abo, arali okhubasandia sa khumiosi kirano. Obuchuuni bwabwe bwali kori obwokhulumwa nende ingobera nyanja niimulumire omuundu. ⁶ Muchinyanga echio abaandu bakhakonye elifwa, ni khasi bakhalinyoole. Bakhekoombe khufwa, ne elifwa liakhaberukhe. ⁷ Chisike chifwanana nende chifarasi charekekherwa eliye. Khu mirwe kiabe khwali nende sindu kori isimbi ye idakhabu ne obweni bwabwe bwali kori obwa baandu. ⁸ Chiali nende lifwiri kori elia bakhasi ne ameno kachio kori akeidalang'i. ⁹ Chiali nende birifu bia ichuma ne idoboosi ya chimbaya chiabwe chalira kori idoboosi ya chimotoka chinyingi echieliiyie nende chifarasi chirukha nichichia muliiyie. ¹⁰ Chiali nende emikhiinga ekiluma kori ingoberanyanja: khu mikhira kiebwe chiali nende amaani kokhunyasia abaandu khu miosi kirano. ¹¹ Bali naye kori omuruki wa malaika wa lina libula esiakamo. Elira liaye mulwiburania ni Abadoni naye muluyunani ari nende lira Apolioni. ¹² Uuwi yamberi ibirire, lingala lunyuma lwa lino khuli nende amandinyu kabiri keecha. ¹³ Malaika wa khasasaba yoba luika lwaye, mani nimbulira idoboosi khurula lubeka lwa obwali bwa idakhabu obuli imberi wa Nasaye. ¹⁴ Idoboosi yamuboolera malaika wa khasasaba owali nende olwika, "Balekhule malaika bane balia ababoywa mu mwalo mukhongo Efrata". ¹⁵ Malaika balia bane abali nibarekekhwe khulwa elisa elio likabule inyanja eyo, mwosi okwo, nende omwaka okwo, balakherwa beere abaandu bola ebimeka bidaru bia baandu. ¹⁶ Obuungi bwa abamayie abali akulu we chifarasi bwali chielefu makhumi kabiri okhula chielefu ekhumi ndabulira obuungi bwabwe. ¹⁷ Luno nilwo olwandabona chifarasi mumalolol kange nende abali nibaninire akulu wachio: birifu biabwe biali biakhanyu kori omuliro, buluu inyengu. nende namuki iraali inyengu. Mirwe kia chifarasi kiafwanana nende mirwe kia idalang'i, muminwa kiabwe muliro kwarulamo, omwosi nende sibiriti. ¹⁸ Esimeka sia kha daru esia abaandu beerwe nende amakhubake kadaru kano, muliro, mwosi nende sibiriti ebiarula muminwa kiabwe. ¹⁹ Okhubeera amaani ka ifarasi kari muminwa kiabwe nende emikhira kiabwe - khubeera mikhira kiabwe kiali kori injukha, bali nende emirwe ekiabekhonyeranga okhura makonjo khu abaandu. ²⁰ Abaandu badong'a balia, abali basiri okhwirwa nende makhubake kano, khasi bekanire ebikhole biabwa ebia bali nibakholere kata khasi balekha okhwinamira ebikhieno nende minasaye ekie idakhabu, isende, omugasa, amakina nende emisaala ebindu ebio ebiranyala okhulola okhubulira kose okhukenda. ²¹ Kata khasi bekanira obwiri bwabwe, obulosi bwabwe, obuyirani bwabwe kose chingira chiabwe echia obwiibi.