¹ Metume na anyadughu avoo nere vo Yudea vegatregheya kwamba mataifa varefokea ukhani wama Mungu. ² Petro nare waja kuko uu Yerusalemu, mwirundo waantu nevetahirewe vandio umohanya, Vohanya, ³ "Wagikwatrea na antu nevetritahirewe na walia nayo!" ⁴ Lakini Petro wandia uhanya itukeo gwa undani ino; wahanya, ⁵ "Nare nuomba umuji wa Yafa, na naona ndotri ibele rosima fang'e ginya isaa nerikuu neyosima ufuma ugiunde umpande yong'e ine. Gasima gunenee. ⁶ Negagerava na ugeghema gunto ayo. Naona maimwana neiketri meghuu ene nevodova ung'e, na maimwana neyudova umahaka na nevoenenda na nyonyi. ⁷ Nahafo natregheya rori ueghetriye nane, "Ukaa, Petro, kikitra naulie!" ⁸ Nahanya, "Ntiui, Bwana, umomo wane gutrina wahi ukea intu gekeku ne ntigeeru na negechafu" ⁹ Lakini rori wansucha kange ufuma Ugiunde, eroo ne Mungu warehanya rieru, utrageetrane najisi, ¹⁰ Eyei egaonekana mara itratru,na mointu rahowa ugiunde kake. ¹¹ Ravaa, ighondo resee antu vatratu nareveemekie unyumba eyo nare guere; vatromwa ufuma Kaisari veje gune nee. ¹² Mwahu wambwera enda nayo, na utraende hiya nayo. Aghosia avi sita venda nane na nare gwenda unyumba amontu umwedu. ¹³ Agaguera ginya nare wavaona malaika veemekie unyumba akwe wahanya, "Ntuma Yafa nendo muetra simioni nechu rina rakwe riuya na Petro. ¹⁴ Ujuhanya ketri gune vee gwa usuu ujuchowa veve na nyumba ako." ¹⁵ Nare naandia uhanya nayo, Mwahu Mweru waja gunto awe ginya nare waja gune see mwandio. ¹⁶ Nokumbukwa nkhani yama Bwana, narewahanya, "Yohana agabatizia gwa maje; lakini mojubatizwa gwa Mwahu ne Mweru." ¹⁷ Pia mwese Mungu wafunya dahwa ginya nare wagufa sese naregwahuvea gune Bwana Yesu Kristo, nene neanyu, kwamba nodaha umuhitriya Mungu? ¹⁸ Narevatregheya mantu ayai, vetrina sucha, ila vegamorumba Mungu na vahanya, "Mungu wafunya toba gwa soko auremi pia" ¹⁹ Basi anyohuvea nare maghaseko andia gune Stefano vegabaghuka ufuma uu Yerusalemu- anyohuvea avai vegaenda kwengi, mpaka uu Foinike, Kipro na Antiokia. Vegavaera uhusu Yesu gutrufu gwa ayahudi na ntringwa vauya. ²⁰ Lakini vakei vawe neantu ufuma uu Kipro na Krene, vegaja Antiokia na uhanya na ayunani na umotranantia Bwana Yesu. ²¹ Na moghono wama Bwana nare wiitrambe remwedu nayo, na antu vaingi vegahuvea na vamosukia Bwana. ²² Ghabari yawe yaghea ugikanisa ra Yerusalemu: na vamotruma Barnaba aende mpaka uu Antiokia. ²³ Nare waja nawaona karama ama Mungu agayanja ; na vegavatia moyo vong'e vesaghe na Bwana unkhoo yawe. ²⁴ Gwa soko nare wiijue majeghana nawina Mwahu Mweru na uhuvei na antu vang'e vaongezeka gune Bwana. ²⁵ Baadae Brnaba waenda uu Tarso umuona Sauli. ²⁶ Narewamohanga, wamuetra Antiokia. Ahendeka gwa mwagha wong'e vagirunda itrambe remwedu na ikanisa na uvafundisia antu vang'i . Na anafunzi vaetranwa akristo gwa mara amwandio kuko Antiokia. ²⁷ Na gwa ighondo rasee aoni vasima ufuma Yerusalemu mpaka Antiokia. ²⁸ Umwedu wawe ne Agabo ndio rina rakwe, waemeka neguashirewa na Mwahu wahendeka nanjaa ighae ijujaa uguuremi wong'e. Eyei egagighea ighondo ra Klaudio. ²⁹ Gwa hiyo, anafunzi, momontu ginya nare wafanikewa, vegaamua utroa mosaada gwa anyadughu nevo Uyahudi. ³⁰ Vegahenda vii; vegatroma hela gwa moghono wama Barnaba vina Sauli.