¹ khandi sauli yahujilila likhutsa lyelye.lidambitsa likali lyaranga khu livukana lyali mu litala lya yerusalemi; na valondi va yesu vosi vasalanyinywa mutsisomo tsyosi tsyi ivuyuda khandi samaria,nivakhali varuma vonyene. ² vandu vali vihaana khu nyasaye vayavila mmbili kwa stefano navo valila tsikhwili tsyu khwikhula ni shivela shikali. ³ navutsa saulu yajelitsa khutivitsa likanisa, niyinjila vuli munzu,nakhwesesa vandu vosi vastsa na vakhali, navahila mushivoho. ⁴ khu lwa yako vandu vali nivasalanyinywe, vatsia vuli havundu hosi nivalwatsa likhuva. ⁵ filipo naye yatsia natukha mu litala lya samaria navilwatsila kristo ⁶ na vandu nu mwoyo mulala vahulikhitsa makhuva ka filipo yali navolelanga,nivahulilanga nivalola vilolekhitso vya yakhola. ⁷ shichila madimoni karula mu vandu vanyikhi vakali kamenyamu, nikahanzukhanga,na vanyikhi vali ni vafwokoya khandi valeme vosi vahonyinywa. ⁸ vwaliyo vuyanzi vunyikhi mulitala yelo. ⁹ navutsa khwaliyo nu mundu mulala mulitala yalangwa simioni,yalingi mulochi,yolokanga vandu va samaria, niyimanyinya ndi yali mundu wi shivune. ¹⁰ vasamaria vosi khurula khu vana khutukha khuvasakhulu vamuhulikhitsanga, nivavola, mundu uyu natsyo tsingulu tsya nyasaye tsingali. ¹¹ na vamuhulikhtsa shichila inyinga indambi yali yavachenyinya ni liloko lyelye nuvulakuli. ¹² navutsa lwa vasuvila filipo lwa yilwatsa ivangeli ya makhuva malahi ku vwami vwa nyasaye ni lira lya kristo, vinwa mmatsi, vosi vasatsa na vakhali. ¹³ khali simioni mwene yasuvila,na lwa yali niyakhinwa mmatsi yatsililila khumenya na filipo,naye yali nilichenya, lwa yalola vilolekhitso nende vindu vyu khuchenyinya nivikholekhanga. ¹⁴ lwa varumwa vali yerusalemi vahulila ndi samaria vahuchilile likhuva lya nyasaye, varuma yo petero na yohana: ¹⁵ lwa vatukhayo, vavasalila vanyole roho mutakatifu. ¹⁶ shichila khutukha inyinga yeneyo, roho mutakatifu yali nashili khwikhakhu khali khu mulala wavo: navutsa vali vutsa vabatiswa mu lira lyu mwami yesu. ¹⁷ na petero na yohana vavavikhila mikhono chavo, navo nivanyola roho mutakatifu. ¹⁸ lwa simioni yalola vandu nivanyolanga roho mutakatifu khuvirila khuvikhilwakhu mikhono cha varumwa,yajelitsa khuvaha tsisendi. ¹⁹ navola mumbekhu vunyali yuvu,khali ize mundu wosi wambikhilakhu mikhono chanje anyole roho mutakatifu. ^{23 20} navutsa petero yamuvolela, tsisendi tsyotsyo tsidive halala niwe,shichila ukanakananga shihanwa shya nyasaye shikulwangwa ni tsisendi. ²¹ yiwe shuli nilisanga inoho shitonye mu makhuva yaka, shichila mwoyo kwokwo shikuli vulunji na nyasaye tawe. ²² khu lwa yako wikanile vwonekhu vwovwo yuvu, usale khu mwami,nava nayanza akhulekhele inganakani yu mwoyo kwokwo. shichila ndolanga uli mululu khuli vwi indulwe khandi mushivoho shyu vwonekhu. ²⁴ simioni yarevula navola,munye musalile khu mwami vene khu shindu shyosi shya muvoli shivule khwikholekha khwinze. ²⁵ lwa vamala khulolekhitsa nu khwilwatsa likhuva lyu mwami,petero na yahana vakalukha yerusalemi, ni vilwatsa ivangeli mu mikitsi minyikhi cha vasamaria. ²⁶ na injelosi yu mwami yamoloma na filipo , ni vola, rula utsi luveka lwi isavalu, khu injila ikholomokhanga khurula yerusalemu khutsia mu litala lya gaza,injila yeniyi ili mushangalangwe. ²⁷ yarula natsia, henza,khwali nu mundu khurula mushivala shya kushi {eziopia},mundu shitsili yali nuvunyali nahinziranga hasi ha kandake,mukhali wamihanga vandu vosi va kushi {eziopia}, naye yali musinjilili wi we vuruji vwevwe. yali niyitsi yerusalemi khusala. ²⁸ yali nakalukhanga mushivala shyavo niyakhali mulikale lyelye,khandi yali nasomanga shitabu shyu muporofeti isaya. ²⁹ na roho yavolela filipo, yisunde himbi na uvele himbi ni likale lyelye. ³⁰ na filipo yavatsukha natsia himbi naye,nahulila asomanga shitabu shyu muporofeti isaya, namureva,uli nilimanya lya makhuva ka usoma yaka? ³¹ naye yamuvolela, nyala khumanya ndina mundu nakhanzivalile? yinjilitsa filipo mu likaale lyelye nivakhalamu naye. ³² tsimbaso tsya mang'odo tsyu mundu mweneyo yali nasomanga tsyali, yahilwa khuli likondi lizitsanga khusinzwa, khandi khuli mwana wi likondi ali imbeli wa vaveki va maswa keke muvuhonjeru, khandi shiyakhunulakhu munwa kwekwe tawe. ³³ vamuha tsisoni vuchila khumukholela kakilikali: ni wina unyala khwivaala lwivulu lu vitsukhulu vyevye?shichila liva mwoyo lyelye lyarulitswaho mulilova. ³⁴ khandi shitsili yareva filipo, navoola, khusayanga,umbolele muporofeti uyu amoloma khu wina, khuye mwene inoho mundu wundi? ³⁵ na filipo yakhunulwa munwa kwekwe, narangila vutsa khu luvaso lwenolo, namwilwatsila yesu. ³⁶ lwa vali nivatsitsanga khunjila, vatukha ha matsi kali nikali na shitsili navola, lola,matsi yaka; ni shina shinyala khunzikalila mbule khwinwa? ³⁷ filipo yamuvolela, nuva nusuvila nu mwoyo kwokwo kwosi, unyala khwinwa.naye yamurevulila namuvolela,suvile ndi yesu kristo nu mwana nyasaye. ³⁸ naye yasinjilitsa likaale lyelye,navo vosi nivikha mumatsi, filipo ni shitsili, naye yamwina mmatsi. ³⁹ lwa varula mmatsi, roho wu mwami yachinga filipo namuhila ihale, na shitsili shiyamulolakhu khandi tawe, navutsa yatsia muluchendo lwelwe nasangalanga. ⁴⁰ navutsa filipo yalolekha mu litala lya azoto navirila mulusomo lwenolo niyilwatsanga ivangeli mu mataala kosi khutukha lwa yatukha kaisalia.