¹ khandi mundu mulala yalangwangwa anania, halala nu mukhali wewe safira vakulitsa khu mulimi kwavo, ² navo nivavisa khu shitonye shyu vukuli, mukhali wewe yamanya yaka kosi, nivahila shitonye shyali nishirikale, nivavikha hasi hi vilenje vya varumwa. ³ peter yavoola, ''anania shichila shina nuhuchilila shetani khwitsula mu mwoyo kwokwo uvehele roho mutakatifu nukhuvisa shitonye shindi shi tsisendi tsyu kulize mulimi? ⁴ luvele nushili khukuliza mulimi kwenoko, shikuvele tsa nukuli kwokwo, khandi lukulize, tsisendi tsyenezo tsyosi shitsivele tsyotsyo? shichila shina ukanakane shindu khuliyishi mu mwoyo kwokwo khukhola ndiono? yiwe shuvehele vandu tawe, navutsa uvehele nyasaye.'' ⁵ lwa anania yahulila makhuva kenako, yakwa hasi nakhutsa,na vuli mundu wosi yahulila kikholekha yali nuvurii. ⁶ vayayi valaho vasinjila nivalingila muvili kwekwe muluvala,nivatsia khuyavila mushilindwa. ⁷ tsisa tsivaka ni tsiakhavira, mukhali wewe yitsa niyinjila, nakhamanyi shyali nishikholekhe. ⁸ petero yamuvolela, ''mbolela nikava mukulize mulimi tsisendi yitsi.'' naye yarevula navola, ''nyee, khukulize ndio.'' ⁹ petero yavolela safira, ''shichila shina muhulikhitsane nu musatsa wowo khuchelitsa roho wu mwami? henza,vilenje vya vasatsa vatsile khuyavila musatsa wowo mushilindwa vali hamuliango, khandi valakhujinga yiwe vakhuhile ilwanyi.'' ¹⁰ nonoho yakwa hasi hi vilenje vyevye nakhutsa.lwa vayayi vinjilamu,vanyola nakhutsi, nivamujinga vamuhila ilwanyi, nivayavila mushindwa himbi hi shilindwa shyu musatsa wewe. ¹¹ vandu vi likanisa na vandu vandi vosi vatechela lwa vahulila vindu vyali nivikholekhe. ¹² vilolekhitso nende vindu vyu khuchenyinya vinyikhi vikholekha khuvirila khu mikhono cha varumwa.vandu vosi vasuuvila vakanilanga mu lusimbu lwa slolomoni. ¹³ mundu avulakhuho yachelitsa khuhambana navo, navutsa vandu vavaha luyali. ¹⁴ vandu vasuuvila vatsililila khumetekha khu luveka mwami,vituma vya vandu vastsa na vandu vakhali. ¹⁵ khandi vachinga vandu valwale nivalerwa khunjila, nivavakonyinya khu vitali nu khuviselo, khu lwa petero ava naviranga, nambula shinini shyeshye shavakwila. ¹⁶ khandi vandu vitsa muvituma vinyikhi khurula mu matala kali himbi yerusalemi, valera valwale na vandu vosi va matimoni kanyakhitsinga, na voosi vahonyinywa. ¹⁷ mukali wa vasalisi nende mukanda kwa vasadukayo valolela varumwa imbotokha, ¹⁸ vakumila varumwa nivavavoha mushivoho. ¹⁹ navutsa mu vutukhu vwenovo injelosi yu mwami yikula miliango chu mishivoho nivarulitsa ilwanyi, nivavolela, ²⁰ mutsi musinjile mulitempeli mwilwatsile vandu mukhuva kosi ki liva mwoyo. ²¹ lwa vahulila yaka, vinjila mu litempeli nu vwenya khusha ni vekitsa.navutsa mukali wa vasalisi vosi yitsa, na veshe va yali navo,nivalanga shiina nu mukanda kwosi vasakhulu visiraeli, nivarumanyinya varumwa valarwe khurula mushivoho. ²² navutsa vasikali vavaruma vavanyola mushivoho tawe, nivakalukha nivavavolera, ²³ khunyoli miliango chu mushivoho nichikale vulahi,khandi vasikali nivasinjile hamuliango, navutsa lwakhwikule muliango, khunyolikhu mundu mukari tawe. ²⁴ musalisi mukali nu mukali wa vasinjilili wi litempeli lwa vahulila makhuva kenako,vali nilichenya linyikhi khulondekhana khu shindu shyali nishikholekhe khu varumwa. ²⁵ mundu mulala yitsa navavolela, vandu vamuvele numuvohi, vasinjile mulitempeli vakitsanga vandu. ²⁶ ma munyapala yatsia halala na vasikali nivavalera navutsa vuchila tsingulu; shijila varia vandu,vali vanyala khuvalasa na majina. ²⁷ lwa vali nivakhavalera, vavasinjilitsa imbeli wi shina.musalisi mukali yavarevelitsa, ²⁸ navola,khwamukaya nukhumulaka muvule khwekitsakhu vandu mu lira lya yesu, navutsa, henzi,mekitso kenyu kitsule mu litaala lya yerusalemi, nakhandi mwenya khulera masayi ku mundu uyu khu khutse. ²⁹ navutsa petero halala na varumwa vandi varevula ni vavola, kakhutukhilanga khuhulila nyasaye khuvira vandu. ³⁰ nyasaye wa vakuka veru yisimukhitsa yesu, wa mwira khuvirila khumusunga khu musalaba. ³¹ nyasaye amali khumuchingula khu mukhono kwekwe mulunji khuva mwami khandi muhonyinyi,khulera likanila khu visiraeli khandi lilekhelwa lyu vwoni. ³² khutse khuli valolekhitsi vi vindu yivi halala na roho mutakatifu, wa nyasaye yaha yavo vosi vamuhulilanga. ³³ lwa vahulila yaka, vavihilitswa ni venya khwira varumwa. ³⁴ navutsda mufarisayo mulala yalangwangwa gamalieli, mwekitsi wa malako yali niyahelwa luyali na vandu vosi, yasinjila mu shina navola varumwa vahilwe ilwanyi khu vwiyangu vutiti. ³⁵ na yavavolela, munye vandu visiraeli, mwihenze khu kamukanakanga khukholela vandu yava. ³⁶ shichila matukhu yaka nikashili khutukha, mundu mulala wavalanganga theuda, yarulila navola nu mundu wishivune, na vandu himbi tsimia tsinne vamulonda. yamanya niyirwa, na vandu vosi vali nivamulondi vasalana nivava vutsa. ³⁷ lu mundu uyu yali niyakhakhutsa, yuda wa galilaya yarulila khandi mumatukhu ku khuvalitsa vandu nakhwesa vandu vandi nivamulonda. khandi naye yativa, na vandu vosi vamulonda vasalana. ³⁸ muvolelanga, mulekhane na vandu yava, shichila nikava mihinzi yiji nija vandu, jilakora vutsa. ³⁹ navutsa niva ni mihinzi cha nyasaye, shi mulanyala khuvikalila tawe; khali mulinyola nu mukwananga na nyasaye. ⁴⁰ khandi vahuchilila khu makhuva keke.valanga varumwa ni vinjila, nivavakhuva khandi nivavakaya vavule khwekitsakhu vandu mu lira lya yesu, nivavalakhula vatsi. ⁴¹ navo varula imbeli wi shina nivasangalanga ndi vavalitswe khutukhila khulekanyinywa shichila lira lya yesu. ⁴² na vuli litukhu mulitempeli, vatsililila khwekitsa nu khwilwatsa makhuva malahi ka yesu kristo.