¹ Kuhani nemokuu wahanya,"mantu ayai neatrutri"? ² Stefano wahanya, "Anyadughu na vatratra vane, nteghei nene: Mungu wa weru agamofumea Abrahamu nare gu Mesopotamia, nare akeeatrina dovaa Harani,' ³ wamwera,' Fwaya ong'e ako na majamaa ako na wende ung'e nenejuguaghea'. ⁴ Wafwa ung'e aa Ukaldayo na wadova uu Harani, ufuma hafo, nare tratra wakwe wakuya, Mungu wamwetra ungee eyei, nevodova fanui. ⁵ atrina movaa intu ginya urende wakwe, nare gutrii hatra sehemu oekee moghuu, Lakini Abrahamu narewaahidewe nare akee atrina hanga mwana kwamba ujufewa ng'ee ginya miliki akwena ufafo wakwe. ⁶ Mungu wahanyiye nayo vii, kwamba ufafo wakwe nareujudova ung'ee nenghenyi, na kwamba aenyeji vakukwe vejuvahenda atromwa vawe na uvatrenda ivee gwa meaghaa maghana ane. ⁷ Na Mungu wahanya, nejurehukumu itaifa nerejuvahenda mateka, na baada ahafo vejufuma naurumba nene usehemu eyei.' ⁸ Na wamofa Abrahamu iaghano ra tohara, oii Abrahamu wahendeka tratra wama Isaka wamotahiri itriku ra nane; Isaka wahendeka tratra wama Yakobo, na Yakobo wahendeka tratra wa anyampaa vetri ikhumi navavere. ⁹ Anyampaa vetru vamuonea ovee Yusufu vamorinja ung'e aa Misri, na Mungu nare witrambe remwedu nayo, ¹⁰ na wamochoa umaghaseko akwe, na wamofa fazili na hekima usonge ama Farao motremi wa Misri. Farao wamohenda ahendeke motrawala gunto aa Misri na gunto aa nyumba akwe ong'e. ¹¹ Basi gwa hendeka nanjaa nekuu na maghaseko uu Misri na Kanani, na vatratra vitru vetrinahanga malewa. ¹² Lakini Yakobo nare watregheyaguna malewa u Misri, agavatroma va tratra vitru gwa mara amwandio. ¹³ Umohenjo wa gavere Yusufu agagigheya gwa anyadughu vakwe, familie ama Yusufu amanyeka gune Farao. ¹⁴ Yusufu wavatroma anyadughu vakwe vende mwera Yakobo tratra wawe aje u Misri, itrambe remwedu na jamaa akwe, antu vong'e ne sabini na tano. ¹⁵ Oi Yakobo wasima uu Misri; na wakuya mweso itrambe remwedu na va tratra vitru. ¹⁶ Vahowa hatra Shekemu vatruhewa ugikaburi nechu Abrahamu narewareghurie gwa mafaja ahela ufuma gwa ana va Hamori kuko Shekemu. ¹⁷ Ighondo rahadi eyoo ne Mungu nare wavahadie Abrahamu nare wahuvea, antu narevaigefa kuko Misri, ¹⁸ ighondo resee agahumbuka motremi muuya uu Misri, motremi nare atrimanyie uhusu Yusufu. ¹⁹ Usoo motremi muuya wavaghonga antu vetru na uvatrenda ovee vatratra vitru, na uvajughutra anavitru nevanyui vetradovee. ²⁰ Gwa ighondo resee Musa agafafwa; nare muja usonge aa Mungu, warewa gwa mieri etratra gune tratra wakwe. ²¹ Ighondo nare wajughutrwa, moncha wama Farao agamohoa wamorea ginya mwanakwe. ²² Musa agafundiswa mafundisio ong'e age Misri; nare wina nguu unkhani na ntendo. ²³ Lakini nare wagheya meagha arobaini, atregheya unkhoo akwe uvasoya anyadughu vakwe, ana va Israeli. ²⁴ Nare wamuona Muisraeli uguhendewa ovee, Musa agamoareya nawarefeya hiri gwa uyoo nare gumuonea gwa Momisri: ²⁵ kunu guhanya kwamba anyadughu vakwe vemanyie kwamba Mungu ujuvachoa gwa moghono wakwe, lakini nare vetrune. ²⁶ Itriku nare refuatae agaenda gwa Vaisraeli nare veugighua; wasoya uvaamweya; wahanya,' Mabwana, Nyenye mwanyadughu; chumogihorisia nyenye gwa nyenye,? ²⁷ Lakini newamokosee jirani akwe wamosunteya kwengi, na wahanya, 'Anyu newaguhenda motrawala na mohukumu witru? ²⁸ Veve useghetre uburagha, ginya nejawamouragha Momisri eghoo?" ²⁹ Musa wadua nejawatregheya oi; wahendeka moghenyi ung'e aa Midiani, kuko wahendeka tratra wa vana vavere. ³⁰ Ighondo rameaka arobaini ukea, malaika wamofumea ugijangwa ra molema Sinai, umwali wa motro ugighuu. ³¹ Ighondo nare Musa waona motro, agashangaa na watreja eroo newareona, na narewasoya ugehumbeya ili aeone, rorii wama Bwana wamojea wahanya, ³² 'Nene ne Mungu wama va tratra vako, Mungu wama Abrahanu, na wama Isaka, na wama Yakobo'. Musa agaghaghatra naatrina seghaa uravaa. ³³ Bwana nwamwera, 'Yua matru ako, gune uemekie ne gueruu. ³⁴ Naona maghaseko aantu vane nevo Misri; Natregheya uwaa gwao, nane nasima ili nevaareye; fanui njuu, nejugutroma veve u Misri.' ³⁵ Uyui Musa nare vamuhitrie, ighondo nare vahanya, 'anyu waguhenda uhendeke motrawala na monyoamua witru?'_nare ndio nechu Mungu wamohendie ahendeke motrawala na mochoi. Mungu wamotromie gwa moghono wamalaika nenare wamofumie Musa ugighuu. ³⁶ Musa agavatrongeria ufuma u Misri nare wadaha uhenda meujiza na isara kuko uu Misri na ubahari aa Shamu, na ugijangwa gwa meagha arobaini. ³⁷ Ne Musa oyoyo newavire antu va Israeli vii, 'Mungu ujuwahumbweya muoni ufuma moghatre anyu, muoni newemwe nee'. ³⁸ Oyoi nare montu nare gumokutyrano ugijangwa na malaika nechu nare waeghetiye nayo umolema Sinai. Oi ndio montu nare vina tratra vitru, oi nemontu newafokee ukhani neufanga naugufa sese. ³⁹ Oinemontu nechu vatratra vitru vahitrie omotregheya; vamosunteye kwengi, naunkoo yawe vasukie uu Misri. ⁴⁰ Gwa ighondo rasee vamweerie Haruni.' guhendeye merongo neujugutrongeria. Musa Uyui, nare gugutrongeria ufuma ung'ee a Misri, gutrune ntune neamohanga.' ⁴¹ Oi vahenda ndama gwa matriku asaa na vafunya sadaka gwa sanamu esee navayanja gwa mwemo wameghono awe. ⁴² Lakini Mungu wavaferokeya vaabudu njotra neyogiunde, ginya nare ehadewe na aoni, 'Ahaa Mwampunyeya nene sadaka ya maimwana nemwayakikitra ugijangwa gwa ighondo rameagha arobaini, nyumba aa Israeli? ⁴³ Mwayanja hema otranea ama Moleki na njotra ya mungu refani, na picha nemwamehendie na ovarumba veso: na nejuvatroa kwengi ino na Babeli.' ⁴⁴ Va tratra vitru nare vina ihema rotranea kuko ujangwani, ginya nare Mungu waamuru nare waeghetia na Musa, kwamba nareujumehenda ginya eyoo nare wameune. ⁴⁵ Erei neihema ne vatratra vitru, gwa ighondo rawe, vegaetrwa ung'e na Joshua. Eyei agigheire ighondo nare waja uhoa itaifa nechu Mungu agavafukuza nare vatratra vitruvekee vetrinajaa. Eyei nare evii mpaka matriku ama Daudi, ⁴⁶ nare wahangie gebali gune Mungu,' nawaromba ufenja meghao gune Mungu wama Yakobo. ⁴⁷ Lakini Selemani agajenga nyumba ama Mungu. ⁴⁸ Hatra oi Newegunto atrodova unyumba yojengwa na meghono; eyei neginya muoni narewahanyiye, ⁴⁹ Iunde ne itrumbe rane rautremi, na uremi ne sehemu oekea meghuu ane. Nyumba aina eke nemujumejenga?, wahanya Bwana: au negufe sehemu ane otroeya? ⁵⁰ Ntri moghono wane newahendie ayai ong'e?' ⁵¹ Nyenye antu nemwina nkingo nghamu nemotrotahirewa nkhoo na matrue, momara momohitra Mwahu ne ,Mweru,' mohenda ginya vatratra vanyu vahendie. ⁵² Ne muoni eke uguaoni ne vatratra vanyu vetrina moghasia?. Vvauraghie aoni vong'e nare umwedu akee atrina newina Haki,' na fanui mwahendeka asaliti na anyo mooragha, ⁵³ nyenye antu nemwafokee seria eyoo neahanyiywe na malaika namotrina mekwatrea." Na ajumbe vaibaraza nare vatregheya ayai, vegatrimewa nkhoo yawe, vamotrindeya mino Stefano. Ila mweso, nare weijue Mwahu neMweru, agarava ugiunde gwa umakini na waona uweru wa Mungu,' na wamuona Yesu uemekie umoghono wagulelo wa Mungu. Stefano wahanya, "Rvaa naona iunde rarughuka, na Mwana wa Adamu weemekie moghono wa gelelo wa Mungu." ⁵⁷ lakini ajumbe vaibaraza vaghua mokindo gwa rori wagunto, vakivea matre awe, vamodorea vong'e, ⁵⁸ vamojughutra unji umaje na vamoghoa na magwe: na masudanga vayua masaa awe onji na vayaeka fang'e fife na meghuu amobalanda nare guetranwa Sauli. ⁵⁹ Nare vomoghua Stefano magwe, agaendelea omoetrana Bwana na wahanya, "Bwana Yesu, fokea nkhoo ane,". ⁶⁰ Waghua maruu nawaetrana gwa rorii neukuu, "Bwana, utravavareye ovee urui. "Nrewahanya ayai, wakuya.