¹ Lakini Sauli, agaendelea uhanya matshio aikuya gwa anafunzi vama Bwana, agaenda gwa kuhani nemokuu ² na wamuomba ketri gwa soko amasinagogi kuko Dameski, ili kwamba newamuhanga montu negunjea iyoo, ahendeke moghema au moghosia, avatrunge naovaetra uu Yerusalemu. ³ Hatra nare gumuhenjo, nare wahuvea uu Dameski, ghafla amueria gong'e nuru neefumie ugiunde,' ⁴ namweso wagwa fang'e nawatregheya rori,"Sauli, Sauli, chuu ugughasia nene?" ⁵ Sauli wajibu, Veve weanyu Bwana? Bwana wahanya, " Nene ne Yesu negunyuzi; ⁶ Lakini ukaa, kea umojini, nave ujuerwa neuseghetwe uyahende ⁷ Antu avoo nare vahenda mohenjo vina Sauli wakia tui, neveghimgie rori, vetrina ona montu. ⁸ Sauli wauka ung'e nawahumbua miho akwe, atrina daha uona intu, vamokwatra moghono vamoetra mpaka u Dameski. ⁹ Gwa matriku atratru atrikengee, atriulia wala unyua. ¹⁰ Basi nare guna mwanafunzi u Dameski rina rakwe Anania, Bwana agahanya nayo undotri, "Anania." Na wahanya, " Ravaa, neafai, Bwana. ¹¹ "Bwana wamwera," Ukaa uende gune winji uende umotraa uguetranwa Nyofu, na unyumba a Yuda na wende uweya montu ufuma u Tarso neguetranwa Sauli; soko rava uguomba; ¹² na agamuona gwa ndotri montu rina rakwe Anania negukea nawamuekea meghono gunto akwe ili adahe uona. ¹³ Lakini Anania wajibu, "Bwana, natregheya habari ya montu uyi gwa antu vaingi, gwa gease geke wavatrenda ovee aeru vakuko Yerusalemu; ¹⁴ Afai uketri mamolaka ufuma gune kuhani nemokuu umukwatra montu negureetrana rina rako. ¹⁵ Lakini Bwana wamwera, "Enda, gwa soko mweso niibele nirija gune nene, arehoe rina rane usonge aa Mataifa na atremi na ana va Israeli. ¹⁶ Soko nejuvaaghea nemaingi neijusegha umoghasia gwa soko arina rane". ¹⁷ Anania waenda, wakea unyumba; Wamuekea meghono wahanya, Monyadughu Sauli, Bwana Yesu, narewagighea unjea nare ujie, wantroma udahe uonanauijweywe na Mwahu ne Mweru. ¹⁸ Ghafla agwa fang'e umiho akwe mantu ginya mabada, wahanga uona, waemeka, wabatizwa; walia malewa na wahanga nguu. ¹⁹ Waeghaa itrambe remwedu na anafunzi kuko uu Dameski gwa matriku maingi. ²⁰ Ighondo erero wamuhanya Yesu umasinagogi, neguhanya kwamba mweso ne Mwna wa Mungu. ²¹ Na vong'e nare vatregheya vegashangaa vahanya, "Nti montu uyoo nare guvafira avoo nevorietrana rina erei kuko Yerusalemu? na afai nare waja gwa ikusudi rovatrunga naovatroa umakuhani." ²² Lakini Sauli agaareywa utranantia na uvahenda Ayahudi nevodova u Dameski veruvekewe na veghondesiywe kwamba uyuine ne Kristo. ²³ Baada amatriku mangi, Ayahudi vahenda shauri ili vemouraghe. ²⁴ Lakini mofango wawe wamanywa na Sauli. Vamonyierea umolanga mumwe na utriku vedahe umuuragha. ²⁵ Lakini anafunzi vakwe vamuhoa utriku vasima ukerea ukuta, vamosimia fang'e ukerea gekafu. ²⁶ Na Sauli nare waghea u Yerusalemu, agasoya ueghaa itrambe remwedu na anafunzi rakini nare vomotreja, verahanye kwamba mweso ne mwanafunzi. ²⁷ Lakini Barnaba wamuhoa wamotroa umetume, Na wavaera ginya Sauli wamuona Bwana monjea na Bwana ginya nare wahanya nayo ²⁸ Agatrana nayo nare ugukea na ufuma Yerusalemu. Wahanya gwa udea utreja gwa rina rama Bwana Yesu, ²⁹ negugisucha na Ayahudi vage Yunani lakini vosoya mara gwa mara umuuragha. ³⁰ Ighondo nare anyadughu varemanya erei, vamohoa mpaka Kaisari, na vamutroe aende Tarso. ³¹ Basi ikanisa rong'e u Yahudi, Galilaya na Samaria, nare rima majeghana, na rajengwa, na uenenda kunu vomotreja Bwana na faraja aa Mwahu ne Mweru, kanisa rkua nauogezeka antu. ³² Na atokea Petro nare guenendaenenda uu mokoa wavateremokea anyohuvea nevodova umuji wa Lida. ³³ Wamuona kuko muntu umwedu rina rakwe Ainea, montun usuu wahendeka ugitranda meaghaa nane; soko nare upozie. ³⁴ Petro wamwera, "Ainea, Yesu Kristo aguforie; Ukaa nautrandeke getranda gako," Nawauka. ³⁵ Na antu vong'e nare veegha Lida na Sharoni nare vamuona muntu uyui, vamusukia Bwana. ³⁶ Nare guna mwanafunzi u Yfa nareguetranwa Tabitha, nechu nare ratafasiriwe ginya "Dorkasi" Moghema uyui nare wijue mwemo neujana ntendo ya rehema nare wahendie ugwatruki. ³⁷ Ajiugighea umatriku asa wajiuwaa wakuya; narevamuoya, vegamuhumbua uchumba gagunto na vamorencha.. ³⁸ Gwa soko Lida nare wevive na Yafa, na anafunzi nare vatregheye kwamba Petro wekuko, vegavatroma antu vavere, vamwera, "Njuu gunee see bila uchelewa". ³⁹ Petro wauka nawaenda neyo. Nare waghea, vegamuera uchumba gagunto. Na ajane vong'e vegaemeka fife nayo kunu vorea, nevomuaghea makotri na masaa nechu Dorcasi wavatrumeye nare kee wenayo. ⁴⁰ Petro wavafunya vong'e uchumba, waghua maruu waomba, na waurava mwere, wahanya, "Tabitha, ukaa".Warughua miho akwe na nare wamuona Petro waeghaa fang'e. ⁴¹ Na Petro wamofa moghono wakwe wamuhumbua, na na narewavaetrana anyohuvea na ajane, wavafa mofanga ⁴² Intu erei ramanyeka Yafa ong'e. na antu vaingi vamuhuvea Bwana. ⁴³ Ahendeka Petro waeghaa matriku maingi Yafa itrambe remwedu na montu neguetranwa Simoni, monyohenda meghunja.