¹ Paulo wavarava itrambe remwedu antu vaibaraza wahanya, "Anyadughu vane, nadova gune Mungu gwa dhamira nenjija mpaka reo." ² Kuhani nemokuu Anania wavaragheya antu nare veemekie fife nayo vemokhue itwe rakwe. ³ Nahafo Paulo wavaera, "Mungu ujuvaghua nyenye, ukutwa newairewe chokaa. Weghaa uhukumea gwa seria, navee guragheya neghuwe hiya na seria?" ⁴ Avoo nare veemekie fife nayo vahanya, "Vii ndio ginya ugumotroka kuhani nemokuu wa Mungu?" ⁵ Paulo wahanya, "anyadughu vane, nene nare ntune mwese uyui ne kuhani nemokuu.Gwa soko ehadiwe, utriju eghetria ivee gunto aa atrawala va antu vako." ⁶ Paulo nare waona ufande umwedu waibaraza ne Masadukayo navauya ne Mafarisayo, waongeya rurii nawahanya, "anyadughu vane,nene ne Mofarisayo, mwana wa Mofarisayo. Ne gwa soko eyei neendie udeo utreja uuchwa gwa aakui nenohukumewa nayo." ⁷ Narewayahanya ayai, wiremwai wahendeka neukuu baina aa Mafarisayo na Masadukayo, na mokutrano wabaghuka. ⁸ Soko Masadukayo vohanya gutrii iuchwa, malaika wala gutrii nkoo, ila Mafarisayo vohanya ayai ong'e. ⁹ Wiremwineukuu wahendeka na baadhi aantu nare veofande wa Mafarisayo vaemeka navajadili, vahanya, "gutrina intu nirivee gunto aa montu uyui. Oree mwese Mwahu au malaika waeghetria nayo?" ¹⁰ Ighondo nare gwa hendeka na hoja nenkuu, mokuu wamajesi agatreja kwamba Paulo nareujughafuwa mafaja mafaja naveso, oi waragheya anajesi vesime fang'e na omohoa gwa nguu ufuma gwa aajumbe vaibaraza, na umoetra ungome. ¹¹ Utriku nare gusonge Bwana agaemeka fife nayo nawahanya, "Utratreje, gwa soko washuhudea uu Yerusalemu, oi ujufunya usahindi no u Roma." ¹² Naregwaera, baadhi aa Ayahudi vegahenda iaghano na uetrana laana gunto awe aghonjo: vegahanya kwamba vetrijuulia wala unyua intu gekaku mpaka nevejumooragha Paulo. ¹³ Nare guna antu zaidi aa arobaini nare vahendie njama eyei. ¹⁴ vaenda uakuu vamakuhani na anyampaa na vahanya," Gwagieeka sese aghonjo ulaana nenkuu, gutralie ntu mpaka negujumuuragha Paulo. ¹⁵ Oi fanui, baraza remuere jemedari nemokuu amoetre gune see, ginya nemomooragha kesi akwe gwa utrutre. Gune see gutayare umooragha neake atrina aja afai." ¹⁶ Lakini mong'inya wama dada wakwe Paulo watregheya kwamba nare guna njama, waenda nawakea mong'e aa ngome nawamwera Paulo. ¹⁷ Paulo wamoetrana akida umwedu nawamwera, "Mohoe mobalanda uyui gune jemedari; soko ukwetri ughani womwera." ¹⁸ Basi akida wamohoa mobalada wamotroa gune jemedari nemokuu wamwera, "Paulo motrungwa uyo aganyetrana wambwera neguetree mobalanda oyui. Uketri ughani woguera." ¹⁹ Jemedari nemokuu wamokwatra moghono wagibaghua nayo kwengi, na wamoweya, "Nentu eke negusegha umbwera?" ²⁰ Mobalanda usuu wahanya, "Ayahudi vagiera vejuguomba umuetre Paulo fadiu ugibaraza soko veseghetre vehange ghabari yakwe gwa utrutri ino. ²¹ Basi veve utrayanje gwa soko antu vaingi zaidi aa arobaini vomonyiera. Vegitrungie gwa laana, vetralie wala unyua mpaka gune vejumuoragha.Hatra fanui vetayare, nevendie gebali ufuma gune vee." ²² Basi jemedari nemokuu wavareka abalanda vefwaye, narewamotroma"utramwere montu gekaku kwamba wambwera mantu ayai." ²³ Wavaetrana makida vavere wavaera vaeri asikae maghana avere viende Kaisari na mosikae anyonantea farasi sabini, naanya mekoha maghana avere, mojufwaya zamu wa ampende. ²⁴ Wavaera ueka maimwana eghondeke nechu Paulo ujumotromea na umuhoa ijaa gune Feliki Gavana. ²⁵ Wahadea ketri gwa namna eyei, ²⁶ Klaudio Lisia gune liwali motukufu Feliki, nuguramucha. ²⁷ Montu uyui wakwatriwe na Ayahudi vasegha umuuragha, nandio naenda na gekosi ga asikae namochoa, narenahanga ghabari kwamba mweso ne montu wa gerumi. ²⁸ Narenasegha umanya nentuni vamositraka, oi namotroa ugibaraza. ²⁹ Naona kwamba nare usitrakiwe gwa soko ama swali aa seria awe,wala atrina sitrakewa gwa soko aa aughani gekaku ro stahili uraghwa wala utrungwa. ³⁰ Naamanyeka gune nee kwamba guna njama gunto akwe, uchu gwa haraka namotroma gune vee, na uvaragheya avo nevomositraka na veetre mastraka usonge ako. Vagireka." ³¹ Basi asikare vatii amuri: vamohoa Paulo vamotroa Antipatri utriku. ³² Itriku nerefuatie, vamosikae vaingi vavareka anyonantea farasi viende itranbe remwedu nayo, na veso vasuka ungome. ³³ Naanyonantea farasi narevaghea Kaisari, na umofa liwali ketrii, vamoeka Paulo usonge akwe. ³⁴ Na liwali nare wamesoma ketri, agamoweya Paulo ufumie ijimbo reke; nare wamanya kwamba nemontu wa Kilikia, ³⁵ wahanya, "Nejughutregheya veve nevaja avo nevagusitrakie," waagheya aekwe ugikulu rama Herode.