¹ Paulonare waja u Derbe na Lystra; na ravaa, hafo nare guna anafunzi neveetranwa Timotheo, ne mobalanda newafafiwe na yiu wage Yahudi nechu nemonyohuvea na tratra wakwe ne Mgiriki. ² Antu va Listra na Ikonia vegamosuhudea ijaa. ³ Paulo nare umuseghetre ili vehende muhenjo nayo, oi wamuhoa naumotahiri gwa soko aa Ayahudi nare vekuko kwani vong'e vegamomanya kwamba tratra wakwe ne Mgiriki. ⁴ Nare veenda vinji umeji vegafunya maagheyo gwa makanisa ili uyatii maagheyo asa neahadewe na metume na anyampaa kuko Yerusalemu. ⁵ Oi makanisa ayendeka maghamu gwa uhuvei na avoo nevahuvie vaongezeka gwa idadi moitriku. ⁶ Paulo namuyakwe venda uu Firigia na Galatia, gwa soko Mwahu wa Mungu agavaghiya utranantia ughani kuko ugijimbo ra Asia. ⁷ Narevahuvea Misia, vegasoya uenda uu Bithinia, lakini Mwahu wama Yesu agavaghiya. ⁸ Gwa hiyo vakera Misia vaja mpaka Umuji wa Troa. ⁹ Ndotri igamujea Paulo utriku, nare guna montu wa Makedonia weemekie, gumuetrana nawahanya"Njii muguareye kunu Makedonia". ¹⁰ Paulo nre waona ndotri, nagwagiandaa uenda Makedonia, nekunu umanyie Mungu waguetrana gwende utranantia ughani. ¹¹ Oi gwafwaya ufuma Troa, gwenda uu Samothrake, na itriku nare rosonge gwaghea Neapoli. ¹² Ufuma hafo kwenda Filipi nechu nemuji woo Makedonia, muji muhimu moghatre aa wilaya na utrawala wa Gerumi na gwaeghaa matriku makei. ¹³ Itriku ra Sabato, gugaenda uji amolango gwa njea aa mongo, sehemu nare gwira gujuhendeka na sehemu ohendea marombi. Gugaeghaa fang'e naughetia na vayiu nare vajie itrambe remwedu. ¹⁴ Moghema umwedu neguetranwa Lidia, munyorinja zambarau, ufuma umuji wa Tiatria, munyo murumba Mungu, agagughemba. Bwana agamurughua moyo wakwe umuekea maanani nkhani neyahanyiywe na Paulo. ¹⁵ Nare vabatizwa, mweso na nyumba akweong'e, agagusihi wahanya" mwese mwanyona nene nemwaminifu gune Bwana, basi novasihi mukienamueghee gune nee".Wagusihi ino. ¹⁶ Ahendeka kwamba, nare guenda gwinji mahali gwa marombi, moncha umwedu nare wina ifefo rodea umanya watrana nasee. Agamuetrea bwana wakwe faida nyingi gwa (ubashiri). ¹⁷ Moghema uyui agamosambeya Paulo na sese, waghua mukindo na wahanya "Aghosia avai neatromami va Mungu ne Mokuu, nevovotranantia nyenye ghabari yauchoi". ¹⁸ Agahenda oi gwa matriku maingi, lakini Paulo newakasirishwa nantendo esee, agagiferokeya nyuma nwamwera fefo, "Nuguamuru gwa Rina rama Yesu umufume monghatre akwe."Namweso wafuma nawamoreka itrambe remwedu. ¹⁹ Mabwana nare vaona itumaini rawe rafaida raheywa, vegavakwatra va Paulo vina Sila nauvautrutra ugigureo usonge anya mamolaka. ²⁰ Narevavagheya umahakimu, vegahanya, "Aghosia avai ne Ayahudi na vohenda fujoo nkuu umuji witru. ²¹ Vofundisia mantu nechu ntiseria sese uyafokea wala uyasambeya gwa Arumi." ²² Mwirundo wavaemekea hiya Paulo na Sila, mahaakimu vaghafua masaa awe na uvayweya na vahanya veghuwe maghotria ²³ Nare vavaghua maghotria maingi, vegavajughutra ugigereza navavaera asikae velinde ijaa. ²⁴ Nare vafokea amurii esee, asikae vaigereza vavajughutra uchumba gamung'e aigereza na uvatrunga meghuu awe usehemu nareveekiwe. ²⁵ Ighondo rautriku wakitri, Paulo na Sila voomba na uemba nyembo yomurumba Mungu, kunu atrungwa vauya vevaghembie, ²⁶ Ghafla gwa tokea itetemeko rikuu na mosingi waigereza wahingiswa, melango aa gereza arughuka, na menyororo atrungwa von'e alegezwa. ²⁷ Molinzi wa Gereza waukaa ufuma utrua na waona melango ong'e aigereza irughuwe; nawahoa ifanga rakwe soko narewasegha ugiuragha gwa soko nare waghema atrungwa vong'e vatroroka, ²⁸ Lakini Paulo waghuamukindo gwa sautinenkuu, wahanya"utragiuraghe gwa soko song'e gumung'e afai". ²⁹ Mosikae waigereza agaomba traaietrwe na wakea mong'e aigereza gwa haraka, negutreja na gughaghatra, wavaguera va Paulo vina Sila, ³⁰ na wavafunya unji aigereza nawahanya, "Aheshimewa, nehende ntuni ili nedahe uokoka?" ³¹ Naveso vamwera, " Muhuvie Bwana Yesu navee ujuokoka na nyumba ako." ³² Wagaeghetria ukhani wama Bwana wakwe, itrambe remwedu na antu vong'e vanyumba akwe, ³³ Mosikae waigereza agavahoa utriku usuu na uvaoya gune vevare, mweso na antu va nyumba akwe vabatizwa. ³⁴ Wavaetra va Paulo vina Sila unyumba akwe na wavahendeya malewa.Namweso wahendeka na uyanjo neukuu itrambe remwedu na nyumba akwe gwa soko vamuhuvea Mungu. ³⁵ Nareaghea momwe, mayakimu vatroma ketri gune mosikae usuu wa igereza vahanya, "Varuhusu antu vasaa vende", ³⁶ Mosikae wamwera Paulo uhusu ikhani isii vii, " Mahakimu vatroma ketri nevaruhusu mofwaye: oi fumi unji namuende gwa majeghana." ³⁷ Lakini Paulo wamwera, "Vgughurie azarani, antu neva Rumi bila uguhukumea na vagujughutra ugigereza; alafu veseghetre vegufunye gwa siri? Gutri, itrodaheka, veso neveje vejuguheya afai". ³⁸ Asikae vavaera mahakimu gunto aghani isii, mahakimu vatreja ino nare vamanya kwamba Paulo vina Sila ne Arumi. ³⁹ Mahakimu vajanavaseya vefume, na nare vavafunya unji aigereza, vegavaomba Paulo vina Sila vefume unji aa muji wawe. ⁴⁰ Gwa hiyo Paulo vina Sila vafuma unji aigereza vaja unyumba ama Lidia. Paulo vina Sila nare vavaona anyadughu, vegavatia moyo na vafwaya umuji usuu.