¹ Oni Pauro omotomwa uwa Kiristo Yeesu, ko okoreng'aana na rihamo irya Waryobha umutungurya weeto Yeesu Kiristo ono arenge obhokare bhweeto. ² Timoteo omoona uwaane uwa obhoheene ku-mighiro; enoke na obhohanshe bhono bhukurwa ko Taata Waryobha na Kiristo Yeesu Omonene uweeto. ³ Kiigho nakokomeerreyi hano naimokire ukughya Makedonia, utighare Efeso okorre ke otore kohamera abhanto nyabhorebhe bhatakaragheerrya amaragheerryo haghare haghare. ⁴ Ghweki bhaitegherre amaghano na amasabho ghano ghataana umuhiko. Ghano ghararweera mo-shenkaani bhokong'u shetakabhatoorrya okoghenderrya na amaitegherro agha Waryobha agha omorembe. ⁵ Niigha ekerengere ikya ehamo eno mbhohashe bhono bhukurwa ko-nkoro endabhu, ko amaitegherro amaiya na ku-mighiro ighya obhoheene. ⁶ Abhanto abhamwe bhaabhorwa amaitabherranio ghano na ukusyorya amashumaasho agha eketeng'o. ⁷ Bharatuna okobha abharagherrya abha ubhwahokania, nawe tebhamanyire keno bhokoghamba-he hamwe bharakomeerrya. ⁸ naho ntomanyire igha umwahokanio umuuya hano omonto araghokore ko obhoheene. ⁹ Ntomanyire igha, umwahokanio teghotoorwe ko-monto uwa obhorongo, ko-bhasarya bhano bhatarasureeneka, na bhano bhataana Waryobha na abhanyamughi. Yaatorwa-ho ku-kughira iya abhaiti abha abhaibhori abhaabho ko bhoora bhakwiita abhanto. ¹⁰ Ku ukughirya iya abhasooraare, abhasoherri abha imighi ighya abhande ko bhaaara bhakoghegha abhanto na okobhahira mo-obhoghorwa ko-bharongo, ko-bhashuuti abha obhorobgo na wowonswe umwisyoorya soorya. ¹¹ Amaragheerryo ghano ghaaretwa na eng'ana iya ibhohoru ubhwa Waryobha ono yanonkwa enonkwa eno yaitabheerribhwa. ¹² Ndamukumwa Yeesu Kiristo Omonene weeto yaang'aaye shinguru, ko bhoora yaambharre igha m-moheene nde akantoora ko-meremo. ¹³ Naarenge umusheri, umunyahari, na uwa inyanko. Naho nkanyoora obhohanshe ko bhoora naakorre obhokangi ubhwa ukwanga ukwitabheerrya. ¹⁴ Nawe oroobho urwa Waryobha weeto rwishooye imighiro na obhoghonshe bhono bhorenge ku-Kiristo Yeesu. ¹⁵ Eng'ana eno yaakwitabherribhwa nkehamerryo bhunyorwe na abhanto bhonswe, igha Kiristo Yeesu yaishire mu-kyaro ukutugurya abha ibhitiba, bhaara bhonswe bhaasarya ku-woni. ¹⁶ Ku bhuyo, oni naanyorre obhoghonshe ko bhoora ku-woni ono naarenge omosarya kokera bhonswe, Kiristo Yeesu abhooroki obhomerya bhono bhotaakuhikibhwa, okobha ke mbe ekemanyerryo ko bhano bhariitabheerrya bhanyoore obhohoru ubhwa amakora bhonswe igho. ¹⁷ Ko omokama ono ataana ikihiko, ono ataakukwa, ono ataakomaahwa, Waryobha umwene, ebheho esooko na obhohoreeru bhokora na bhokora. Ebhe igho. ¹⁸ Ndaretora riragheerryo reno mbere oyaaho Timoteo, omoona uwaane, ndakora reno okoreng'aana na obhorooti bhono bhwaarotwa ukughirya iya uwe, ekembere hayo, okorre wiitane bhuuya riihe ko omorembe. ¹⁹ Kora igho okorre obhe na ubhukumya na amaitegherro amaronge. Abhanto abhamwe bhaanga ghano ghaasikya imighiro. ²⁰ Kya bhono Himenaayo bhana Arekisanda bhano naahana risambwa okore bheeghibhwi bhataasha ukushera.