¹ Tafutani uhenzo na kutamani sana karamu za rohoni zaidi, sana mpate mboza unabii. ² Mana iye anenaye khwa lugha kanena na atu ala nikunena na Mulungu.Mana kahana aelewaye khwa sababu wanena mambo garigofitsika kahiza Roho. ³ Ela iye aomboza unabii wanena na atu na kuvajenga kuvenziza moyo na kuvafariji. ⁴ Iye arienaye khwa lugha nikujenga mwenye, ela iye aombozaye unabii nikurijenga kanisa. ⁵ Sasa natamani kwamba ninwi nyosi mnene khwa lugha.Ela zaidi ya gogo natamani ya kwamba momboze unabii.Iye aombozaye unabii ni mkuu kuriko iye anenaye khwa lugha [labda akaleho wa kutafusiri] ili kwamba kanisa ripate kujengwa. ⁶ Ela sasa kaka na dada zangu nichidza kwenu na kunena khwa lugha, nindafaidia noni ninwi? Siwezi isikala kunena nanwi khwa njira ya ufunuo au khwa ya marifa au unabii au khwa njira ya fundisho. ⁷ Ichikala vitu visivyo na uhai here firimbi au chinubi visivyoomboza sauti zirizo na tofauti, indatambulikanadze ni chombo chani chichezwacho? ⁸ Khwa mana ichikala baragumu indaomboza sauti isiyomanyikana, ni jisi yani mtu andatambulika kukala ni muda wa kudziandaa kwa viha? ⁹ Vivyo vivyo nanwui.Mchomboza khwa lulimi neno risiro kusudi ni jisi yani mtu andaelewa mdichochinena? mndakala mchinena, na kahana andiyeelewa. ¹⁰ Kakuna shaka kwamba kuna lugha nyinji mbalimbali duniani, na kakuna hata mmwenga risiro na mana. ¹¹ Ela ichika simanya mana ya lugha nindaka mjeni khwa iye anenaye, naye anenaye andakala mjeni kwangu. ¹² Vivyo vivyo na ninwi. Khwa kukala mwatamani sana kuona udhihirisho wa Roho, ombolani kwamba mzidi sana kujenga kanisa. ¹³ Vivyo iye anenaye khwa lugha na avoye apewe kutafusiri. ¹⁴ Khwa mana nichivoyo khwa lugha, roho yangu nikuvoya, ela akili zangu kazina matunda. ¹⁵ Nihende mino? nindavoya kwa roho yangu, ela pia nindavoya khwa akili zangu.Nindaemba khwa roho yangu na nindaemba khwa akili zangu pia. ¹⁶ Vinjinevyo uchimsifu Mulungu khwa roho, iye ni mjeni andaelukadze,''Amini'' womboza shukurani, achikala kagamanya unenago? ¹⁷ Mana ni jeri uwe washukuru vidzo, ela yuyahu munjine kajengwa. ¹⁸ Namshukuru Mulungu khwa kukala nanena khwa lugha zaidi ya ninwi nyosi. ¹⁹ Ela kahiza kanisa ni baha ninene maneno kunu matsano khwa kufikiria kwangu ili nipate kuvafundisha anjine, zaidi ya kunena maneno kumi elifu khwa lugha. ²⁰ Kaka na dada zangu, msikale ahoho kahiza kufikiria kwenu. Badala yee, kuhusiana na wovu, ikale here ahoho atsanga.Ela kahiza kufikiriria kwenu mkale atu azima. ²¹ Yeandikwa kahiza sheria,''Khwa atu a lugha nyinjine na khwa milomo ya ajeni indanena na atu vava.Ala hata vivyo kavanisikira,'' wanena Bwana. ²² Vivyo ndimi ni shara, si khwa varioamini ala khwa vasio amini.Ela komboza unabii ni ishara, si khwa vasioamini, ala khwa ajili yao vaaminio. ²³ Gaga ikikala kanisa rosi rikusanyika hamwenga na wosi vanena khwa lugha na ajeni na vasioamini vadzenjira, je kavaweza kunena kwamba mna vitswa? ²⁴ Ela ichikala vyosi mwaombo unabii na aasiyeamini au mjeni akaenjira, andasawishiwa na gosi asikirago. Andahukumiwa na gosi ganenwago. ²⁵ Siri za moyoo zingefunulwa. Majibu ge gandegwera chinabunabu na kumwabudu Mulungu.Angekiri kwamba Mulungu yu kahi yenu. ²⁶ Noni chituacho bai, kaka na dada zangu? Mkutanaho hamwenga chila mmwenga ana zaburi mafundisho mafunuo lugha au tafsiri.Hendani chila chitu ili kwamba mrijenge kanisa. ²⁷ Here yoyosi andanena khwa lugha, vekaleho airi au ahahu na chila mmwenga kahiza zamu.Na mtu lazima atafsiri chirichosemwa. ²⁸ Ela here kakuna mtu wa kutafsiri, bai chila mmwenga wao kale chimya ndani ya kanisa.Bai chila mmwenga anene hacheye na Mulungu. ²⁹ Na manabii eri au ahahu vanene na anjine vasikize khwa kupambanua chiricho nenwa. ³⁰ Ela ariyesagala achifunurirwa jambo kahiza huduma, yuyahu ambaye wekala achinena na nyamale. ³¹ Khwa kukala chila mmwenga wenu waweza komboza unabii mmwenga baadala ya munjine ili kwamba chila mmwenga aweza kudzifundisha na wosi vaweza kwenjizwa moyo. ³² Khwa kukala roho za manabii zii chini ya uangalilizi wa manabii. ³³ Khwa kukala Mulungu si Mulungu wa kujaribiwa ala ni wa amani. ³⁴ Idzivahendwa anache kalaye chimya kahiza kanisa.Khwa kukala kamuruhusiwa kuzungumuza.Badala ye vahenza kukala kahiza anyenyekevu, here pia sheria irivyonena. ³⁵ Here kuna chochosi vatamani kudzifunza bai navavauze anaalume zao nyumbani.Khwa kukala ni nabii khwa anaache kunena kahiza kanisa. ³⁶ Je neno ra Mulungu nombola kwenu? Je remufikira ninwi tu? ³⁷ Here mtu achidzona kukala ni nabii au wa rohoni, yamuhenda agamanye mambo nivandikirago kwamba ni malakizo ga Bwana. ³⁸ Ela asihomanya gaga, mricheni asitambuliwe. ³⁹ Vivyo bai kaka na dada zangu,ombolani sana kuombo unabii na msimuzulie mtu yoyosi kunena khwa lugha. ⁴⁰ Ela mambo gosi gahendeke khwa udzo na khwa utaratibu.