¹ Eji evangeli ya Yesu Kirisito, Omwana wa Katonda. ² Nebhanza Nk'okwu Omurangi Isaya yahandikiire ati, “Lebha, natuma entumwa yange kukwebhembera, kukusemeleza omuhanda; ³ eiraka ly'omuntu hali omw'irungu, ati: Mushlemeze omuhanda gw'aMukama, mugorore emihandaye.” ⁴ Yohana akabha ali omw'irungu nayegesa abhantu kabhechuza amafu, bhakagarulirwa, nasubha nabhabhatiza. ⁵ Ensi yona ya Bhuyahudi bhamugendera, hamo n'abha Yerusalemu bhona. Abhabhatiza omu Mwiga gwa Yorudani nibhechuza amafu gabho. ⁶ Yohana akabha najwara echijwaro choruhu Rw'engamia, akabha Eine omukanda gw'oruhu omu omchibhuno, kandi akabha nalya enzige n'obhwochi bw'omw'iswa. ⁷ akaranga ati, “Akunduga enyuma manzi kunsaaga, tindagiirwe na kubhandama hansi kumujuura ebhiratwa. ⁸ Mbhabhatiize n'ameizi, chonka wenene alibhabhatiza na Mwoyo Arikwera.” ⁹ Omu bhiro ebhyo Yesu aruga Nazareti eya Galilaya abhatizibhwa na Yohana omuli Yorudani. ¹⁰ Kayamazire kuruga omu meizi, aho n'aho abhona eiguru lichingukire, na Mwoyo namusongokaho omuchiisusane ch'echiibha. ¹¹ N'eiraka liruga omw'iguru liti, “Iwe obha Mwana wange omukundwa, n'iwe nsemelerwa.” ¹² Mwoyo ayanguha amutwara omw'irungu. ¹³ Omw'irungu omwo akamaramu ebhiro gana nalengesibhwa na Setani. Akaikarayo n'ebhigunju; kandi abhamaleika mbhamuhangaikira. ¹⁴ Aho Yohana kabhabhaire bamukwasire, Yesu aija Galilaya naranga evangeli ya Katonda , ¹⁵ nagamba ati, “Akaanya kahika, obhukama bhwa Katonda bhuli heihi; mwechuze kandi mwikilize evangeli.” ¹⁶ Kayabhaire narabha aha Nyanja ya Galilaya abhona Simoni na Anderea omurumuna nibhanaga eikokoroo omu nyanja; nobhona bhakabha bhali bhajubhi. ¹⁷ Yesu abagambira ati, “Mumpondere, ndabhahindura bhajubhi bh'abhantu.” ¹⁸ Aho naho bhasiigaho amakokoro gabho bhamuhondera. ¹⁹ Kiyagenzireho akatambi akandi kake abhona Yakobho eya Zebedayo na Yohana omurumuna, bhakabha bhali omu bhwato nibasoborora amakokoro. ²⁰ Ayanguha abheta, basiiga ikokoro Zebedayo omu bhwato n'abhakozibhe, bhamuhondera. ²¹ Baja Kaperinaumu. Yesu tachelererwa, ahali Sabhato ataha omu sinagogi abhanza kwegesa. ²² Bhatangazibhwa emyegesezeye, aha bhw'okubha akabhegesa nk'omuntu aine obusobora ti nka bhegesa bha Mateka. ²³ Omu sinagogi yabho akabha halimu omuntu ayabheire aine Setani. ²⁴ Litera enduru,liti “Notwenzaki iwe Yesu owa Nazareti? Waija kutumara? Ninkumanya oli owa, oli alikwera wa Katonda.” ²⁵ chonka Yesu akabhukira eiSitani elyo ati, “Sila mara omurugemu!” ²⁶ EiSitani likabhisa omuntu ogwo nk'owensimbu limara limurugamu nilikunga n'amani. ²⁷ Abhantu bhagwa omu chitangaro, bhebhaza bhonene bhonka nibhagamba bhati, “echi ne'chiki? Myegeseze emisya! AmaSitani nagabhingisa obusobhora mara nigamuhulira.” ²⁸ Niho honka eiraangalye liraalira omu mukoa gwona ogwataine Galilaya. ²⁹ Omu sinagogi Yesu arahukamu ataha omwa Simoni na Anderea. Akabha aina Yakobho na Yohana. ³⁰ Aho nyinazara Simoni akasangwa abhyamikirwe omuswago, bhanguha bhamugambira omurwaire ogwu. ³¹ Yesu aija amukwata omukono amwimucha omuswago gumurugaho, nangu abatagaitira omu nju omwo. ³² Bhwaigoro eizobha ryatobheire bhamuletera abharwaire bhona n'abhabheire bhaine Amasitani. ³³ Echigo chona chisikuka chemeelera aha mulyango. ³⁴ Achiza abharwaire bhangi abha bhuri ndwara, abhinga n'Amasitani. Chonka tiyagajubhura kwatura chigambo, nobhona gakabha nigamumanya. ³⁵ Bhukeire bhwancha kale aimuka aja omu mwanya ogweheleire asoma ensara. ³⁶ Simoni n'abho yabheire aine abhandi bhamuhondera. ³⁷ Beija bhamubhona bhamugambira bhati, “Bhuli muntu nahiga iwe.” ³⁸ Abhagambira ati, “Tugendelere tuje echigo echidi nayo ndangeyo; manyasi echo nicho chandesire.” ³⁹ Arabha Galilaya yona, naranga omu sinagogi zabjo nabhinga n'Amasitani. ⁴⁰ Aijwa omubembe aghoba Yesu, abhandama amugambira ati, “Kawakwenda wakunyeza.” ⁴¹ Yesu asasa, aimuvha omukono amukwataho, amugambira ati, “N'inyenda, oyere.” ⁴² Aho honka ebhibembe bhimuhwaho, ayera. ⁴³ Amukomeleza, amara amutaisura bhwangu, ⁴⁴ namugambira ati, “Oramanya otajira chowagambira muntu; sana ogende oyeyoleke omukuhani, ojire n'ekihongo aha rw'okwezibhwa kwawe: Nicho chihongo echo Musa yaragiire k'abhantu bhamanyiraho.” ⁴⁵ Nawe kayaturukire abhigamba bhyona, amakuru agamazaho ensi, na Yesu abha atakitaaha mu chigo nibhamubhona. Aikara wenka aheru y'echaro chonka abhantu bhabha nibhamwijaho nibharuga embaju zona.