¹ Omwochi ng'olyondoni werikwok, 'bikyu!' ak omwochi tibikwok, 'kikeboruok rirenet"' ² Ogaigai komet, ogaigai; amu ma osotionnyu, ama a manong'otionnyi: ingoisto kugoinatennyi amata kotebe tainnyi eng kwenutab kinaikyi. ³ Si maregune ngoroikyi, ak ayai koigei betut ne kigisicheei, ayai inendet koek karatia, ak ayai inendet koigei emet ne yamaat, abare inendet melelda. ⁴ Ak marire lagokyi; amu lagokab kugoinatet icheket. ⁵ Kigoyai kugoinatet kamenwa; inendet ne kimanach icheket, ko kigoyai tewernatet ne o. Amu kile, "Awendi ole mi chamanikyu, che kona makatiannu ak beko che aee, koboto kororikyu ak katanisiek, mwanik ak che aee." ⁶ Noto anyun, keero, ang'ote oreng'ung' katok, ak ayai irimet si manyor inendet ortinwekyi. ⁷ Ak kwo korub ole mi chamanikyi, ago manamei icheket ak kocheng'at icheket, ago manyoru. Kole anyun inendet, " Awendi ak aweekyige manong'otionnyu ne bo tai; amu kigaigai eng' ane betusiechoto kosiir nguno. ⁸ Amu kima kongen kole ane ne kiagochi beka, ak divaik che kieei, ak mwanik,ak atesyi feda ak tahabu, che kichopchi icheket Baal. ⁹ Noto anyun aweeksei kogeny ak aib bekyi ak divaik eng' betusiekab kesisiet. Ak asaree kororikyi ak kataninnyu che kiga kigochi kotuge ach ingornatennyi. ¹⁰ Ak nguno ang'anye anyun kotook tewernatennyi eng' taitab chamaniky, ama biitu chi nesoru eng' eunnyu. ¹¹ Ak ayae kogeny kowong'gei boiboiyennyi, koboto igorwekyi ak che bo ye kaleel arawet, ak sabatosiekyi, ak tuiyosiekyi tugul che eechen. ¹² "Ak ang'em ketikyi che bo sabibuk ak magoonikyi, choto che kimwa kole, chu ko konunoik che kigona chamanikyu: ak ayai koek timdo, ak koam tiong'okab kewanin. ¹³ Ak agergong' inendet agobo betusiekab Baalik, che kibeeljini inendet ichek nyamdutik; ak kilelesanjigei eng' munaok ak tugukyi che bo lelesta, ak kiwa kosubot chamanikyi-ak koutiena, mwoei Jehovah." ¹⁴ Noto anyun ogeero, agaigai inendet, ak amut kwo ong'atet, ak amwachi ng'alek che agoigoe. ¹⁵ Ak agochi mbarenikab logoek eng' oloto, ak agochi koek kurgetab kamang'unet atebwetab Akor: ak kotien eng oloto, ko u eng' betusiekab mining'natennyi, ak ko u eng' betut ye kitogosu komong'u eng Misri. ¹⁶ "Ak eng betunoto-mwoei Jehovah kole oguurena, 'maning'otiondenyu ' ama ogureeno, 'Baalinnyu' ¹⁷ Amu aistoii eng kutinnyi kainaikab Baalik, ama kibwoti ichek kogeny eng kainaikwai. ¹⁸ Ak ayai arorutiet eng' betunoto koboto tiong'ikab timin agobo ichek, ak koboto taritikab kipsengwet, ak che ichuutegei ing'ony: ak aiste eng' emet kwanget ak rotwetab chok ak luget eng' emet, agochi koruiyo eng' chametab gei. ¹⁹ Ak atunin ibunja koigeny; ee, atunin ibunja eng' imanda, ak eng' kiruogetab iman, ak eng' chamnyet ne tala, ak eng' rirenosiek. ²⁰ Atunin ibunja eng' imanda: ak inai Jehovah. ²¹ Ak awolu eng' betunoto, mwoei Jehovah, awoljini kipsengwetisiek ak komwochi ichek ing'ony; ²² ak kowol ing'ony eng' bek, ak divaik, ak mwanik; ak kowolji ichek Jesreel. ²³ Ak agoljige inendet eng' ing'ony; ak arire inendet ne kimanyor rirenet; ak alenji ichek che kima ko bikyuk, O bikyuk; ak komwa kole, I Kamuktaindennyu.