¹ Ndiho mafarisayo na aandishi vakudza kwa Jesu kulaiza Yerusalemu. Na kunena, ² "Kwa noni anafunzi vanakiuka mahochero ga atumia? Kwa kukala kavanawwa mikono yao vakalaho vanarya chakurya." ³ Jesu achivajibu achamba, "Nanwi kwa noni munakiuka sheria ya Bwana kwa ajili ya mahochero genu? ⁴ Kwa kukala Mulungu wenena, muheshimu pabayo na mameyo, na agombaye mabaya kwa pabaye na mameyo, jeri andafa. ⁵ Lakini ninwi kunena, "Chila amwambiraye pabaye na mameye, "Chila musaada ambao andepata kulaiza kwangu sasa ni sawandi kwa Mulungu." ⁶ "Mutu iye kana haja ya kumuheshimy pabaye, kahiza namuna ii mudziritangua neno ra Mulungu kwa ajili ya mahochero genu. ⁷ Enwi anafiki, ni vidzo here Isaya arivyo tabiri julu yenu arihonena, ⁸ atu vava vananiheshimu mimi kwa milomo yao, lakini mioyo yao ikure nami. ⁹ Vananiabudu bule, kwa sababu vanafundisha mafundisho garigo malagizo ga anadamu." ¹⁰ Ndiho achiveha makutano na kuvambira, "Sikizani na mufahamu- ¹¹ Kakuna chitu chenjiracho mulomoni mwa mutu na kumuhenda najisi. Bali chiratu chombolaho chinywani, chichi ndicho chimuhendacho mutu kukala najisi." ¹² Ndiho anafunzi vachimwendera vachimutua na kunena na Jesu, "Je! unafahamu mafarisayo varihosikira riratu neno vekwazika?" ¹³ Jesu wevajibu, "Chila mumera ambao paba wangu wa Mulunguni kajaupanda undang'olewa. ¹⁴ Varicheni hachiyao, vavo ni vilongozi vasioona. Here mutu asiyeona andamulongoza asiyeona munziwe, vosi airi vandagwa shimoni." ¹⁵ Petro achijibu na kumwambira Jesu, "Fuelezere mufano uu kwehu," ¹⁶ Jesu achijibu, "Nanwi pia badi kamwelewa? ¹⁷ Ninwi kamuona kukala chila chenjiracho mulomoni kuchirira tumboni na kwenda chooni. ¹⁸ Lakini vitu vyosi vyombolavyo mulomoni kombola ndani ya moyo. Ndiho vitu vimwenjizavyo mutu unajisi. ¹⁹ Kwa kukala moyo kuombola mawazo mabaya, wolagaji, uzinzi, usherati, wevi, ushuhuda wa ulongo, na matusi, ²⁰ Gaga ndigo mambo gamwenjizago mutu unajisi, lakini kurya bila kuoga mikono kakumuhenda mutu kukala najisi." ²¹ Ndiho Jesu achombola hatu haratu na kudzitenga kwelekea pande za midzi ya Tiro na Sidoni. ²² Lola, achidza mwanamuche mukanani kulaiza pande zizo. Achipaza sauti achamba, "Nihurumie, Bwana, Mwana wa Daudi, Musichana wangu anateswa sana ni pepo." ²³ Lakini Jesu kamujibure neno. Anafunzie vachidza vachimusihi vachimusisitiza vachamba, "Muuse aende zakwe, maana anafupigira kululu." ²⁴ Jesu achivajibu achamba, "sihumirwe kwa mutu yoyosi isihokala kwa magonzi garigo angamika kwa nyumba ya Israeli." ²⁵ Lakini wekudza na kuzama mbereze, achamba, "Bwana nisaidia." ²⁶ Wemujibu na kwamba, "Si vidzo kuhala chakurya cha ahoho na kuvatsuhira kuro," ²⁷ Achamba, "Ndevyo Bwana, Hata vivyo kuro atite kurya chakurya chigwacho mezani mwa Bwana wao." ²⁸ Ndiho Jesu achijibu achigomba achamba, "Mwanamuche, imaniyo ni bomu na ihendeke kwako here uhenzavyo." Na musichanao wekala adzihozwa kahiza wakati uo. ²⁹ Jesu achiuka hatu huho na kwenda hehi na bahari ya Galilaya. Kisha wekwenda julu ya mirima na kusagala kuko. ³⁰ Kundi bomu richidza kwakwe na kumurehera viwete, vasioona, vasivonena, virema na anjine anji, variokala akongo. Vevaika kahiza magulu ga Jesu na achivahoza. ³¹ Nao umati vachishangaa varihoona vasionena vachinena, na virema vachihendwa azima, vasioenenda vachenenda, na vasioona vachiona, vachimusifu Mulungu wa Israeli. ³² Jesu achiveha anafunzie na kwamba, "Nidzivaonera mbazi umati, kwa sababu vekala nami kwa siku tatu bila kurya chitu chochosi. Sindavataga venende kwao bila kurya vasize vakazimia njirani." ³³ Anafunzie vachimwambira, "Ni hiko faweza kupata mikahe yakutosha hano nyikani kushibisha umati mubomu vino?" ³⁴ Jesu achivambira, "Muna mikahe mingahi?" Vachamba, "Saba na samaki achache." ³⁵ Jesu achivaamura umati usagale hotsi. ³⁶ Weihala mikahe saba na samaki na baada ya kushukuru, achiimaga na kuvapa anafunzi. Anafunzi vachivapa umati. ³⁷ Atu vosi vachirya na kutosheka na vachikusanya masaza ga chakurya virivyobaki vipande vipande, vichiojala vikahana saba. ³⁸ Vosi varioarya vekala analume elfu inne bila anaache na ahoho. ³⁹ Kisha Jesu achivaloga umati vaendee zao na achenjira ndani ya mashua na kwenda sehemu za magadini.