¹ vamwavo na vise veru,mbulikhitsi lwa mbolanga makhuva kanje ku khwishinga imbeli wenyu. ² lwa shituma shya hilila paulu navamolomelanga mu lumolomo lu luheburania,vahonjela likali: navola, ³ inze ndi muyahudi,yivulwa mu litala lya tarisa mu lusomo lwa kilikia,navutsa ndatukhila mu litala yumu hasi hu mwekitsi ulangwa gamaleli.ndekitswa khulonda malako vutinyu khulondekhana mu malako ka vakuka veru,khandi ndali ndayihana khu nyasaye, khuli munye muli nundi. ⁴ ndadambitsa vandu valonda injili yiyi khali nukhuviira,ndavavoha nukhuvahila munzu ya vavohe vosi halala vasatsa na vakhali. ⁵ khuli musalisi mukali na vasakhulu vosi vanyala khulolekhitsa:vamba tsibalua tsya vamweru mu litala lya damasika, na ntatsyayo nivalera yerusalemi nivavohelwe vasalilitswe. ⁶ kikholekha lwa ndali khuluchendo nindi himbi khutukha damasika,himbi tsisa sita tsyumbasu vulavu vukali khurula mwikulu vwakha nivukhumbelitsa. ⁷ inze ndakwa hasi nimbulila mwoyo nikumbolela, saulu,saulu,shichila shina untambitsanga inze? ⁸ inze ndarevula, yiwe uli wina,mwami? naye yambolela, inze ndi yesu wa nazareti,wutambitsanga. ⁹ yavo vakhwali navo valola vulavu nivaria; navutsa shivahulila mwoyo kwamoloma ninze. ¹⁰ ndareva, khole shina, mwami? mwami yambolela inze,sinjila utsi mu litala lya damasika,iweneyo valakhuvolela shindu shyosi shya warovolelwa khukhola. ¹¹ shindali nyala khulola tawe shichila vulavu yovo vwang'ang'a likali,na vandu va khwali navo vankumila mukhono nivatsimilila khutukha mu litala lya damasika. ¹² iweneyo ndakanayo nu mundu yalangwa anania,mundu yali niyihana nu mwoyo kwosi khulonda ka malako ka musa kavolanga na khandi vayahudi vosi vamenyayo vamolomanga khuye vulayi. ¹³ ,yitsa nasinjila himbi khu inze,navola, amweru saulu,unyole khulola,isa yeneyo,tsimoni tsyanje tsikukha nimulola. ¹⁴ nambolela,nyasaye wa vaise veru akhurovole yiwe khumanya lyenya lyelye, khulola mulunji wewe khandi khuhulila mwoyo kwekwe nikurulanga mu munwa kwekwe mwene. ¹⁵ na iwe ulava mulolekhitsi wewe khu vandu vosi khulondekhana ni vindu vyu loli nu khuhulila. ¹⁶ khu ulinda shina? sinjila, winwe mmatsi,wokitse vwoni vwovwo,wanile khu lira lyu mwami. ¹⁷ lwa ndakalukha mu yerusalemi, na lwa ndali nindi mu litempeli nisalanga, ndarenjetsa; ¹⁸ ndamulola,nambolela, khola vwangu urule yerusalemi,shichila shiviyema lilolekhitsa lyolyo khulondekhana khu inze tawe. ¹⁹ inze ndavola, mwami,yava vene vamanya ndi inze ndavoha vandu,nivahula yavo vosi vali nivasuvila mu iwe vuli mu lisinagogi. ²⁰ lwa viira stefano mulolekhitsi wowo,ndali nisinjiliho khandi nisanganga khu liirwa lyelye khandi ninindi tsinguvu tsya vandu va mwiira. ²¹ navutsa yambolela, tsia, shichila ndakhurma ihale wene khu vandu vitshili. ²² vamuhulikhitsa khutukha lwa yavola yaka.nivalangilila navavola mundu uyu yiirwe,shyatukhane khumenya tawe. ²³ ,lwa vali nivalangilitsanga nivachinga tsyinguvu tsyavo mwikulu khandi nivasuva lukushi muvushindu, ²⁴ mukhongo wa vasikali yahala lilaka paulu yinjilitswe munzu ya vasikali vamenyamu,navola arevelitse marevo nalandulwa, khu khali ye mwene amanye shivune shichilanga vandu nivakhuvila paulu liyoko ndiono. ²⁵ lwa vali nivakha muvoha ni mikoye, paulu yareva musikali yali nasinjile himbi khuye, malako kavolakhu mulandule mundu muroma ashili khuyalwa? ²⁶ lu musikali yahulila ndio, yatsia khu mukhongo wa vasikali namuvolela, namureva, wenya khukhola shina, mundu uyu yivula mushivala shyeru shya varoma. ²⁷ mukhongo wa vasikali yitsa namureva,mbolela,yiwe uli muroma? paulu narevula nyee. ²⁸ mukhongo wa vasikali yamuvolela,inze ndarunga mirungu minyikhi khukholwa muroma.navutsa paulu yamuvolela inze ndivulwa muroma. ²⁹ khu vandu vali nivatsitsa khumureviltsa marevo vamulekha vwangu.mukhongo wa vasikali khandi yali nuvuri, lwa yamanya ndi paulu ni muroma, naye amuvohi ni mikoye. ³⁰ litukhu lilondakhu,mukhongo wa vasikali yenya khumanya shivune shichila vayahudi nivayala paulu. khu yamuvoholola vivoho nalaka vasalisi vakali na vandu vi shina vosi vakane halala, nalera paulu hasi namuvikha hakari havo.