¹ Yesu hano yaghendanga kurwa mwisengero, uwomwe uwa abhanabhegha akamobhorya, "Umweghya, maha amaghena ghano (na) amahaghasho gharakoroghorya!" ² Akamotebhya, Oramaha amahaghasho ghano mmanene? Tereho reghena reno reresagha ku ryendehe reno retareghwesibhwa hanse". ³ Hano yarenge aikae Kokekereghe kya Mizeituni ukutigha risengero, Petro, Yakobo, Yohana (na) Andrea bhakamobhorya kukibhisire, ⁴ "Totebhi, amang'ana ghano gharisha rohe? Nkerengyoke kerebhaho?" ⁵ Yesuakasimya komotebhya, " Mwirihe omonto atakabhateiya. ⁶ Abharu mabharisha kohetera irina iryane bhareghamba, 'Noni ono', bhareteiya abharu. ⁷ Hano murighwa amang'ana agha rihe ning'urusa iya rihe, motakobhoha; amang'ana ghano ngarebhaho, ikihiko nkyo ketarihika. ⁸ Gweki ikyaro nkeremokera ikyaro kyende, no obhokama bhoryemokera obhokama bhonde. Ibhirighiti mberebha kera hase, inshara. Ghayo gharebha ki ibhinyonyi ibhyoobhosongo. ⁹ Mwirihe. Mbarebhahikya munshama, moretemerwa momasengero. Murimeribhwa mobhoronge ubhwa ubhabhaka kukughirya yane, kiyo nkyo ikyorokeryo kyabho. ¹⁰ Nkehameryo eng'ana ishe kotabheribhwa ku bhyaro bhyonswe. ¹¹ Hano bharebhaghota no okobhahana, motakasha kobhora rera moreghamba. Kokobha nkokangha iyo morehanwa keno moreghamba; temorebha mbenyu mokoghambahe ne Enkoro Ehoreru. ¹² Umuhiri naremosohya kukuina kyu ukwitwa, umwibhori narekora omona waye iniko yu ukwitwa. Abhana bhoonswe mbarekonerwa abhaibhori bhaye ukwitwa. ¹³ Morererwa nakera omonto kukughirya iya iria ryane. Naho areghomerya kuhika kukihiko, omonto uyo aresabhorwa. ¹⁴ Hano moremaha obhoghogho ubhwa amasaryo bhwimereye hanohatare (ono akosoma nigha amanye), nho bhara bharenge Yuda bharekenyera mokekereghe, ¹⁵ naora arenge ighoro ko rosara atakasha kwika monse,nunyora nkoghegha ekento ikya kebhara, ¹⁶ naora arenge momoghondo atakasha kukyora koghegha ingibho yaye. ¹⁷ Naho mohoko ghwabho abhakar iabhenda nabhano urinyora bharaghonkya ku shinsiko shiyo! ¹⁸ Mosabhe igha etakasha kobha igho enkaghaiye embeho. ¹⁹ Kobhora nsherebha shinsiko ishi inyanko enene, eno etakabhayeho kurwa kigho Waryobha yabhombire ikyaro keno, terebha igho ghwekihe. ²⁰ Singa Omonene akasuhiri shinsiko shiyo, takatokire omonto ono akutunguribhwahe, kukughirya iya abhahoreru mbaitore kusuhya shinsiko shiyo. ²¹ Ko enkagha iyo nyore omonto wowonswe ora nabhatebhya, "Momahe Kristo hanoare!' Hamwe rora, nhayo are!' motakaitabherya. ²² Nkoora Umukristo uwo obhorongo no omoroti owo obhorongo mbarisha nokokora ebherengyo ibhyo okoroghorya, okore bhabhang'aine nunyora nabhahoreru. ²³ Mwirihe, mbatebhiri ghano enkagha etarahika. ²⁴ Naho hano inyanko iya shinsiko shiyo, iryobha nderebha ikisunte, umweri teghorebharahe, ²⁵ ibhinyonyoni mbereghwa kurwa ighoro kwi saro, shinguru ishya kwisaro nshirisingisa. ²⁶ Hayo nho Omona uwa Adamu arika kurwa mwisaro no obhohoreru ubhwaru. ²⁷ Nho aretebhya abharaghe mokomanyi abhahoreru bhoonswe kurwa shentahana shonswe ishi ikyaro, hano ikyaro kyasimiyi no okohekera kwisaro. ²⁸ Mweghe kukurwa ko omote. Hano risagharya ryasimya kosebhoka, momanye enkagha iyo emaho ihikire. ²⁹ Bhuyo bhuyo, hano morerora ghayo gharakoreka momanye ahikire mukihita. ³⁰ Mbohene, ndabhatebhya, rekore reno terereheta amang'ana ghano ghatararorwahe. ³¹ Risaro nikyaro mbereheta naho amang'ana ghane tegharehetahe. ³² Naho kurusiko nenkagha iyo, taho ono aremanyahe, nunyora nabharaghe mwisaro iyo. hamwe Omona, Ntata umwene. ³³ Mwirihe, Momahe, kobhora nenkaghake. ³⁴ Nkyo omonto ono anooroghendo, aratigha waye noukutigha abhakori bhawaye abhemeremo bhabhe abhimereri bhaye, kera omwe no omoremo ghwaye. No okotebhya omorendi aikare maiso. ³⁵ Bhono mobhe maiso!Kobhora temomanyire rono mwene mughiarekyora ka waye,nokanyora nko moghorobha, mubhutiko ubhushibhe,hano esarighoko ereraghora, hamwe nkunkyo. ³⁶ Hano arashe kwakotakya atakanyora oraye. ³⁷ Keno nko bhatebhya nkotebhyande kera omonto: Motakarara