¹ lwa liyoko lyali nilikhawa, paulu yalanga veeki navatinyilitsa,navasevula nasimukha natsia makedonia. ² lwa yali niyakhavirila mutsisomo tsyenetso tsyosi,khandi niyakhavatinyilitsa na makhuva manyikhi,yatukha kreeke. ³ lwa yali niyakhamenyayo mieli chivaka,vayahudi varanga khulokhitsa khuli vanyala khumwira lwa yali nali himbi khwambukha atsi mushivala shya siria,khu yakanakana khukalukha avirile mu lusomo lwa makedonia. ⁴ vandu vamulonda khutukha mu lusomo lwa asia vali sopateri,mwikhula wa pirrihi khurula mu litala lya berea; arisitariko na sekunda,vosi vi litala lya tesalonike,gayo wi litala lya deribe, natimateo;tikiko na trufima khurula lusomo lwa asia. ⁵ navutsa vandu yava vimila imbeli nivakhulindila mu litala lya turoha. ⁶ khwambukha khurula mu litala lya filipi inyuma matukhu ku khulia mukati khuvula mamela,na khwachenda matukhu karanu nikhuvatukhila mu litala lya turoha.nukhumenyayo lisitsa lilala {matukhu saba }. ⁷ litukhu lyukhuranga khwisitsa,lwakhwali khwakani khumeka mukati,paulu yamoloma na vasuuvili.yali niyerechekhanga khusimukha litukhu lilondakhu,yilwatswa muvurambi khutukha muvutukhu hakari. ⁸ khwali ni tsitaha tsinyikhi wa khwali ni khwaakanile. ⁹ muyayi yalangwa eutike,yali niyikhale mulitilisha na tsindolo nitsimuhila.lwa paulu yatsililila khwilwatswa,muyayi uyu,nashikonanga, yakwa khurula mukolofa yakhavaka nivatola hasi nakhutsi. ¹⁰ paulu yikha hasi,namukhumbelela,navavolela, mukhahendi mwyo tawe,shichila ashili mwoyo. ¹¹ paulu yakalukha ikulu mukolofa,nameka mukati nalia,natsililila khwilwatsa khutukha mavwevwe,narulayo. ¹² vavukula muyayi mweneyo nali mwoyo nivamuhila ingo,nivaleminywa mu mioyo muno ¹³ khutse khwatsia imbeli wa paulu mu meli nukhwambukha nukhutsia mu litala lya asosi,wa khwenya khuninye paulu mu meli,shichila yenya khuchenda khu vilenje khutukha iweneyo. ¹⁴ lwa khwakanila asosi,khwamwinjilitsa mu meli nikhutsia khutukha mu litala lya mitilene. ¹⁵ litukhu lyalondakhu khwambukha nikhurulayo,nikhutukha mu litala lya kihosi.litukhu lya khavili lyalondakhu,khwambukha nikhutukha mu litala lya samosi,na litukhu lyalondakhu khandi khwatukha mu litala lya miletu. ¹⁶ shichila paulu yali ninganagani yukhutsililila nu luchendo lwelwe vuchila khuvirila mu litala lya efeso,shichila shi yenya khumala vwiyangu vwevwe mu lusomo lwa asia,yenya khutukha yerusalemi,nikanyalikha khulitukhu lya penteskosti. ¹⁷ khurula mu litala lya miletu,yarumanyinya likhuva mu litala lya efeso nalanga vasakhulu vi likanisa vakane navo. ¹⁸ lwa vatukha yavavolela,munye vene mwamanya, khurula litukhu lyu khuranga lya ndasena shilenje shyanje mu lusomo lwa asia,khuli ndamenya na munye. ¹⁹ ndarumikhila mwami nu mwoyo ku khwichehitsa nukhulila,na machelitso kandavirilamu khuli lwa vayahudi valokhitsa khuli vanyala khunzira. ²⁰ mwamanya shindamuvisakhu shindu shyosi shyali shyu vokhonyi khu munye,lwa ndamwilwatsilanga havulavu khandi mu tsingo tsyenyu, ²¹ ndalolekhitsa khu vayahudi na vakuriki ndi vikanile khurula mu vwoni khu nyasaye,khandi vasuvile mu mwami weru yesu kristo. ²² henzi,lwenulu nziza yerusalemi,mwoyo kwanje kutinyi, shichila shimanya katsitsa khwikholekhayo khwinze tawe: ²³ navutsa roho mutakatifu andolekhiziranga vuli mu litala ndi livohwa ni shivi vinindanga. ²⁴ navutsa shimbalitsanga liva mwoyo lyanje khuva shindu khuinze,ndenya vutsa khurwekitsa mihinzi chyu mwami yesu kristo yamba,khwilwatsa ivanjeli yi tsimbavasi tsya nyasaye. ²⁵ lwenulu,loli,manya likali munye vosi vandachendimu nindilwatsanga vwami vwa nyasaye,mundolakhu khandi tawe. ²⁶ khu lwayako valolekhitsiranga litukhu lya lero,masayi ku mundu wosi kalikhu khu inze tawe. ²⁷ shichila shindavisakhu shindu shyosi khumunye lwa ndamwilatsila lyenya lyosi lya nyasaye. ²⁸ mwilinde munye vene,ni shayo shyosi shya roho mutakatifu yamurovola khuva valindi.muve vayi valayi vi likanisa lya nyasaye,lya yakula na masayi keke mwene. ²⁹ manyi likali lwamba nindakharulaho,vihulukhu vilulu viltsa hakari henyu,na shivilavelelela shayo tawe. ³⁰ khali khurula mu munye vene,vandu valarulila nukhukoyanyinya kakilikali,khu vakhwese veeki vavalonde. ³¹ khu lwayako mwilinde,na mwitsukhitse khu mihika chivaka shindalekha khumwekitsa shyavuli mulala khumunye vutukhu nu mbasu nindilinga malika. ³² lero muvikhanga khu nyasaye nu khulikhuva lyelye litsimbavasi,linyala khumumbakha nukhumuha vukasu halala na yavo vosi vatakaswa. ³³ shindikombakhu ifeza,inoho izahabu inoho inguvu yu mundu wosi tawe. ³⁴ munye vene mwamanya ndahinzila ni mikhono chyanje khunyola shyanyanya halala nende va khwali navo. ³⁵ muvindu vyosi ndamumanyinya khuli munyala khukhonya vandu vatetekhele khuvirila khukhola mihinzi,nu mwitsukhitsa makhuva ku mwami yesu, khuli yavola, khuhana khuli nuvukasu vunyikhi khuviritsa {khuvukula} khunyola. ³⁶ lwa yali niyakhamoloma vindu yivi,yasikama hasi nasala navo vosi. ³⁷ vosi valila vutinyu,nivakhumbelela paulu mwing'ori nivamuvusa. ³⁸ vali ni shivera shikali shichila ka paulu yali navavolele,ndi shivalamulolakhu khandi tawe.vamuhelekhitsa natsia khunina mumeli.