¹ Ahenzwe kwakukala tuna ahadi zizi, na tudzituse enye kwa chila chitu ambacho chatuhenda tukale achafu kahi za miiri yehu kahi za kumlika Mulungu. ² Hendani nafasi kwa ajili yehu! Khafudzakosera mtu yeyosi, khafudzakora mtu yeyosi. ³ Si kuvahukumu kukala nanena vivi. Kwa kukala nenena kukala mumo mioyoni mwehu, kwehu siswi kufwa hamwenga na kuishi hamwenga. ⁴ Nina imani bomu ndani yenu, na kudzikufula kwangu kubomu ni kwa ajili yenu. Nidzodzalwa ni faraja. Nidzifurika na furaha hata kahi za riki zehu zosi. ⁵ Furiko kudza Makedonia, miiri yehu khayoyere. Badalaye fwepata taabu kwa namna zosi kwa kupigwa viha upande wa konze na hofu upande wa ndani. ⁶ Ela Mulungu ariyemfariji wa anyonge, wefufariji kwa kufikake Tito. ⁷ Khaikalire kwakufikakwe tu Mulungu wehufariji. Vekala pia faraja Tito arizohochera kula kwehu iye wefwambira uhenzo mbomu murionao, huzuni yenu, na bidii yenu kwa ajili yangu. Vivyo nehamira sana. ⁸ Hata kala barua yangu yahenda musikitike, mimi sidzutira. Ela nedzutira wakati nirihoona, barua iyo yevahenda ninwi kukala na huzuni hata dzaho kwa muda mufuhi. ⁹ Sasa nina raha, sikwakukala mwekala na huzuni, ela kwa kukala huzuni yenu yavareha kahi za toba. Mwepatwa ni huzuni ya chimulungu, khampatire hasara kwa sababu yehu. ¹⁰ Kwa kukala huzuni ya chimulungu nikureha toba ambaro nikukamilisha wokolwi bila ya kukala na madzuto. Huzuni ya chidunia tavivyo, nikureha chifo. ¹¹ Lolani jinsi ino huzuni ya chimulungu irirvyo vyala bidii bomu ndani yenu. Jinsi yani murivyokala na fikra bomu ndani yenu yakuvazulia kukala na makosa. Kwa jinsi yani utsungu wenu urivyokala mbomu, hofu yenu, matamanio genu, bidii yenu, na tamanio renu kona kukala haki inamalwa ihendeke! Kwa chila chitu mwetibitisha enye kusakala na makosa. ¹² Idzalo navaandikira ninwi, sandikire kwa ajili ya mkosaji, na sikwa mtu ariyeleswa ni mai. Neandika ili kwamba ubora wa mioyo yenu kwa ajili yehu ihendwe kumanyikana kwenu mbere ya matso ga Mulungu. ¹³ Nikwa ajili ii fwafarijika kahi za nyongeza ya faraja yehu enye, fwahamiwa hata zaidi, kwa sababu ya furaha Tito, kwa kukala rohoye yeburudishwa ni ninwi nyosi. ¹⁴ Kwa kukala kala na dzivuna kwekwe kuhusu ninwi, sikarire na aibu. Chinyumeche, kala tu chila neno furirorinena kwenu rekala nijeri, madzivuno gehu kuhusu ninwi kwa Tito gatibitishwa kukala ni jeri. ¹⁵ Uhenzowe kwa ajili yenu ni mbomu zaidi, here akumbukiravyo kutii kwenu nyosi, jinsi mrivyo mkaribisha iye kwa hofu na kutetemeka. ¹⁶ Nahamirwa kwa kukala nina ujasiri kamili ndani yenu.