¹ Paulo, ne kiyoktoi ne bo Kristo Jeiso eng magetab Jehovah ak Timoteo tupchenyo, ² kisirjini bikab Jehovah che tililen che kitupche che iyanotin eng Kristo che mi Kolosaik. Ingotebi kobotok mieindo ak kalyet che bunu Jehovah Kwandanyo. ³ Kiwekchini kongoi Jehovah Kwandab Kiptaiyandenyo Jeiso Kristo, ak kesoiywok kotugul. ⁴ Kigegas agobo kayaneng'wong eng Kristo Jeiso, ak chamnyet ne oting'e bikab Jehovah tugul che tililen, ⁵ Amu kamangunet ne kigegonoruok eng Kipsengwet, ne kiosib ogas eng ngolyotab imanda, ne bo logoiwek che tililen, ⁶ ne kigoitwak. Kou ole teptoi logoiwek che tililen koiyei logoek ak ko tesokse eng ngweny komugul- ko u eng akwe kongete betut ne kiogas ak onai miendab Jehovah eng iman. ⁷ Nito ko logoiwek che tililen ko u ye kionetge eng Epapra, chamanenyo ne kiboisiei tugul, ne kiboitiot ne iyanat ne bo Kristo agobo ache. ⁸ Kimwawech Epapra chamiengwong ne mi eng Tamirmiriet. ⁹ Amu eng chamioni anyun, ko magimete kesae agobo akwe. Kisae kele konyiiak naetab magenyi eng ng'omnatet tugul ne bo tamirmiriet ak kaguiyet. ¹⁰ Si obendate ko u ole nyolu eng Kiptaiyat, ne iboiboi inendet eng oret age tugul: oiiye logoek eng boisiet age tugul ne kararan, ak otesage eng naetab Jehovah, ¹¹ kigimitok eng kamuktaet tugul, ko u kamugetab torornatenyi, agoi muitaet tugul ak kagenisiet eng boiboiyet ¹² owekchini kongoi Kwanda, ne kiyaech keegu che nyolchini keimte borotetab che tililen eng lapkeiyet. ¹³ Ne kisoruech kemongune kipnatetab mesundeito, ak kouutech kebe bounatetab werit ne bo chamnyenyi; ¹⁴ Ne eng inendet ketinye katiagenyo, nyoetab kaat ne bo tengekwogikyo. ¹⁵ Inendet itondab Jehovah ne ma toogu, inendet ne kiboretiet eng tuguk tugul che kigiyai. ¹⁶ Amu kigitoi keyai tuguk tugul eng inendet, che mi Kipsengwetisiek ak che mi ngweny, tuguk che toogu ak tuguk che ma toogu. Ngo ngecherokab torornatet anan ko laitornatosiek chebo barak, nda ko bounatosiek nda ko kimnatosiek, kigiyai tuguk tugul eng inendet ak ko bo inendet. ¹⁷ Ak ko bo tai inendet eng tuguk tugul, ak tonondos tuguk tugul eng inendet. ¹⁸ Ak inendet metitab borto, noto kaniset. Inendet ko taunet, kiboretietab che kimong eng che kikomeyo, si kobiit koek ne bo tai eng tuguk tugul. ¹⁹ Amu kiboibochi Jehovah komeny nyiienyi tugul eng werit, ²⁰ ako eng Werit kochomyo tuguk tugul eng inendet, ye kingo kagoyai kalyet eng korotigab kimurtoiyondenyi, ngo tuguk che mi ngweny nda ko tuguk che mi Kipsengwet. ²¹ Ak eng' kasarta age ko ki oii che itobonotin ak bunik eng kabwatutikwok ak eng boisionik che yaachen. ²² Ako kagotuiyok inendet raa eng bortanyi ne bo banyek eng meet si kobiit kobartak oii che tililen, che motinye tisia, ako ne sire tugul komotinye kiy ne kiruokunenok eng tainyi, ²³ ngotestai iman eng kayanet, che olumdootin ak ko okimen, ako che ma kiistok eng kamang'unetab logoiwek chetililen che kiogas, che kigiamchi chi tugul eng yautiet ne kigiyai eng kureretab kipsengwet. Chuto ko logoiywek che tililen che kigiyaa ane Paulo amu noto aek kiboitiot. ²⁴ Abaibai anyun raa eng nyalilwogikyu agobo akwe, ak anyiiti eng bortanyu noto ne rarunot agobo nyalilwogikab Kristo eng bortanyu agobo bortanyi, noto ko kaniset. ²⁵ Ak kigiyaa agobo kaniset noto aii kiboitiot, eng tononjiindoetab Jehovah ne kigigona amu akwe, si ayai kosulda ngolyotab Jehovah. ²⁶ Nito ko ung'otiet ne kigiuny kongete kenyisiek tugul che kigosiirto ak ibinwek: ago raa ko kageng'onji chechi che tililen. ²⁷ Kicham Jehovah kongangji kito ne u magornatosiekab torornatet ne bo ung'otionito eng bororiosiek, noto ko Kristo eng akwe, kamang'unetab torornatet. ²⁸ Inendet ne kimwoitei, ak kiteechini chi age tugul ak keneti chi age tugul eng ng'omnatet tugul, si kobiit kemut chi age tugul kogesunotge eng Kristo. ²⁹ Amu noto anyun, abirtochinige ak agiljinige, ko u kimnatennyi ne boisiei eng ane eng kamuktaet.